1. Ngua ngera uldesuir a rebetok el chad el kirel aike el tekoi el ngar er ngii er tir?

 A LEBEBIL er a taem e a rechad a diak loba omereng el saul el kirel aike el ngar er ngii er tir, engdi te mo ouuchel a rengrir sel bo lak er tir. Tia ngmla ta el duubech el eko er kau? A rebebil el mlukeroul er a chelsel a merau el telungalek a locha sebechir el mo diak loba omereng el saul el kirel aike el rokui el ngar er ngii er tir. Me a rengeasek a locha diak lungil el medengei el kmo ngerang a meklou a ultutelel el tekoi er a klengar e le ngdirkak a kmal klemedengei er tir er a klechad.

2, 3. (a) Ngera el uldasu a kirir a rengeasek el mengeroid er tir er ngii? (b) Ngera sebechel el ngosukid el mo oba omereng el saul el kirel aike el ngar er ngii er kid?

² Me kau el ngeasek, ngera sel kot el klou a ultutelel el tekoi er a klengar er kau? A rebetok el ngeasek a ngmai a klalo el mo er uchei er a rokui el tekoi. Ngsorir a lebo er ngii a ungil el urerir, ungil el blirir, me aike el kot el beches el klekedall el ua computer. Me a lsekum te di mo mechesang er aika el tekoi, e ngbelkul a kmo ngar er ngii a olengesonges er a klengar er tir. E tiang a sel deleuill er tir me a Dios, el ngii a kot el klou a ultutelel el tekoi er a klengar. Me a lsekum ke mlukeroul el ngelekir a Rekristiano, e  ke mla nguu a dikesem er a Dios el ngii a kot el ungil el sengk. (Mt. 5:3) Me sel bo lak moba omereng el saul el kirel tia el dikesem er a Dios e ngulterekokl el kmal mo klou a telemellel a klengar er kau.

³ Engdi a klengar er kau a sebechel el diak bo lechelebangel er tia el tekoi. Kede mo mesaod a bebil el cheldecheduch er a Biblia el sebechel el ngosukau el mo oba omereng el saul el kirel tia el dikesem er a Dios. Aika el tekoi el dilubech a diak di lolengeseu er a rengeasek e lemerekong, e ngdirrek el ngosukid el rokui el mo oba omereng el saul el kirel aike el tekoi el bla lebeskid a Jehovah.

4. Ngua ngerang a omesodel a 1 Samuel 8:1-5 el kirir a rengelekel a Samuel?

⁴ A Biblia a omasech a ngklir a rebebil el ngiluu a mekreos el diukes er a Dios e dimlak loba omereng el saul el kirel. A profet el Samuel a ulemuchel el mesiou er a Jehovah er a taem er a klengeasek er ngii, e millemolem el blak a rengul el mo er Ngii. (1 Sa. 12:1-5) Ngkmal mle ungil el kerebai, engdi a rengelekel el Joel me a Abia a dimlak le uai ngii, te bai kmal mle mekngit a blekerdelir.​—Monguiu er a 1 Samuel 8:1-5.

5, 6. Ngmlo ua ngerang a klengar er a rengelekel a Josia me a ta el ngelekel a ngelekel el sechal?

⁵ A resechal el ngelekel a King el Josia a dirrek el mle mekngit a blekerdelir. Ngika el Josia a kmal mle betik a rengul e mle blak a rengul el mengull er a Jehovah. Me sel taem er a lebetik er a Babier er a Llach e lemechuiu er medal e ngmlo oltaut aika el tekingel a Jehovah. Ngmlo kikidii a beluu er a ngii di el tekoi er a olai me a omengull el bleob el chelid e milengelechel er a rechad me te mlo olengesenges er a Jehovah. (2 Ki. 22:8; 23:2, 3, 12-15, 24, 25) Me a rengelekel a ngilai a kot el ungil el dikesir er a Dios! Me nguaisei, engdi tirka el tedei el ngelekel me a ta el ngelekel a ngelekel el mlo king er a uriul a kmal dimlak a ta er tir el olecholt a omereng el saul el kirel aika el dikesir.

⁶ Sera bo el king a ngelekel a Josia el Joahas e ngdi “merruul a mekngit el omtok er a RUBAK.” Ngdi mle edei el buil el longedereder e a ta er a king er a Ekipten a ngiluu el mo kelebus, me ngdi mle kelebus el cheroid er a belual el mo lmuut er a kodellel. (2 Ki. 23:31-34) E sola e a ta er ngii el Jehoiakim a milengedereder el 11 el rak. Ngdirrek el dimlak loba omereng el saul el kirel a dikesel er a demal. Ngkmal mle imis el mekngit a omerellel a uchul me a Jeremia a milsaod er ngii el kmo: “Ng mo medakl el ua lolakl a donkey.” (Jer. 22:17-19) A lmuut el ta er a ngelekel er a Sedekia me a ngelekel a ngelekel er a Jehoiakin a dirrek el kmal mle mekngit a blekerdelir e dimlak loukerebai er a blakerreng er a Josia.​—2 Ki. 24:8, 9, 18, 19.

7, 8. (a) Ngmilekerang a Salomon e oridii a dikesel er a Dios? (b) Ngera kede suubii er a blekerdelir tirke el ngar er a Biblia el urriid a dikesir er a Dios?

⁷ A King el Salomon a silubii a rolel a omesiou el mo er a Jehovah el okiu a demal el David, engdi uriul e ngmlo diak loba omereng el saul el kirel a dikesel el lebilsang a Dios. E le “ser a le chudelang, e a re bechil a mla meltii a rengul el mo oltirakl a ngodech el chelid. Ng mlo diak le blak a rengul er a RUBAK el Dios er ngii. Ng dimlak le ua demal el David el mle blak a rengul.” (1 Ki. 11:4) Me a omerellel a mlo uchul e a Jehovah a ultngeklii.

⁸ Me tirka el rokui a mla er ngii a techellir el mo ungil el medengelii a Jehovah e mo meruul a llemalt. Engdi ngklengiterreng e le te urriid ngii el techellir. Me nguaisei, engdi ngdiak el rokui el ngeasek a oriid a dikesir er a Dios. Chelechang e kede kuk mo mesaod a ungil el omerellir a rengeasek el sebechem el oukerebai.

9. Te milekerang a rengelekel a Noah e ochotii a kmal ungil el kerebai el kired? (Momes er a siasing er a uchelel a suobel.)

⁹ A rengelekel a Noah a ulechotii a kmal ungil el kerebai el kired. Ngmla er ngii a techellir el mo olengeseu er a demerir el meleketek er a arhe el mo uchul a osebelir a rechad. Te mle ungil el medengei el kmo ngkirir el olengesenges er a Jehovah e mo soiseb er a arhe er a uchei er a lomuchel a Ieleb. (Gen. 7:1, 7) Me ngera mlo rsel? A Genesis 7:3 a mesaod el kmo te ulsiseb a charm er a chelsel a arhe me ‘lak le mad e lluut el mo omechell el ngar a beluulchad.’ Tirka el ngelekel a Noah a uleba omereng el saul el kirel a dikesir me ngmlo er ngii a techellir el osebelii a klechad, e dirrek el ullengeseu el toketekii a mera el omengull er tia el chutem.​—Gen. 8:20; 9:18, 19.

10. Te milekerang a reteua el buik er a Hebru e ochotii el kmo te uleba omereng el saul el kirel a dikesir er a Dios?

¹⁰ A betok el dart er a rak er a uriul e a reteua el buik er a Hebru el Hanania, Misael, Asaria, me a Daniel a dimlak lekengei el mo oltirakl a rolel a klengar er a beluu er a Babilon. Te mludechem e milengai el mo blebaol er a Babilon er a rak er a 617 er a uchei er a Kristus. Tirkang a kmal mle ungil sechal e mellomes a rengrir, me ngmla er ngii a techellir el mo ungilbesrir er tia el beluu. Engdi ngkmal dimlak lobes a tekingel a Dios el lesiluub er a dirk lemekekerei, e dirrek el mle ungil el medengei el kmo te chedal techang. Me a omerellir a mlo uchul me a Jehovah a kmal ulemekngeltengat er tir.​—Monguiu er a Daniel 1:8, 11-15, 20.

11. Te milekerang a rechad e ngmai a klungiolir er a diukes el lengiluu a Jesus?

¹¹ A Jesus a ngike el kot el ungil el kerebai el ulechotii a omereng el saul er ngii el kirel a dikesel er a Dios. Ngkmal mle betik a rengul er aike el tekoi el lullisechakl er ngii a Demal. Tiang a ulebeketakl er sera ledu el kmo: “Ak bai di melekoi a ikel lulsisecheklak a Chedam.” (Jn. 8:28) Ngmle dmeu a rengul el ouchais er a rechad el kirel aike el lesiluub me bo lengai a klungiolir er ngii. Ngdilu el kmo: “Ngak a dirrek el kirek el olisechakl er a Ungil Chais er a Rengedel a Dios er a ikel bebil er a beluu, ele tiaikid a lulderchak a Dios el me meruul er ngii.” (Lk. 4:18, 43) Tia el beluulechad a diak loba omereng el saul el kirel a klemerang el tekingel a Dios, seikid a uchul me a Jesus a milengelechel er a redisaiplo er ngii me lak bo el “chedal a beluulechad.”​—Jn. 15:19.

12. (a) Ngoeak a ngera el rolel e a 2 Timothy 3:14-17 a melutk el kirir a rengeasek er chelechang? (b) Ngera el ker a kirir a rengeasek el Kristiano el melatk?

¹² A lsekum a demam me a delam a betik a rengrir er a Jehovah e ke mla nguu a dikesem er a Dios. A tekoi el medung er a Biblia el kirel a Timothy a dirrek el sebechel el melutk el kirem. (Monguiu er a 2 Timothy 3:14-17.) Te mla osisecheklau el kirel a Jehovah me sel rolel e ke mo odeuir a rengul. Te locha ulemuchel el olisechakl er kau er sera dirk mtolechoi. Tiang a kmal mla “mekllemesii a rengum e orolau el mo oumerang er a Kristus Jesus” e mo “ungil kldmokl” el mesiou er a Dios. Engdi kau, ke mera el oba omereng el saul el kirel aike el ngar er ngii er kau? Di lekau el oker: ‘Ngua ngera uldesuek el kirir tirke el betok el sioning el milsiou er a Dios er a uchei er a kmechell? Ngak ngdmeu a renguk el ta er a Sioning er a Jehovah? Ngua ngera uldesuek e le ngak el ta er tirke el mekesai el chad el okedongall el sechelil a Dios? Ak melechesuar a klungel a ultutelel a ileakl el techall el kubang?’

13, 14. Ngsorir el mekerang a rebebil el mlukeroul er a klemerang? E ngera me ngklebelung a lsekum te mo meruul? Mosaod er a tekoi el dilubech.

¹³ A rebebil el ngeasek el mlukeroul el  ngelekir a Rekristiano a diak lesa sel klebekelel a klemerang e dirrek el diak lodengelii sel klikingelel a beluulechad er a Satan. Me a rebebil a locha oureng el mo mengarm er a rolel a klengar er a beluulechad. Engdi kau ngsoam el mo dechor er a medal a remurt el mlai e le ngsoam el mo medengelii a ringelel, e mesang el kmo ke mad me a lechub e ngdiak? Tiang a kmal klebelung el tekoi! Me ngdiak a ultutelel el bo molasem a mekngit el tekoi er tia el beluulechad e le ngdi soam el mo ungil el medengelii a ringelel.​—1 Pe. 4:4.

¹⁴ A Gener el kekerei el chad er a beluu er a Asia a mlukeroul er a klemerang, e mlo metecholb er a bo el 12 a rekil. Engdi a uriul e ngmlo soal el mengarm er a rolel a klengar er a beluulechad e le ngulemdasu el kmo ngmo metik er a ilmokl. Ngulemuchel el omulak er a rechad er a blil e omart a tekoi er tir. Me sera bo el 15 a rekil e ngmla mo meruul a betok el mekngit el tekoi el loruul a resechelil el melim e melius. Ngdi mlo blechoel el me remei er a mla mo osoi e le ngousekool a tamaski me a video game el melisiich a uldikel. A cherengel a taem e ngmlo melechesuar el kmo a tekoi el loruul a dimlak lerellii el mo dmeu a rengul e ua lengar er ngii a olengesonges er a klengar er ngii. Me chelechang e ngmla lmuut el me soiseb er a klemerang. A lebebil er a taem e ngmelekoi el kmo ngdirk mo oureng a bebil el tekoi er a beluulechad engdi a kmes el deleuill er ngii me a Jehovah a lmuut el klou a ultutelel er ngii.

15. Ngera kirir a rengeasek el melatk alta e te dimlak lemukeroul er a klemerang?

¹⁵ Me alta e a rechad er a blim a kuk diak lengar er a klemerang, engdi ka di molatk er sel ileakl el techellem el mo medengelii e mo mesiou er ngike el Ulemeob! Ngar er a delongelir a rebetok el biliol el ngar tia el chutem e a Jehovah a kmal dmeu a rengul el ochotii er kau. Tiang a mera el klengeltengat! (Jn. 6:44, 45) Me ngkmal dmeu a rengud el medengelii a klemerang alta e kede silubii er a rechad er a blid me a lechub e ngdiak. (Monguiu er a 1 Korinth 2:12.) A Gener a dmu el kmo, “Ngak ak techang me a Jehovah el ngike el Ouklalo er a eanged me a chutem a kirel el medengelkak?” (Psa. 8:4) A ta er a odos er kid a kmo: “A rengalek er a skuul a kmal dmeu a rengrir sel sekum a sensei a medengelterir. Me ngmera el ileakl el techall a dobang e le Jehovah el ngike el Kot el Ngarbab el Sensei a ungil el medengelkid!”

16. Ngera el omelilt a ungil el kirir a rengeasek el Kristiano?

¹⁶ Bo mungil el melatk er tia el klebokel el dikesem e mrellii a turrekong er kau el mo mesiou er a Jehovah. Bo moukerebai er tirke el mle blak a rengrir el mesiungel a Dios er a irechar. E lak bo mua ruumesingd el mekekerei el chad er a beluulechad el di mechesang a chelsengsang el tekoi e dirrek el diak a omeltkir el kirel a ngar mederir el klebesei.​—2 Ko. 4:3, 4.

17-19. Ngera me nguchul a llomeserreng a bo dengodech er a rechad er a beluulechad?

¹⁷ Ngmera el tekoi, ngdiak lebeot el derellid el mo ngodech er a rechad er tia el beluulechad. Engdi tiang a rolel a llomeserreng. Ka di molatk er a chad er a klekool el kirel mo meduch el ousekool me bo el sebechel el mo er a Olympic. Ngkirel el meruul a blekerdelel el mo ngodech er a resechelil me bo el sebechel el rullii tia el turrekong er ngii. Ngkirel el mengeroid er ngii er a betok el tekoi el sebechel el mengesadel a temel e mengesang er ngii. Me ngkongei el mo ngodech er a rebebil me bo el sebechel el otutii a moktek er ngii.

¹⁸ A remesiungel a Jehovah a ngodech er a ruumesingd el chad er tia el beluulechad el tir a diak lolatk el kirel a tellemall el mo er ngii el okiu a omerellir. Me a lsekum kede mo ngodech er tir e mengeroid er kid er a tekoi el ua deleboes el omeruul, el sebechel el tomellii a deleuill er kid me a Jehovah, e seikid e ngmo sebeched el “nguu a klengar, el meral klengar.” (1 Ti. 6:19, BT) A odos el dulsaod er ngii er a uchei a kmo: “Ngkmal mo dmeu a rengum a lsekum ke dechor el kirel a klaumerang er kau. Ngmo meketeklii el kmo ke kltmokl el mesebechakl er a klaumerang er kau e mo ngodech er tia el beluulechad er a Satan. E sel kot el ngaruchei er ngii a di ua omomes er a Jehovah el Dios el kmal dmeu a rengul el ngellomel er kau! Tiaikid a rullau me ngungil a rengum el ngodech er a rechad!”

¹⁹ A klengar a mo diak a belkul a lsekum ke di melatk a soam er chelechang. (Oli. 9:2, 10) Kau a ungil el medengelii a moktek er a klengar, e ngar er ngii a techellem el mo kiei el diak a ulebengelel. Tiaikid a ngosukau el mo ungil el melilt a tekoi el moruul me lak bo mua “teletelir a re diak loumera er a Dios.” E seikid e ngmo er ngii a belkul a klengar er kau.​—Efe. 4:17; Mal. 3:18.

20, 21. Ngmo ua ngerang a klengar er kid er a ngar medad a lsekum kede mo ungil el melilt a tekoi? Engdi ngera ngmengerechir er ngii a Jehovah?

²⁰ Sel bo dungil el melilt a tekoi e ngmo dmeu a rengud er chelechang, e dirrek el sebeched el mo kiei el diak a ulebengelel er a chelsel a beches el beluulechad. E a Jehovah a kmal mo omekngeltengat er kid el olsesibes. (Mt. 5:5; 19:29; 25:34) Me nguaisei, engdi aika el klengeltengat a diak lomesterir a rebek el chad. Ngbai di omesterir tirke el olengesenges er ngii. (Monguiu er a 1 Johanes 5:3, 4.) Me alta tiang a diak el beot, engdi a lsekum ngmo blak a rengud el mesiou er Ngii er chelechang e ngkmal diak bo douuchel er a rengud er a uriul!

²¹ A Jehovah a mla meskid a kmal betok el klungiaol. Ngar er ngii a melemalt el klemedengei er kid er a Biblia me kede ungil el medengelii a klemerang el kirel a Dios me a moktek er ngii. Kede dirrek el oba ileakl el techall el mo okedongall el Sioning er a Jehovah. E Ngii a tibir el kmo ngmelemolem el mesebechakl e olengeseu er kid. (Psa. 118:7) Mada kid el rokui el meklou me a remekekerei bo dolemolem el olecholt a omereng el saul el kirel a dikesed er a Dios e dochotii el kmo ngmera el soad a “klebkall le bor ngii el mo cherechar.”​—Rom 11:33-36; Psa. 33:12.