1. Ngmekerang a babier er a Levitikus e ngosukid?

 A JEHOVAH a soal a rokui el mesiungel a bo lechedaol. Me alta e a cheledaol a losaod er ngii a Biblia el rokir, engdi tia el blekeradel a losaod er ngii a babier er a Levitikus el kmal betok el taem. Me a bo donglou er a klemedengei me a omereng el saul er kid el kirel tia el babier, e ngmo ngosukid el mo medengei el kmo kede mekerang e mo chedaol.

2. Ngera kede metik el ngar er a babier er a Levitikus?

² A Levitikus el lulluches er ngii a Moses a tedebechel a “chedaol Llechukl,” el “kired el olab el olisechakl.” (2 Ti. 3:16) A ngklel a Jehovah a medung el bekord el teruich el taem el ngar er a bek el bliongel er tia el babier. Me a bo dodengelii a babier er a Levitikus e ngmo smisichid el mo diak doruul a ngii di el ngerang el mo uchul a otuub el mo er a ngklel a Dios. (Lev. 22:32) A tekoi el kmo, “Ngak a RUBAK,” el medung el betok el taem el ngar er tia el babier, a dirrek el omeklatk er kid el mo olengesenges er a Dios. Me ngar er tia el suobel me a ongingil, e kede mo mesuub a bebil el meklou a belkul el tekoi el debetik er tia el babier er a Levitikus, el ngii a sengk el mla er a Dios el ngosukid el mo chedaol a omengull er kid el mo er ngii.

3, 4. Ngera ngulemtechei er ngii a omengikiid er a Aron me a rengelekel el sechal? (Momes er a siasing er a uchelel a suobel.)

³ Monguiu er a Levitikus 8:5, 6. A Jehovah a ngileltii a Aron el mo ngarbab el prist er a Israel, me a rengelekel me te dirrek el mlo prist er tia el renged. A Aron a omtechei er a Jesus, e a rengelekel el sechal a omtechei er a rengellitel el Kristiano. Me ngera ngomtechei er ngii a omengikiid er a Aron? Tiang mle belkul a kmo a Jesus a mle kirel el mekikiid? Ngdiak. A Jesus a dimlak a kngtil e mle “klikiid.” (Heb. 7:26; 9:14) Me a uriul er a lemekikiid a Aron e ngulemtechei er a Jesus el ngii a klikiid e melemalt. E kuk ngera ngomtechei er ngii a omengikiid er a rengelekel a Aron el sechal?

⁴ A omengikiid er a rengelekel a Aron a omtechei er a omengikiid er tirke el milengilt el mo prist er a eanged. Me tia el omengikiid ngdi osisiu ngii me a techolb el lengiluu a rengellitel? Ngdiak, e le techolb a diak longeroid a klengit, e ngbai olechotel a kmo a chad a mla tibir a rengul el mo mesiou er a Dios. A rengellitel a mekikiid “el oeak a tekingel” a Dios, me ngkirir el mui el oltirakl a osisecheklel a Kristus er a chelsel a klengar er tir. (Efe. 5:25-27) Me tiang a uchul e te mo chedaol e klikiid. Engdi te mekerang a ‘rekuk bebil el sib’?​—Jn. 10:16.

5. Ngera me ngsebeched el melekoi el kmo a rekuk bebil el sib a mekikiid el oeak a Tekingel a Dios?

⁵ A rengelekel a Aron a diak lomtechei er a rekuk bebil el sib. (Och. 7:9) Me nguaisei, engdi a rekuk bebil el sib a dirrek el mekikiid e mechedaol el oeak a Tekingel a Dios. Me tirke el oba omelatk el mo kiei er tia el chutem sel bo loumerang aike el ledung a Biblia el kirel a klisichel a tengetengel a Jesus, e ngsmisicheterir el mo mengull er a Jehovah “er a llomes ma klebesei.” (Och. 7:13-15) Tia el omengikiid er a rengellitel me a rekuk bebil el sib a dirk melemolem, el uchul me a omerellir a di klikiid er a bek el taem. (1 Pe. 2:12) A Jehovah a dmeu a rengul sel leseterir a rokui el chedal el klikiid, e ta rengrir, e blak a rengrir el olengesenges er a Mengkerengir el Jesus!

6. Ngera uchul me ngkired el blechoel el merriter er kid?

⁶ A reprist er a Israel a mle kirir el klikiid a bedengir er a bek el taem. Me tia ngera belkul el kired er chelechang? A rebetok er tirke el mesuub er a Biblia el obengked a mesekid el kltmokl e beches a bedenged, me a basio er a omengull er kid me ngdirrek el di kltmokl. Me a lmuut el tang, a chad el soal el mesiou er a Jehovah a dirrek el kirel el mo ‘klikiid a uldesuel.’ (Monguiu er a Psalm 24:3, 4; Isa. 2:2, 3.) Me ngkired el mesiou er a Jehovah el klikiid a uldesued me a rengud me a dirrek el bedenged. Me a leuaisei, ngkired el blechoel el merriter er kid. A lebebil er a taem e kede mo medengei el kmo ngar er ngii a meklou el tekoi el kired el melodech me bo el sebeched el mo chedaol. (2 Ko. 13:5) El uai tiang, a mla metecholb el chad el omes a siasing er a remeau a kirel el di ngii el oker el kmo, ‘A omerellek ngochotii el kmo ak chedaol?’ Me a leuaisei, ngkirel el mo osiik a ngeso me bo el sebechel el torebengii tia el kikiongel el omerellel.​—Jak. 5:14.

7. Ngera el kerebai el lulechotii a Jesus a osisiu ngii me a omerellir a reprist el losaod er tir a Levitikus 8:​22-​24?

⁷ Sel taem er a bo lemechedaol a reprist er a Israel, e a rsechel a sechal el sib a mle kirir el locha er a chelebedel a klisichel a dingal, me a kadekmel a bechos er a chimal me a ochil a Ngarbab el Prist el Aron me a rengelekel. (Monguiu er a Levitikus 8:22-24.) Me tia el omeruul a ulechotii el kmo a reprist a  mo oba blekongesenges el oltaut a ngerechelir. Me ngar er a osisiu el rolel, e a Jesus el ngii a Ngarbab el Prist, a ulechotii a cherrungel el kerebai el kirir a rengellitel me a rekuk bebil el sib. Ngmle kerekikl el orrenges a ulekrael er a Jehovah, e mirruul a soal, e uleltirakl er a chedaol el rolel a klengar.​—Jn. 4:31-34.

8. Kid el rokui ngera kired el meruul er ngii?

⁸ Me kid el rokui el mesiungel a Jehovah a kired el mo oltirakl er a kerebil a Jesus el millemolem el blak a rengul el mo er a Dios. Ngkired el mo kerekikl el oltirakl a ulekrael er a Dios el debetik el ngar er a Biblia, me lak bo luchul e domtok er sel chedaol klisichel. (Efe. 4:30) Me ngkmal kired el mo blak a rengud el ‘omeklemalt a roled.’​—Heb. 12:13.

9. Ngera te dilung a retedei el odam el oureor el obengkel a Chelechad er a Ruungerachel, e mekerang a tekingir e ngosukau el mo chedaol?

⁹ Me bo donguiu a tekingir a retedei el odam el mla mo betok el rak el oureor el obengkel a Chelechad er a Ruungerachel. A ta er tir a kmo: “Alta e tiang a ileakl el techall er a omesiou, engdi cherengel a taem e tia el kmes el deleuill er ngak el obengterir a mlo uchul e ak mlo medengei el kmo, tirka el ngellitel el odam a diak lemecherrungel. Me nguaisei, engdi a ta er a turrekong er ngak er a chelsel aika el betok el rak a mo olengesenges er tirka el oungerachel.” A ongeru el odam a kmo: “A bades el uai a 2 Korinth 10:5 el melisiich er kid el ‘mo oltirakl er a Kristus,’ a ngilsukak el mo bekongesenges e olengeseu er tirka el olab a ngerachel. Tiaikid a blekongesenges el mera el ngar er a renguk el mei.” A ongedei el odam a kmo: “A lsekum ngbetik a rengud er aike el tekoi el lebetik a rengul er ngii a Jehovah, e ouketui aike el louketui, e dirrek el blechoel el osiik a ulekrael er ngii e meruul aike el lodeuir a rengul, e kede mo olengesenges er a cheldebechelel me tirke el lousbech er tir a Dios el meruul a urerel er tia el chutem.” Ngika el odam a dirk melatk er a kerebil a Nathan Knorr, el ngii a mlo chedal a Chelechad er a Ruungerachel. A Brother Knorr a kilengei a omesodel a suobel el “Cherellel a Renged” el mla er a Ongkerongel er a 1925, alta e a rebebil a dimlak lekengei er a omesodel tia el suobel. Me ngika el odam a kmal mlo soal a blekongesenges er ngii. Me sel molebedebek aika el tekingir tirka el tedei el odam e ngsebechel el ngosukau el mo olengesenges er a Dios e melemolem el chedaol.

10. Ngua ngera klungel a ultutelel a dolengesenges er a llechul a Dios el kirel a rasech?

¹⁰ Monguiu er a Levitikus 17:10. A Jehovah a milellach er a rechad er a Israel me lak ‘longa rasech.’ A Rekristiano a dirrek el mluklatk el kmo ngkirir el omekiai a rsechel a chad me a charm. (Rel. 15:28, 29) Me ngmeringel er kid el melatk el kmo kede mo meruul a tekoi el mo uchul me a Dios a otngeklid e otebedid er a ongdibel er ngii. Ngbetik a rengud er a Jehovah e kmal soad el olengesenges er ngii. Me ngmo lmuut er a bo docherur a kodall, e ngdiak dekengei el oridii a blakerreng er kid a lsekum a chad el diak lodengelii a Jehovah me a lechub e ngdiak loltirakl a llechul, a orrimel er kid el mo diak dolengesenges er Ngii. Kede medengei el kmo a rebebil a mo melenguul er kid e le ngdiak dekengei a oidel a rasech, engdi kid a ngiltii el olengesenges er a Dios. (Jud. 17, 18) Me ngera mo ngosukid el mo ulterekokl a rengud el diak donga rasech me a lechub e dekengei a oidel a rasech?​—Dut. 12:23.

11. Ngera me ngsebeched el kmo a tekoi el mileketmokl er a Sils er a Tngakireng a meklou a belkul?

¹¹ Aike el lurruul a ngarbab el prist el ta el  taem er a ta el rak er a Sils er a Tngakireng a ngosukid el mo medengelii a osengel a Dios el kirel a rasech. A rasech a luluusbech er ngii el di kirel a ileakl el tekoi. A usbechel a mle kirel a klausubes er a klengit me bo lsebechir a rechad er a Israel el mo budech a deleuill er tir me a Dios. A rsechel a kerbou me a kaming a lulliim er medal a dengebel a Blil a Telbiil. (Lev. 16:14, 15, 19) Me tia el omeruul a mlo uchul e a Dios a uluusubes a kngterir a rechad er a Israel. A Jehovah a dirrek el dilu el kmo a lsekum a chad a milekodir a charm el kirel el mo kall, e a rsechel a kirel el mo moitel er a chutem e medakl, “ele rasech a klengar er a bek el outeliil.” (Lev. 17:11-14) Aika el omeruul a kmal mle meklou a belkul. A betok el dart el rak er a uchei, e a Dios a ulekebai er a Noah me a rengelekel er a omenga el rasech. (Gen. 9:3-6) Me tiang ngera belkul el kirir a Rekristiano?

12. Ngerang dilung a Paulus el kirel a klisichel a rasech?

¹² A apostol el Paulus a milsaod el kmo a rasech a ngar er ngii a klisichel el mengikiid er a ledu el kmo: “A doltirakl a Llach, e a bek el tekoi a oumesingd el mekikiid er a rasech, ma lak le tobed a rasech e ng diak le mengubet a klengit.” (Heb. 9:​22) Me nguaisei, engdi a kerresel a tenget el charm a di mle tedeb. Me a Paulus a milsaod el kmo, aika el tenget a ulemeklatk er a rechad er a Israel el kmo te mla er a klengit, me te uluusbech er a lmuut el klou el tenget el mo cherrungel el choroid a kngterir. A Llach a “diak le bleketakl el okesiul a klungiaol el dirk merael el mei; ng diak le cherrungel el okesiul ngii el klungiaol.” (Heb. 10:​1-4) Me ngmekerang e musubes a klengit?

13. Ngera belkul er kau a omerellel a Jesus er a lenguu a kerresel a rsechel el msa Jehovah?

¹³ Monguiu er a Efesus 1:7. A Jesus a mlad el kirir a rokui el chad, me a kodellel a kmal klou a belkul el kirir tirke el betik a rengrir er ngii me a Demal. (Gal. 2:20) Me nguaisei, engdi a tekoi el rirellii a Jesus er a uriul er a lebekiis er a kodall a ulsebelid er a klengit. Me a tekoi el mileketmokl er a Sils er a Tngakireng a di mle okesiul tia el tekoi. A ngarbab el prist er sera bo lesiseb er a Kmal  Chedaol Delemerab, e ngdi ua blo lesiseb el mo er a medal a Dios. Ngmla er tiaikid el basio, e a prist a uldersii a rsechel a charm el mo er a Dios. (Lev. 16:11-15) Me ngdi osisiu, a uriul er a lebekiis a Jesus e ngmlo soiseb er a eanged e uldersii a kerresel a rsechel el mo er a Dios. (Heb. 9:6, 7, 11-14, 24-28) Me kede oba omereng el saul e le ngsebechel el musubes a kngtid e mo klikiid a ukltked el okiu a klaumerang er kid er a tengetengel a Jesus!

14, 15. Ngera uchul me ngklou a ultutelel a bo dodengei e doltirakl er a llechul a Jehovah el kirel a rasech?

¹⁴ Me chelechang e nglocha mla mo bleketakl er a rengum el kmo ngera uchul me a Jehovah a mellach er kid me lak donga ngii di el rasech. (Lev. 17:10) Ke medengei el kmo ngera uchul me a rasech a chedaol er a osengel a Dios? A rasech a omtechei er a klengar. (Gen. 9:4) Me ke ulterekokl el mo kongei el kmo ngkired el oba osengel a Dios el kirel a rasech e olengesenges er a llechul el mo mengeroid er kid er a usbechel. Me a di ta el rolel e ngmo budech a deleuill er kid me a Dios a bo doumerang er a olubet el tengetengel a Jesus, e bo dodengei el kmo a rasech a kmal mekreos er medal ngike el Ulemeob er kid.​—Kol. 1:19, 20.

¹⁵ Me kid el rokui a sebeched el mo chelebangel er a bkaischemrungel el omelilt er a kmo kede mo kongei er a oidel a rasech, kar el ngar er ngii a dertelngimech el klekedellel a rasech er a chelsel, me a lechub e ngrolel a ukeruul el ousbech a rasech. Me a leuaisei, ngklou a ultutelel el moluluuch el mo er a Jehovah, e moruul er a dmolech el omesuub el kirel, e bo lulterekokl a rengum el kirel a tekoi el bo mngiltii er a uchei er a ledubech a bkaischemrungel el tekoi. A omoruul el uaisei, e ngmo sebechem el omekiai a rasech. Ngkmal diak el soad el rullii a Jehovah me bo lak el deu a rengul sel dekengei er a tekoi el omtok a llechul! Chelecha el sils e a rebetok el toktang me a rekuk bebil a melisiich er kid el mo kongei me lemengai a rseched el bo lousbech el olsobel a klengar er a uriul. Engdi kid a rechedaol el chedal a Jehovah a medengei el kmo, Ngii a ngar er ngii a llemeltel el olterekokl er a usbechel a rasech. Ngomes er a rasech el chedaol. Me ngkired el tibir a rengud el mo olengesenges er a llechul el kirel a rasech. Me a klikiid el omerelled a ochotii el mo er a Dios el kmo kede omes er a tengetengel a Jesus el mekreos. E le ngdi ta el rsechel a meskid a klausubes er a klengit me a diak a ulebengelel el klengar.​—Jn. 3:16.

16. Ngera uchul me a rechedal a Jehovah a kirir el mo chedaol?

¹⁶ A Jehovah er sera lotebedeterir a rechad er a Israel er a klsibai er a Ekipten, e ngdilu er tir el kmo: “Ngak a RUBAK el ngilikemiu el otebedemiu er a beluu er a Ekipten el mo Dios er kemiu; misei e bo mchedaol ele ngak a chedaol.” (Lev. 11:45) A Jehovah a mle soal a rechad er a Israel a bo lechedaol e le ngii a chedaol. Me a Jehovah me ngdirrek el soal a osisiu el tekoi el kired er chelecha el taem. A babier er a Levitikus a ungil el meketeklii tia el tekoi.

17. Me ngua ngera uldesuem er chelechang el kirel a babier er a Levitikus?

¹⁷ Me ke ulterekokl el ngilai a klubelem er aika el tekoi el bla desaod er tia el suobel. Me ke locha mla lmuut el mo oba omereng el saul el kirel tia el babier er a Levitikus e mla mo ungil medengelii a uchul me ngkired el mo chedaol. Engdi ngera lmuut el bebil er a tekoi el sebeched el suub er a Levitikus? E mekerang e tia el babier a ngosukid el mo klikiid a omengull er kid el mo er a Dios? Kede mo mesaod aika el tekoi er a ongingil el suobel.