1, 2. (a) Ngera uchul me ngklou a ultutelel a di deklekar e deblechoel el meluluuch? (b) Ngera el ker el kirel a nglunguuch a kired el di kid el oker?

 A CHAD el uluureor a leklebesei a millekoi el kmo: “Sel kot el meringel el taem el dolemolem el mekar a sel mochu tutau.” A rechad el kirir el mekar el ta el kesus a dirrek el locha kongei er tia el tekoi. Tiang a sebeched el omekesiu er ngii er a taem el dekiei er ngii er chelechang e le kede kiei er a ulebongel er tia el beluulechad er a Satan. Me ngdi ua sel kot el milkolk el taem a leklebesei me a Rekristiano a kirir el melemolem el blak a rengrir el di klekar. (Rom 13:12) Me ngkmal kdekudel a lsekum e kede mo mechiuaiu el belkul a kmo ngdiak doruul a soal a Dios. Me a leuaisei, e ngkired el ‘ultebechel a rengud e di klekar’ e mo blechoel el meluluuch.​—1 Pe. 4:7.

² Kid el kiei er a taem el mochu nguemed a beluulechad er a Satan a uchul me ngkired el di kid el oker el kmo: ‘Ngak ak kerekikl er a rolel a kululuuch? Ak blechoel el meluluuch e ousbech a kakerous el rolel a nglunguuch? Ak blechoel el meluluuch el kirir a rechad, me a lechub ak di meluluuch el kirel aike el kuusbech me aike el soak? Ngua ngera klungel a ultutelel a nglunguuch el kirel a osebelek?’

3. Ngerang a bebil er a rolel a doluluuch?

³ A Paulus er a loluches el mo er a rengar er a ongdibel er a Efesus, e ngmilsaod el kirel a “bek el blekeradel longit el meluluuch.” (Efe. 6:18, BT) Sel doluluuch el mo er a Jehovah, e kede blechoel el olengit er ngii me lebeskid aike el dousbech e lengesukid el sumechokl a mondai er kid. A Biblia a melekoi el kmo ngii a “onger a nglunguuch,” me a bltkil a rengul er kid a uchul me ngorrenges er kid sel dolengit a ngeso. (Psa. 65:2) Engdi sel doluluuch e ngdiak el kired el di olengit el kirel aike el dousbech e lemerekong. Ngdirrek el kired  el oldanges er a Jehovah, e mereng a sulel e mengal mo blak a rengud el meluluuch el mo er ngii.

4. Ngera uchul me ngkired el blechoel el oldanges er a Jehovah sel doluluuch?

⁴ Ngkmal betok a ungil el uchul e ngkired el oldanges er a Jehovah sel doluluuch. El uai tiang, ngsoad el oldanges er ngii sel dolatk el kirel a “ikel mesisiich el tekoi el bla leruul” me a “ngarbab el chetengel.” (Monguiu er a Psalm 150:1-6.) Sel domes aike el elolem el bades el ngar er a Psalm 150, e ngmesaod a odengesel a Jehovah el 13 el taem. A ta er a milluches er a Psalm a ulechotii a dmolech el bltkil a rengul el mo er a Jehovah er a longitakl el kmo: “Ng euid el kuldanges er kau er a tal sils, el kirel a melemalt el llechum.” (Psa. 119:164) A Jehovah a kmal rredemelel a odanges, me ngdirrek el kired el mo ‘euid el taem el doldanges er ngii er a tal sils’ el belkul a kmo kede blechoel el meluluuch el oldanges er ngii.

5. Kede mekerang e mukerreu sel doluluuch el oba omereng el saul?

⁵ A ta er a rolel a nglunguuch a omereng el saul. Ngar er a babilengel el mo er a Rekristiano el ngar er a beluu er a Filipi, e a Paulus a dilu el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel.” (Fil. 4:6) Kid el kiei er a taem er a ulebongel e iliuekl er a rechad el “diak loreng a saul” a uchul, me ngklou a ultutelel a doreng a sulel a Jehovah el mera el ngar er a rengud el kirel a rokui el klengeltengat el lomeskid. (2 Ti. 3:1, 2) A beluulechad a mui er a rechad el diak loreng a saul me a lsekum e ngdiak dekerekikl e ngsebeched el mo uai tir. Engdi a lsekum e kede oba omereng el saul sel doluluuch, e ngmo dmeu a rengud e diak di dongeremrum el kirel a klengar er kid. (Jud. 16) Sel sekum a bdelul a delengchokl a meluluuch el mereng a saul el obengkel a telungalek er ngii, e tiang a mo melisiich er a bechil me a rengelekel el dirrek el mo oba omereng el saul.

6, 7. Ngerang a lmuut el ta er a rolel a nglunguuch? E ngera el tekoi a kired el mengal mo blak a rengud el meluluuch el mo er a Jehovah el kirel?

⁶ A lebebil er a taem e ngkired el mengal mo blak a rengud el meluluuch. Ngera el tekoi a kired el mengal mo blak a rengud el meluluuch el mo er a Jehovah el kirel? Ngsebeched el olengit a ngeso er a Jehovah sel bo dechelebangel a ultok me a lechub e ngsel lengar er ngii a sechered el sebechel el mo uchul a kodelled. A chouaika el tekoi a blechoel el rullid el mengal mo blak a rengud el meluluuch el olengit a ngeso er a Jehovah. Engdi ngkired el di meruul er tiang sel bo dechelebangel a ultok me a lechub e kede mo smecher?

⁷ Me a bo donger er tia el ker, e kede mo mesaod aike el lullekoi a Jesus el ngar er a nglunguchel er a losaod er a ngklel a Dios, Rengedel me aike el soal. (Monguiu er a Mateus 6:9, 10.) Ngkmal klou a chelebirukel er tia el beluulechad, me a kabelment a diak el sebechel el mesterir a rechad aike el lousbech. Tiang a meskid a ungil el uchul e kede meluluuch me lemechedaol a ngklel a Dios me a Rengedel lemei el okngemedii a omengederederel a Satan. Ngdirrek el ungil el taem el doluluuch el mo er a Jehovah me lemeruul a soal er tia el chutem el di uai sel mla meketmokl el ngar er a eanged. Me a leuaisei e dolemolem el klekar e doluluuch el ousbech aika el kakerous el rolel a nglunguuch.

8, 9. Ngera uchul me ngdiak el kired el oukerrekeriil er a Petrus me tirke el bebil el apostol el iliit a mederir er a sers er a Gethsemane?

⁸ A Petrus a milluches el mo er a Rekristiano me di le ‘klekar, me bo le sebechir el meluluuch,’ engdi ngmlo er ngii a taem el dimlak el sebechel el rullii tia el tekoi. Ngii a ta er tirke el disaiplo el iliit a medal er sera loluluuch a Jesus er a sers er a Gethsemane. Me alta e a Jesus a dilu er tir el kmo, “mongkar e moluluuch,” engdi tir a iliit a mederir.​—Monguiu er a Mateus 26:40-45.

⁹ Ngdiak el kired el oukerrekeriil er a Petrus me tirke el bebil el apostol el mlo imiit a mederir, e le seikid el sils e a betok el tekoi a dilubech me tir a kmal mle mesulaul. Te milengetmokl el kirel a Baskua el mo er ngii er sel kebesengei. E a uriul, e a Jesus a kiltmeklii a Chedaol Blsoil me bo el  sebechir a redisaiplo el meduch er a rolel a longedaol er a kodellel er a bek el rak. (1 Ko. 11:23-25) Me a Biblia a kmo, te milengitakl a “chelitakl er odanges e tilobed el merael el mor a Rois er Olib.” Me ngmle kirir el merael er a chelsel a beluu er a Jerusalem el mo er tia el basio. (Mt. 26:30, 36) Me nglocha mla imiit er a sueleb er a klebesei e te mocha er tia el basio. A lsekum e kede ulebengterir er sel taem, e kede locha dirrek el iliit a medad. Me a Jesus a dimlak bo el mekngit a tekingel el mo er tirka el apostol, e ngbai millekoi er tir el kmo, “a rengul a chad a soal, e ngdi klechad er ngii a mechitechut.”

10, 11. (a) Ngera el tekoi a lesilubii a Petrus er a lengar er a sers er a Gethsemane? (b) Ngera ke suubii er a tekoi el dilubech el mo er a Petrus?

¹⁰ A Petrus a mlo melechesuar a kmal meringel el tekoi e ngiluu a klubelel er ngii er sel kesus er a leiit a medal er a sers er a Gethsemane. Uchei er tiang e a Jesus a dilu er tir el kmo: “Chelechal kesus e kemiu el rokui a mo chemiis e choitak.” Engdi a Petrus a dilu el kmo: “A lsekum a rokui el chad a mo choitau e ngdi ngak a kmal diak bo kchitau.” Me a Jesus a dilu er a Petrus el kmo ngmo oumededenger er ngii el ede el taem. Engdi a Petrus a dimlak loumerang me ngdilu el kmo, “A bo le kirek el mo mad el obengkem, me ngak a kmal diak bo kuumededenger er kau.” (Mt. 26:​31-​35) Me nguaisei, engdi a tekingel a Jesus a mlo tmaut. Me a Petrus er a bo lolechesuar a oberaod el tekoi el lerirellii e ng “lilangel el kmal mekngit a rengul.”​—Lk. 22:60-​62.

¹¹ Ngokiu a tekoi el dilubech el mo er a Petrus, e ngsilubii el mo diak lultuil er a di uldesuel e lemerekong. A nglunguuch a ngilsuir el kirel tia el tekoi. Kede mekerang e medengei? E le a Petrus a milluches el kmo ngkired el ‘di klekar, me bo le sebeched el meluluuch.’ Me kid kede olengesenges er tia el uleklatk er a Biblia? Kede blechoel el meluluuch, el ochotii el kmo kede ultuil er a Jehovah? Ngdirrek el kired el mo oltaut er a uleklatk er a Paulus el kmo: “Ma le ua isei, e ngikel omdasu el kmo ng mesisiich el dechor, bo le kerekikl me lak bo lubuu.”​—1 Ko. 10:12.

12. Ngera uchul me a Nehemia a ungil el kerebai el kired?

¹² A ta er a kmal ungil el kerebai a Nehemia. Ngii ngike el uluungerachel a imelel a King el Artakserses er a Persia er a bekord el 450 el rak er a uchei er a Kristus. A Nehemia a kmal ungil el kerebai e le ngmilluluuch el mo er a Jehovah el mera el mla er a rengul. A Biblia a kmo ngdimlak lomengur e milluluuch el betok el sils el kirel a meringel el blekeradel el lechelebangel er ngii a Rechijudea el ngar er a Jerusalem. (Neh. 1:4) Me a Artakserses er a loker er ngii el kmo ngera uchul me ngmle mekngit a rengul, e a Nehemia a di mle mereched el ‘meluluuch el mor a Dios el ngar a eanged.’ (Neh. 2:2-4) Me ngera mlo rsel? A  Jehovah a ulenger er a nglunguchel el mlo uchul e ngilsuterir a Rechedal. (Neh. 2:5, 6) Tia el tekoi a ulterekokl el millisiich er a klaumerang er a Nehemia!

13, 14. Ngera kired el meruul me bo lemesisiich a klaumerang er kid e lak debecherei a Satan me longitechut er kid?

¹³ Ngmo smisichii a klaumerang er kid a lsekum e kede blechoel el meluluuch el uai a Nehemia. A Satan a kmal diak el chubechubechad e blechoel el omekcharm er kid er sel taem el mechitechut a rengud. El uai tiang, a lsekum e ngar er ngii a meringel el sechered me a lechub e ngkmal mekngit a rengud, e ngsebeched el mo omdasu el kmo a Dios a diak lomes aike el taem el dousbech el omerk a klumech er a bek el buil el kmo ngklou a ultutelel. Te dirrek el ngar er ngii a rebebil el mo chuarm a uldesuir, e le nglocha meringel el tekoi el dilubech er a klengar er tir er a uchei. A Satan a soal a bo doumerang el kmo ngdiak a ultuteled. Me ngmelasem el ousbech a chouaika el uldasu el mengitechut er a klaumerang er kid. Engdi a lsekum e kede di klekar e blechoel el meluluuch, e ngsebechel el mo mesisiich a klaumerang er kid. A Biblia a melekoi el kmo a klaumerang er kid a ua klou el tekerenged el sebechel el omekerreu er kid er a “rokui el kmard el belechel ngikel Mekngit.”​—Efe. 6:16.

¹⁴ A lsekum e kede di klekar e blechoel el meluluuch, e ngdiak dekibetiekl sel bo dechelebangel a omelsemai e bo lak leblak a rengud el mo er a Jehovah. Me sel bo dechelebangel a omelsemai, e ngkired el blechoel melatk er a kerebil a Nehemia e mereched el meluluuch el mo er a Jehovah. Ngdi okiu a ngeso er a Jehovah e ngmo sebeched el oltngakl a ongetikaik e outekangel a omelsemai el kirel a klaumerang er kid.

15. Ngera el ker a kired el di kid el oker el kirel a nglunguched?

¹⁵ A Jesus a mle blak a rengul el meluluuch el  kirel a apostol el Petrus me lak bo lemechitechut a klaumerang er ngii. (Lk. 22:32) Me a Kristiano el ngklel a Epafras a uluukerebai er a Jesus e le ngmle blak a rengul el meluluuch el kirir a rudam er ngii el ngar er a ongdibel er a Kolose. A Paulus a milluches el kmo: Ng “di blechoel el kmal blak a rengul el melatk er kemiu er a nglunguchel, el olengit er a Dios me ng ngosukemiu el mo mesisiich el oumerang, e kmal ultebechel a rengmiu el oltirakl a ikel soal a Dios.” (Kol. 4:12) Me a leuaisei e ngkired el di kid el oker el kmo: ‘Ngak ngblak a renguk el meluluuch el kirir a rudam er ngak el meliuekl er a beluulechad? Ak blechoel el meluluuch el kirir a rudam me a rudos el chuarm er a meklou el telemellel a beluu? Ngoingerang e ak milluluuch el kirir tirke el oberaod a ngerechelir el ngar er a cheldebechelel a Jehovah? Ngak ak dirk milluluuch el kirel a chad el ngar er a ongdibel el chelebangel a mondai?

16. Ngar er ngii a ultutelel a doluluuch el kirir a rudam me a rudos er kid? Mosaod.

¹⁶ A nglunguched el mo er a Jehovah el kirir a rudam me a rudos er kid a kmal sebechel el olengeseu er tir. (Monguiu er a 2 Korinth 1:11.) A Jehovah a diak di loruul a tekoi e le rebetok el chedal a blechoel el meluluuch el kirel a osisiu el tekoi. Engdi ngdmeu a rengul el mesterir el kaukerreu me tiang a sebechel el rullii el mo onger a nglunguchir. Me ngklou a ultutelel el kired el meluluuch el kirir a rechad. Ngungil a doukerebai er a Epafras el oubltikerreng el mo er a Rekristiano el rudam me a rudos er kid el oeak sel doluluuch el kirir. A doruul el uaisei e ngmengal mo dmeu a rengud e le “ng bai klou el deurreng a dorous er a dolai.”​—Rel. 20:35.

17, 18. A omerelled el di klekar e blechoel el meluluuch ngmekerang e sebechel el ngosukid?

¹⁷ A Paulus er a uchei er a ledu el kmo “a klebesei a riedang, e a llomes a mermang,” e ngmilluches el kmo: “Ng mla mo belsechel el kiriu el mekiis er a cheliuaiu. Ele belsechel osebeled a kuk kmeed er kid er ser a de kot el mo oumerang.” (Rom 13:11, 12) A beches el beluulechad er a Jehovah a olekedang, me a osebeled a locha lmuut el kmedang er sel domdasu er ngii. Me ngkmal diak el kired el mo ua demechiuaiu el diak doruul a soal a Dios, me a lechub e kede mecherei tia el beluulechad me lerellid el mo mechesang me bo lak a temed el meluluuch el mo er a Jehovah. Ngbai kired el di klekar e blechoel el meluluuch. Me sel doruul el uaisei, e ngosukid el mo olecholt a “chedaol blekeradel ma chomeluu ra Dios” er chelecha el dongiil er a sils er a Jehovah. (2 Pe. 3:11, 12, BT) Me a blekerdelel a klengar er kid a kirel el ochotii el kmo kede mekar el meruul a soal a Jehovah e dirrek el oumerang el kmo a ulebongel er tia el mekngit el beluulechad a kmedang. Me ngkired el “meluluuch el di blechoel.” (1 Th. 5:17) Ngkired el oukerebai er a Jesus e sikii a basio el sebeched el mo er ngii el di kid el tang e meluluuch el mo er a Jehovah. Me a lsekum e kede ousbech a klou el taem el meluluuch el mo er Ngii, e kede mengal mo kmeed er ngii. (Jak. 4:7, 8) E tiang a mera el mo uchul a klungioled!

¹⁸ A Biblia a kmo: “A Jesus er a le ngar a beluulchad e ng mle klou a ngerel e dirrek el lilangel er a loluluuch e lolengit a ngera er a Dios, el ngikel mle sebechel el osebelii er a kodall. A Dios a rirengesii ele ng mle ngariou a rengul e blak a rengul er ngii.” (Heb. 5:7) A Jesus a kmal mle blak a rengul el meluluuch el mo er a Jehovah e dirrek el ullengit aike el lousbech e millemolem el blak a rengul el mo er Ngii el mo lmuut er a ulebengelel a klengar er ngii er tia el chutem. Me ngblakerreng er a Jesus a uchul, me a Jehovah a ulekisii ngii el Ngelekel er a kodall e milsang a diak lengemed el klengar el ngar er a eanged. Kid me ngdirrek el sebeched el melemolem el blak a rengud el mo er a Demad el ngar er a eanged alta kede mo chelebangel a betok el ongetikaik me a omelsemai er a ngar medad el klebesei. Me a lsekum e kede di klekar e blechoel el meluluuch e ngsebeched el mo nguu a sengk el ngii a diak a ulebengelel el klengar.