1, 2. (a) Ngera mo duubech sel dolatk e dosaod er a chad el betik a rengud er ngii? (Momes er a siasing er a uchelel a suobel.) (b) Ngera el ker a bo dosaod?

 SEL dolatk e dosaod el kirel a chad el betik a rengud er ngii, e a deleuill er kid me ngii a mengal mo mesisiich. E tiang a di osisiu el uai a deleuill er kid me a Jehovah el Dios. A David er a longkar a sib e ngmle blechoel el omes a btuch a lekebesengei e melebedebek el kirel ngika el mengasireng el Ulemeob. Ngmilluches el kmo: “Sel kumes er a melidiul el mrirellii, e kisa buil ma btuch el mlilechang er olsechelel, e ng ngera belkul a chad me ke kmal melatk er ngii; ng di chad, e ke kmal omekerreu er ngii?” (Psa. 8:3, 4) Me a apostol el Paulus er a loluches el kirel a rolel a Jehovah a loltaut er a telbilel el kirir a rengellitel el Kristiano, e ngdilu el kmo: “Kele ng kol meral klou a klungiolel a Dios! E kmal dmolech a llemesel a rengul ma lodengei!”​—Rom 11:17-26, 33.

² Sel bo doldingel a obliil, e kede melatk e mesaod el kirel a Jehovah e tiang a smisichii a deleuill er kid me ngii. A rebetok el pioneer a omelechesiu er a bltkil a rengrir el mo er a Dios el mengal mo mesisiich e le tir el ousbech a klou el taem el oldingel a obliil. Tia el suobel a mo ngosuterir tirke el pioneer me tirke el sorir el mo pioneer el mo kerekikl el melebedebek aika el ker: Ngmekerang a omesiou el pioneer e smisichii a deleuill er kau me a Jehovah? A lsekum e ke pioneer, e ngerang a mo ngosukau el melemolem er tia el ileakl el rolel a omesiou? A lsekum e ngdirkak bo mosiou el pioneer, e ngera sebechem el omuchel el meruul er ngii? Ka me bo domuchel el mesaod aike el rolel e a omesiou el pioneer a sebechel el smisichii a deleuill er kau me a Dios.

3. Ngmekerang a dosaod el kirel aike el bo loruul a Renged e ngosukid?

³ Sel dosaod el kirel aike el bo loruul a Renged er a ngar  medad el klebesei, e kede mengal mo kmeed er a Jehovah. Ngera el bades a kmal soam el ousbech er ngii sel moldingel a obliil? Nglocha soam el mesaod er a Psalm 37:10, 11; Daniel 2:44; Johanes 5:28, 29; me a lechub a Ocholt 21:3, 4. A bek el taem el dosaod el kirel aika el telbiil el mo er a rechad, e kid me kede dirrek el muklatk el kmo “a bek el ungil e cherrungel sengk” a mla er a bekururau el Dios er kid el Jehovah. Tiang a rullid el mengal mo kmeed er ngii.​—Jak. 1:17.

4. Ngera uchul me kede mengal mo oba omereng el saul el kirel a ungil el omerellel a Dios sel dolisechakl er a rebebil?

⁴ Sel domes er a ruumesingd el chad el diak el deu a rengrir e ua lecheloit el diak a olengeseu er tir, e kede mera el mo oba omereng el saul el kirel a klemerang. A rechad er tia el beluulechad a diak a ngeso el lolai me bo el sebechir el mo dmeu a rengrir e lungil a klengar er tir. Ngdiak a omeltkir e suebek a rengrir el kirel a ngar mederir el klebesei. Te melasem el osiik er a mera el belkul a klengar. A rebetok el chedal a klechelid a diak a klemedengei er tir er a Biblia. Te kmal di uai a rechad er a Ninive. (Monguiu er a Jona 4:11.) Sel dousbech er a klou el taem el mengedecheduch er a rechad sel doldingel, e kede mengal mo melechesuar a ulekerreuil a Jehovah el mei er kid. (Isa. 65:13) Engdi a Jehovah a diak di lomekerreu aike el lousbech a rechedal e lemerekong. Ngmesterir a rokui el chad a techall el mo nguu a ongelaod me a mera el omelatk. Tiang a omeklatk er kid el kmo a Jehovah a mera el ungil el Dios.​—Och. 22:17.

5. Ngmo ua ngerang a uldesued el kirel a mondai er kid sel dolisechakl er a rechad el kirel a klemerang?

⁵ Sel dolisechakl er a klemerang el mo er a rechad, e ngmo diak desal bekikl el kirel a mondai er kid. A ta er a regular pioneer el ngklel a Trisha a melekoi el kmo ngkmal mle mekngit a rengul er a lemedort a chebechiielel a demal me a delal. Ngmla er ngii a ta el taem el kmal mle mekngit a rengul e dimlak el soal el mo oldingel a obliil. Engdi ngmlo mesuub a Biblia el obengterir a retedei el ngalek el tir a mlukeroul er a chelsel a telungalek el kmal betok a mondai er ngii. A demerir a chiliteterir, e a klou el ochederir a kmal mle mekngit a omerellel el mo er tir. A Trisha a melekoi el kmo: “A ngii di el mondai me a lechub e ngklengiterreng el kulechesuar er seikid el taem a diak bo el ua aike el tekoi el lechilebangel tirke el ngalek. Sera ki mosuub, e te kmal mlo dmeu a rengrir. Tirke el ngalek a mera el mle sengk el mla er a Jehovah, e ileakl el ngilsukak er seikid el sils.”

6, 7. (a) Ngmekerang e mo mesisiich a klaumerang er kid sel dolisechakl a klemerang er a Biblia? (b) Ngmo ua ngera uldesued sel domes a omellach er a Biblia el olengeseu er a chad el dosuub el obengkel el mo ungil a klengar er ngii?

⁶ Sel dolisechakl er a klemerang er a Biblia el mo er a rechad, e ngmelisiich a klaumerang er kid. A apostol el Paulus a milluches el mo er a rebebil er a Rechijudea, el dimlak loruul aike el lullisechakl er a rechad el mo meruul el kmo: “Me kolisechakl er a re bebil er a re chad, e ngera me ng diak di le kau el osisecheklau?” (Rom 2:21) A remesiou el pioneer a blechoel el klou a techellir el mo olisechakl er a klemerang el mo er a rechad e mesuub a Biblia el obengterir. Me a bo lungil el meruul er tiang e ngkirir el di tir el osisecheklterir. Ngkirir el mengetmokl er tir el kirel a bek el omesuub e dirrek el meruul a research el kirel a ker. A ta el pioneer el ngklel a Janeen a mesaod el kmo sel ta el lolisechakl er a klemerang el mo er a rechad, e ngmengal mo mesisiich a klaumerang er ngii er aike el tekoi el lolisechakl.

⁷ Sel domes a omellach er a Biblia el olengeseu er a chad el dosuub el obengkel el mo ungil a klengar er ngii, e kede mengal mo omes er a llomeserreng er a Dios el kmo ngklou a ultutelel. (Isa. 48:17, 18) Tiang a rullid me ngmo soad el melemolem el ousbech aika el omellach er a chelsel a klengar er kid. A ta er a pioneer el ngklel a Adrianna a melekoi el kmo: “A klengar er a chad a sebechel el mo chetituokel a lsekum e ngdi ultuil er a di llemesel a rengul. Engdi sel lomuchel el ultuil er a llomeserreng er a Jehovah,  e ngdi mereched el mo uchul a klungiolel.” A ta er a pioneer el ngklel a Phil a melekoi el kmo ngmechas a rengul el omes er a rechad el ngmodech a klengar er tir el oeak a ngelsuil a Jehovah.

8. Ngmekerang a doldingel el obengterir a rudam me a rudos er kid e ngosukid?

⁸ Kede nguu a omelisiich sel doldingel a obliil el obengterir a rudam me a rudos er kid. (Osi. 13:20) Tirke el pioneer a ousbech a klou el taem el oldingel a obliil el obengterir a rudam me a rudos er tir. Tiang a mesterir a betok el techall el mo kasisiich er a delongelir. (Monguiu er a Osisechakl 27:17; Rom 1:12) A pioneer el ngklel a Lisa a mesaod el kmo sel lengar er a urerel, e a rechad a di kachechei, e di mengaiuechit er a rebebil. Ngbek el sils el di lorrenges er a rechad el kautulechoid e melius. Ngdochelii el kmo: “A lebebil er a taem e ke medenguul e le kau el olecholt a blekerdelir a Rekristiano. Me nguaisei, engdi sel doldingel el obengterir a rekldemed er a klaumerang e ngmera el mo uchul a omelisiich. Me sel be krei er a kebesengei, e ngkmal ungil a renguk alta e ak kmal skareter.”

9. Sel sekum a rubekel a dmak el pioneer, e ngmekerang e melisiich er a chebechiielir?

⁹ Sel dedak el obekel el mesiou el pioneer, e ngmengal mo mesisiich a chebechiieled. (Oli. 4:12) A ta er a pioneer el ngklel a Madeline a mesaod el kmo: “Ngak me a bechik a blechoel el dmak el mesaod el kirel a temam el oldingel me a lechub e ngtekoi el ki bla mchiuii er a Biblia el sebecham el ousbech er ngii sel ki moldingel a obliil. Bek el rak el ki mdak el pioneer e ngmengal mo kmes a deleuill er kemam.” A ta er a pioneer el ngklel a Trisha a melekoi el kmo ngii me a bechil a mla tibir el diak bo lomechar a klalo a lsekum e ngdiak a ududir. Tiang a uchul e ngdiak lekautoketok el kirel a udoud. Te dirrek  el dmak el mo oldingel er tirke el semeriar e mesuub a Biblia el obengterir a rechad. Tiang a mla ngosuterir me ngmengal mo mesisiich a chebechiielir.

10. Sel denguu a Renged el mo kot e dolechesuar er a ulekerreuil a Jehovah e ngera mo duubech er a klaumerang er kid er Ngii?

¹⁰ A klaumerang er kid er a Jehovah a mengal mo klou sel denguu a Renged el mo kot, dolechesuar er a ulekerreuil, e domes er ngii el onger a nglunguched. Ngklemerang el tekoi el kmo a rokui el blak a rengrir el Kristiano a oumerang er a Jehovah. Engdi tirke el mesiou el pioneer a mla metik el kmo ngdi sel lultuil a klaumerang er tir er a Jehovah e ngsebechir el melemolem el pioneer. (Monguiu er a Mateus 6:30-34.) A Curt a mesiou el pioneer e a lebebil er a taem e ngomtechei er a ta er a odam el oldingel a ongdibel. Ngkilengei el mo oldingel er a ongdibel el eru el sikang me a tedobech a cherridel er a blil. Ngii me a bechil, el dirrek el mesiou el pioneer a di mla er ngii a chelucherir el mo er sel ongdibel engdi ngmo diak el sebechir el lmuut el me remei, e dirk medechel a ta el sandei e ngmo uduudel. A Curt a melekoi el kmo ngdimlak lodengei el kmo ngdi ungil a lebong me a lechub e ngdiak. Engdi te milluluuch e tilib a rengrir el mo oldingel er sel ta er a ongdibel. Te uluumerang el kmo a Dios a mo omesterir aike el lousbech. Me a uchei er a lorael, e a ta el odos a ulemekedong er tir e dilu er tir el kmo ngmla er ngii a soal lomesterir. Ngika el odos a milsterir sel ildisel a udoud el luluusbech el kirel tia el omerael. A Curt a melekoi el kmo sel leblechoel el duubech a chouaika el tekoi, e ngmo beot er kid a mesang el kmo a Jehovah a omeskid aike el dousbech.

11. Ngera bebil er a klengeltengat el lengai tirke el mesiou el pioneer?

¹¹ Tirke el mesiou el pioneer a blechoel el melekoi el kmo sel lemengal mo kmeed er a Dios e loruul a lmuut el betok er a omesiungir, e te mo ngmai a betok el klengeltengat. (Dut. 28:2) Engdi a omesiou el pioneer a diak el blechoel el beot el tekoi. Kid el rokui a mo chuarm e le kid el diak demecherrungel e kiei el ngar er tia el mekngit el blekeradel er a beluulechad. A lebebil e a mondai a sebechel el mo uchul e a chad a mo diak el pioneer el telkib el taem. Engdi ngbetok er aika el mondai a mle sebechel el mesmechokl me a lechub e ngsebechel a chad el oleiub er ngii er ngii me lak el duubech. Ngera sebechel el ngosuterir tirke el pioneer el mo melemolem el ngar er tia el ileakl el rolel a omesiou?

12, 13. (a) Ngera kirel a pioneer el meruul er ngii a lsekum e ngmeringel er ngii a meruul a temel? (b) Ngera uchul me a chad a kmal kirel el menguiu er a Biblia er a bek el sils, e di ngii el mesuub, e melebedebek aike el losuub?

¹² A ruumesingd el pioneer a kmal mechesang. Ngsebechel el mo meringel er a chad el remuul aike el kirel remuul, me ngklou a ultutelel a bo el ungil el kltmokl. (1 Ko. 14:33, 40) A lsekum a pioneer a meringel er ngii el remuul a temel, e ngkirel el mo kerekikl el kirel a rolel a lousbech a temel. (Efe. 5:15, 16) Ngsebechel el di ngii el oker er ngii el kmo: ‘Ngak ak mengoit a klou el taem el kirel a omilil? Ngsebechek el ngodechii a temek er a ureor? Ngak ak mengoit a klou el taem el meruul a diak a ultutelel el tekoi?’ Tirke el pioneer a kirir el blechoel el di tir el oker aika el ker e melodech aike el kirir el oureor el kirel.

¹³ A pioneer a kirel ngar er ngii a temel el mo menguiu er a Biblia er a bek el sils, e mesuub el di ngii el tang, e dirrek el melebedebek a subelel. Ngdirrek el kirel el kerekikl me aike el diak a ultutelel el tekoi lak bo longesang er ngii me lak loruul a meklou a ultutelel el tekoi. (Fil. 1:10) El ua tiang, molatk el kirel a pioneer el mocha remei er a uriul er a loldingel el ta el sils. Ngsoal el mengetmokl er ngii er sel kesus el kirel a miting, engdi a kot e ngomes er a dengua er ngii e menguiu e onger a text er a rechad el mo er ngii. A uriul e ngoudengua el mo er a ta er a resechelil me te chadecheduch. Me ngdi mle uaisei el engelakl a eru el sikang e dirkak leketmeklii  el kirel a miting. Ngera uchul me tiang a sebechel el mo uchul a mondai? A lsekum e a chad er a klekool a soal el ousekool el betok el rak e ngkirel el blechoel el mengang a kall el ungil er a bedengel. Me ngdi osisiu, a pioneer a kirel el blechoel el mesuub el di ngii el tang me bo el sebechel el melemolem el mesiou el pioneer.​—1 Ti. 4:16.

14, 15. (a) Ngera me ngkirir tirke el pioneer el omekbeot a klengar er tir? (b) A lsekum a pioneer a mo chelebangel a mondai, e ngera kirel el meruul er ngii?

¹⁴ A reblak a rengrir el pioneer a melasem el omekbeot a klengar er tir. A Jesus a millisiich er a redisaiplo er ngii el mo meruul er tia el tekoi. (Mt. 6:22) Ngulemekbeot er a klengar er ngii me bo el sebechel el mo blak a rengul er a omesiungel. Ngdilu el kmo: “A fox a ngar ngii a kliokl el le bor ngii, ma suebek el charm a ngar ngii a lukel, e ngdi Ngelekel a Chad a diak a bo le mechiuaiu er ngii.” (Mt. 8:20) Tirke el pioneer el mesuub er a kerebil a Jesus a medengei el kmo a bo lebetok a kloklir, e ngmo kirir el di mengetmokl, e meruul, e dirrek el omtechei.

¹⁵ Tirke el pioneer a medengei el kmo a omesiungir a klou a ultutelel, engdi ngdiak lomdasu el kmo te kuk ungil er a rebebil. Te medengei el kmo a omesiou el pioneer a sengk el mla er a Jehovah. Me a bo lolemolem er tia el rolel a omesiou, e a derta el pioneer a kirir el otuil a klaumerang er tir er a Jehovah. (2 Ko. 4:7) Te ulterekokl el mo chelebangel a mondai. (Psa. 34:19) Me sel lebo leuaisei, e ngkirir el olengit a ulekrael er a Jehovah e msang a techellel el olengeseu er tir, er a bai di lemereched el mo diak el losiou el pioneer. (Monguiu er a Psalm 37:5.) Me sel lomes er a rolel a Jehovah a lomekerreu er tir, e ngmengal mo mesisiich a deleuill er tir el obengkel.​—Isa. 41:10.

16. Ngera kirem el meruul er ngii a lsekum e ngsoam el mo pioneer?

¹⁶ A lsekum e ngsoam el mo pioneer me bo mukngeltengat el ua tirke el pioneer, e moluluuch el mo er a Jehovah el kirel. (1 Jn. 5:​14, 15) Mongedecheduch er tirke el pioneer e mruul a turrekong er kau el sebechel el ngosukau el mo pioneer. Tia el tekoi a lurruul er ngii a Keith me a Erika. Me nguai a ruumesingd el obekel el ua meklungir, e te uluureor el mui el taem e milecherar a blirir me a mlirir er a uriul er a bo lebechiil. Te dilu el kmo: “Aki ulemdasu el kmo aika el tekoi a mo uchul a deuil a rengmam, engdi ngkmal dimlak bo leuaisei.” A uriul er a bo lak loureor a Keith, e ngulemuchel el mesiou el auxiliary pioneer. Ngdilu el kmo: “A omesiou el pioneer a ulemeklatk er ngak er sel deurreng el dolechesuar sel domerk er a klumech.” Te mlo sechelirir a reteru el obekel el mesiou el pioneer el ngilsuterir el mo medengei el kmo a omesiou el pioneer me a beot el rolel a klengar a uchul a klou el deurreng. Me ngera ngmirruul er ngii a Keith me a Erika? Te liluches a turrekong er tir e merekedii er a ice box er tir, me a bek el taem el lerellii a ta er aike el tekoi e te loia olengchelir er ngii. A cherengel a taem e ngmlo sebechir el pioneer.

17. Ngera uchul me ngkirem el kerekikl el melatk el kmo ngsebechem el pioneer me a lechub e ngdiak?

¹⁷ Kau ngsebechem el mo pioneer? A lsekum e ke omdasu el kmo ngdiak el sebechem el mo pioneer er chelecha el taem, e moruul aike el sebechem el mo olekeed er kau er a Jehovah el oeak a leblak a rengum er a omesiungem. A omoluluuch el mo er a Jehovah e mkerekikl el melatk el kirel a blekerdelel a klengar er kau, e nglocha mo sebechem el ngmodech a bebil el tekoi er a klengar er kau el mo uchul e ngsebechem el pioneer. Me alta e ngmo diak el sebechem el meruul a bebil el tekoi el soam el meruul, engdi sel bo momuchel el pioneer e a deurreng er kau a kmal mo klou. Ngkmal mo dmeu a rengum e le kau el nguu a Rengedel a Dios el mo kot er a klengar er kau e dirrek el olengeseu er a rechad. (Mt. 6:33) Ngdirrek el mo betok a techellem el omdasu e dirrek el mesaod el kirel a Jehovah, e tiang a mo smisichii a bltkil a rengum el mo er ngii e rullii el mo dmeu a rengul.