1, 2. (a) Ngtecha “ngikel blak a rengul e meral ocholt”? (b) Ngera belkul a ngakl el Jesus, e milekerang e ngosuterir a rechad er a Judea el lmuut el nguu a kengei er a Jehovah?

 SERA lengar er a medal a kerrekeriil a Jesus, e ngmle bekeu el ouchais er a Pontius Pilatus el chad er a Rom el kabernor er a Judea el kmo: “A uchul mak mlechell el mer tial beluulchad, a mlei el me ouchais er a klemerang.” (Monguiu er a Johanes 18:33-37.) Sesei el rak er a uriul, e a apostol el Paulus a milsaod el kirel a Jesus el kmo, ng “mlo ungil el ochotii a loumerang er ngii el tekoi er medal a Pontius Pilatus.” (1 Ti. 6:13) Kid a kiei er a beluulechad el longedereder er ngii a Satan el mui er a klauketui. Me ngkired el mo oba blekeu el ua Jesus el “ngikel blak a rengul e meral ocholt” me bo el sebeched el melemolem el omerk er a klumech.​—Och. 3:14.

² A rokui el chad er a Judea a mle sioning er a Jehovah, engdi a Jesus a mlo ngike el kot el ngarbab el sioning. (Isa. 43:10) A uchei er a lemechell a Jesus e a anghel a dilu er a demal el Josef el kmo: “Ke mo mengklii el Jesus, ele ng ngii a mo olsobel er a re chedal er a kngterir.” (Mt. 1:20, 21) A belkul a ngakl el Jesus el tekoi er a Hebru a kmo: “A Jehovah a Osobel.” Me a Jehovah a mo ousbech er a Jesus el mo olsobel er a rechad er a klengit me a kodall. Me a Jesus a dilu er a rechad er a Judea el kmo, ngmle kirir el obult er a kngterir me bo el sebechir el  lmuut el nguu a kengei er a Jehovah. (Mt. 10:6; 15:24; Lk. 19:10) Ngulemerk er a klumech el kirel a Rengedel a Dios. A Markus a milluches el kmo: “A Jesus a mlor a Galilea e olisechakl er a Ebangkelio el mlar a Dios el mei. Ng dilu el kmo, ‘Ng mla mo belsechel ma Rengedel a Dios a kmedang! Me mobult er a kngtmiu e bo moumera er a Ebangkelio!’” (Mk. 1:14, 15) A Jesus a kmal mle blak a rengul e bekeu el omerk er a klumech. Ngdirrek el mle bekeu el ocholt a kngterir a remengeteklel a klechelid er a Judea, el ngii a ta er a uchul me te milekodir.​—Mk. 11:17, 18; 15:1-15.

3. Ngera dilubech er a edei el klebesei er a uriul er a lemad a Jesus?

³ Ngmla er ngii a mengasireng el tekoi el dilubech er a edei el klebesei er a uriul er a lemukcharm a Jesus e lemad. A Jehovah a ulekisii er a kodall e milsa bedengel el diak el rruul er a tech me a rasech. (1 Ko. 15:20, 50) Me a Redisaiplo a mlo medengelii tia el tekoi e le Jesus a mlo duum er mederir. Me sel sils er a lebekiis er a kodall, e ngmlo duum er mederir a rekakerous el disaiplo er ngii el lekesengil e ngeim el taem.​—Mt. 28:8-10; Lk. 24:13-16, 30-36; Jn. 20:11-18.

4. Ngera dilubech er sel taem el Jesus a mlo duum er a redisaiplo er ngii, e dilu el kmo ngkirir el mekerang?

⁴ Sel ongeim el taem er a bo ldum er a rechapostol er ngii a Jesus, e te mle kldibel tir me a rebebil er a rechad. Me ngilsuterir el mo medengei el kmo ngbetok a bades er a Chedaol el Llechukl el mesaod el kirel a kodellel me a okisel. Me ngar er a ulebengelel sel ileakl el miting, e a Jesus a uluuchais a tekoi el kirir el mo meruul. Ngdilu el kmo: “Ng okiu a ngklel e a klumech el kirel a beltel a reng ma chitel a klengit a kirel el mo mosisechakl el mor a rokui el beluu, el omuchel er a Jerusalem.” E dilechelii el kmo, “Kemiu a mo olecholt a ikal tekoi.”​—Lk. 24:44-48.

5, 6. (a) Te mlo ochotel techang a redisaiplo er a Jesus? (b) Te mo ouchais er a rechad el kirel a ngerang?

⁵ Sei a uchul me a rechapostol a mlo ungil el medengelii a belkul a tekingel a Jesus el ledillii er sel ulebongel el taem er a bo ldum er tir er a 40 el klebesei er a uriul. Ngdilu el kmo: “Kom mo ochotek er a Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rel. 1:8) Tirka el disaiplo a mle chad er a Israel me te mle sioning er a Jehovah. Me chelechang e te dirrek el mo ochotel a Jesus. Tia ngera belkul?

⁶ Ngbelkul a kmo, te mo omuchel el ouchais el kmo a Jehovah a ousbech er a Jesus el olsobel er a rechad. Me tia el tekoi a lmuut el klou a belkul er sel mle rolel er a Jehovah er a lolsobel er a rechad er a Israel er a irechar. E le kodellel me a okisel a Jesus Kristus a mlo uchul e a rechad a sebechir el mengubet er a klengit me a kodall. Sel taem el redisaiplo er a Jesus a mlengilt el oeak a chedaol klisichel a Dios er a Pentekost er a rak er a 33, e te ulemuchel el ouchais el kirel a “mengasireng el tekoi el bla leruul a Dios.” Me a rebetok er tirke el ulerrenges a ulebult e mlo oumerang er a olubet el tengetengel a Jesus. Seikid el taem e a Jesus a mla er a eanged e dirk ngiluu a klisichel a omerreder, me a Jehovah a uluusbech er ngii el olsobel er a rebetok el telael el chad er a chutem.​—Rel. 2:5, 11, 37-41.

7. A tekoi el dilubech er a Pentekost er a rak er a 33 ngolechotel a ngerang?

⁷ A tekoi el dilubech er a Pentekost er a  rak er a 33 a ulechotii el kmo, a Jehovah a kilengei er a cherrungel el tengetengel a Jesus el uchul me a rechad a sebechir el mengubet er a klisichel a klengit. (Heb. 9:11, 12, 24) Me a Jesus a milsaod el kmo ngmlei el me “odersii a klengar er ngii el olsobel er a re betok el chad.” (Mt. 20:28) Me tia el tenget ngdi mo uchul a klungiolir a rechad er a Judea e merekong? Ngdiak, e le olubet el tenget a “melubet a kngtil a beluulchad!” Me a Dios a soal a “rokui el chad a bo le sobel.”​—Jn. 1:29; 1 Ti. 2:4-6.

8. Te milekerang tirke el kot el disaiplo e melemolem el ouchais er a rechad el kirel a Jesus, e mlo sebechir el ouchais er a rua techang?

⁸ Tirke el kot el disaiplo a uleba blekeu e millemolem el ouchais er a rechad el kirel a Jesus. Te milekerang e meruul er tia el tekoi? Ngdimlak lokiu a di klisichir. Te bai ullengit er a Jehovah me lebesterir a chedaol klisichel el mo olengeseu er tir. (Monguiu er a Rellir 5:31-32.) Me a bekord el 27 el rak er a uriul er a Pentekost er a rak er a 33, e te mla merkii a “meral osisechakl el okiu a Ebangkelio” el mo er a rechad er a Judea me a Rechisentael er a beluulechad el rokir.​—Kol. 1:5, 23.

9. Ngera dilubech er a ongdibel er a Rekristiano el ua meldung er a ulaoch?

⁹ Engdi ngklengiterreng, e le cherengel a taem e a rebebil el ngar er a ongdibel a ulemuchel el olisechakl a klsuul el tekoi. (Rel. 20:29, 30; 2 Pe. 2:2, 3; Jud. 3, 4) Me a cherengel a taem e ngmlo mekngit a blekeradel el ngar er a ongdibel el rokir el tirka el klsuul el sensei a uchul. A Jesus a ulemlaoch el kmo, a utekengel a mera el osisechakl a melemolem el mo lmuut er a “ulebongel er a beluulchad.” (Mt. 13:37-43) Sera October er a rak er a 1914 e a Jehovah a rirellii a Jesus el mo King el mengedereder er a klechad. Me seikid e ngulemuchel a taem er a “ulebongel er a beluulchad” er a Satan.​—2 Ti. 3:1.

10. (a) A rengellitel el Kristiano te ulemerk a chais el kirel a oingera el rak? (b) Ngera dilubech er a October 1914 e kede mekerang e medengei?

¹⁰ Ngbetok er a 30 el rak er a uchei er a October 1914, e a rengellitel el Kristiano a ulemuchel el ouchais el kmo a Rengedel a Dios a mo omuchel el mengedereder er seikid el taem. Me a klemedengei er tir a mle ultuil er a ulochel a Daniel el kirel a kerrekar el miltuk e lmuut el duubech er a uriul er a “euid el rak.” (Dan. 4:16) A Jesus  a dirrek el milsaod er a olangch el mo meketeklii el mo er a redisaiplo er ngii el kmo, ngii a mla mo king me a uriul sils a mla omuchel. Me a tekoi el dilubech er a rak er a 1914 el mei a ochotii el kmo a Jesus a mla mo King. (Mt. 24:3, 7, 14; Lk. 21:24) Me chelechang e a “mengasireng el tekoi el bla leruul a Dios” el douchais er a rechad el kirel, a uldimukl er a tekoi el kmo, a Jehovah a mla rullii a Jesus el mo King er a Rengedel er a rak er a 1914.

11, 12. (a) Ngera dilubech er a rak er a 1919? (b) Ngera el tekoi a ulebeketakl er a rak er a 1935? (Momes er a siasing er a uchelel a suobel.)

¹¹ Sera 1914 er a bo le King a Jesus Kristus, e ngulemuchel el oltobed er a rengellitel el chedal er a “kloul Babilon,” el ngii aike el rokui el klsuul el klechelid. (Och. 18:2, 4, BT) Me a uriul er a bo lemerek a Kot el Mekemedil a Beluulechad, e ngar er sel rak er a 1919 e a rengellitel a mocha klou a ilmeklir el omerk er a klumech er a betok el beluu er a beluulechad. Te uluuchais er a rechad el kirel a Rengedel a Dios me a olubet el tenget el sebechel el mo uchul a osebelir. Me tiang a mlo uchul e a relmuut el betok el telael el chad a mlo medengelii a klemerang, e dirrek el mlengilt el mo king el mo mengedereder el obengkel a Kristus el ngar er a eanged.

¹² Sera 1935 e ngulebeketakl el kmo a Kristus a mla omuchel el mengudel er a ‘kuk bebil el sib’ er ngii. Me chelechang e te ngar er ngii a rebetok el miliol el ‘kuk bebil el sib’ el kiei er a bek el merekelel a beluulechad. Te oureor el obengterir a rengellitel el Kristiano el omerk er a klumech el oba blekeu, el di ua lurruul er ngii a Kristus. Tirka el kuk bebil el sib a dirrek el oumerang el kmo a olubet el tengetengel a Jesus a di ta el tekoi el mo uchul a osobel. Te medengei el kmo, a lsekum e te melemolem el omerk er a klumech e ousbech er a klengar er tir el meruul a soal a Jehovah, e ngsebechir el mo suobel er a “kloul ringel” e mo kiei er a beches el beluulechad er a Dios.​—Jn. 10:16; Och. 7:9, 10, 14, BT.

13. Kid el Sioning er a Jehovah kede kltmokl el mo mekerang, e mekerang a doukerebai er a rekot el Kristiano?

¹³ Kede oba ileakl el techall el mo ouchais er a rechad el kirel a “mengasireng el tekoi” el bla leruul a Jehovah me a telbilel el kirel a ngar medad el taem. Ngdiak el beot el tekoi a doruul er tia el ureor, e le te mo er ngii a rechad el chetirir el orrenges er kid me a lechub e te omtok er kid. Me a bo leuaisei, e ngsebeched el oukerebai er a apostol el Paulus me a rulebengkel. Ngdilu el kmo: “Te betok el chad a ulemtok er kemam e ngdi Dios er kid a silisiich a rengmam maki di uluuchais er kemiu er  tial Ungil Chais el mlar a Dios el mei.” (1 Th. 2:2) Ngkmal kired el otutii a telbilel a rengud el mo er a Dios. Ngdirrek el soad el mo Sioning el ouchais el kirel a Jehovah el mo lmuut er a bo lengemed tia el mekngit el beluulechad er a Satan. (Isa. 6:11) Engdi ngdiak el sebechel el di klisiched e doruul er tiang. Kede di ua tirke el kot el Kristiano el kired el olengit er a Dios me lebeskid a “klou el klisiich” el okiu a chedaol klisichel.​—Monguiu er a 2 Korinth 4:1, 7; Lk. 11:13.

14, 15. (a) Ngmle ua ngera omeruul el mo er a rekot el Kristiano, e milekerang a Petrus er a lolisiich er tir? (b) Ngera kired el melatk er ngii a lsekum a rechad a omtok er kid e le kid el Sioning er a Jehovah?

¹⁴ Chelechang e te betok el miliol a melekoi el kmo te Kristiano, engdi te meruul a tekoi el louketui a Dios me ngdiak loba kengei er ngii. (Tit. 1:16) Sera taem er a rekot el Kristiano e a ruumesingd el chad a dimlak longull er a Dios el ngar er a melemalt el rolel, e betok er tir a uluuketui er a remera el Kristiano. Seikid a uchul me a apostol el Petrus a dilu el kmo: “A lsekum kom motuub el ngklel a Kristus a uchul, e bo lungil a rengmiu.” E ngera uchul? E le te uleba kengei er a Dios me a chedaol klisichel.​—1 Pe. 4:14.

¹⁵ Me a Resioning er a Jehovah er chelechang te “motuub el ngklel a Kristus a uchul”? Ochoi, e le kid a diak di desioning el ouchais el kirel a Jehovah e kede dirrek el ouchais el kirel a Jesus, e olisechakl el kmo ngii a King er a Rengedel a Dios. A Jesus a dirrek el mlukcharm e le ngii el mle sioning el ouchais el kirel a Jehovah. Ngdilu er a rumtok el kmo: “Ak mlei el oba klisiich er omerreder er a Demak, e ngdi dimlak el somiu ngak.” (Jn. 5:43) Me a lsekum a rechad a mo omtok er kau e le kau el sioning, e lak mobes el kmo ke oba kengei er a Dios me a chedaol klisichel.

16, 17. (a) Ngua ngera uldesuir a rechedal a Jehovah el kirel a ureor er a berkel a klumech? (b) Kau ke kltmokl el mo mekerang?

¹⁶ Lak dobes el kmo a rebetok el meliuekl er a beluulechad a dirk merael el me soiseb er a klemerang. Me alta kede kiei er a beluu el mla mo betok el rak el domerk er a klumech er ngii, engdi te dirk ngar er ngii a resemeriar el orrenges er a ungil chais. Me sel debetik er tir, e dolasem el lmuut el mong e domuchel a omesubel a Biblia el obengterir. Seikid e kede ngosuterir el mo medengelii a Jehovah me ngmo sebechir el tuib a rengrir el mo er Ngii e mo metecholb. Ngua ngera uldesuem sel moruul er tia el ureor? A Sarie er a beluu er a South Africa el mla Sioning er a Jehovah el betok er a 60 el rak a kmo: “Ak kmal mereng a saul e le olubet el tengetengel a Kristus a uchul me ngar er ngii a ungil el deleuill er ngak me a Jehovah, el ngii a Ngarbab el Merreder er a eanged me a chutem. Ngdirrek el dmeu a renguk el ouchais el kirel a kebkall el ngklel.” Ngii me a bechil er a Martinus a mla ngosuterir a retedei el ngelekir me a relmuut el betok el mo mengull er a Jehovah. Ngdirrek el dilu el kmo: “Ngdiak a tekoi el sebechel el mekesiur a deurreng el mei el okiu tia el ureor, e dirrek el okiu a chedaol klisichel a Jehovah e ngmeskid a klisiich me ngsebeched el melemolem el meruul er tia el ureor el uchul a osobel.”

¹⁷ Me alta e kede mla metecholb me a lechub e ngdirkak, engdi kid el rokui a kired el mereng a saul el kirel a techelled el mo teloi er a Resioning er a Jehovah. Misei e molemolem el ouchais el kirel a Jehovah el obengterir a rechedal, e mongikiid er kau er a ngii di el tekoi er tia el beluulechad er a Satan. Sel moruul er tiang, e ke mo kobkellii a Demad el ngar er a eanged el Jehovah el kid a omtechei er ngii.