OMESODEL A SUOBEL ER A MEDAL TIA EL BABIER | A ULEBONGEL NGKMEDANG?

Te Betok A Mo Suobel​​—​kau Me Ngsebechem El Mo Ta Er Tir

A Biblia a ouchais el kirel a ulebongel el kmo: A “chelebuul el mor ngii er isei a kuk mo klou er a ikel mla ngar ngii el chelebuul er ser a lomuchel a beluulchad el me lmuut er chelechang. . . . E ngdi Dios a mla kosadel a ikel sils; ele chomko ng dimlak le kesadel, e ng diak a chad el mo suobel.” (Mateus 24:​21, 22) Me a Dios a tibir el kmo te betok a remo suobel. “A beluulchad . . . a di mei el remiid; e ngdi ngikel meruul a ikel odeuir a rengul a Dios a di melemolem er a klengar er ngii el diak a ulebengelel.”​​​—1 Johanes 2:​17.

A lsoam el mo suobel er a ulebongel e ‘melemolem er a klengar er kau,’ e ngkirem el mekerang? Ngkirem el mengudel a kall me a ilumel me a klalo? Ngdiak. A Biblia a mengelechel er kid el mo meruul er a ta er a klou a belkul tekoi el kmo: “Ma le uaisei el meterakl el nguemed a ikel tekoi el rokui, e ngkol uangera chedaol blekeradel ma chomeluu ra Dios el kiriu lobang, el mengiil a le me klsel a Dios.” (2 Petrus 3:​10-​12, Beches el Testament) A oeakuchei el bades a ochotii el kmo, “a ikel tekoi el rokui” el mo nguemed a uldimukl er a rokui el omengedereder er tia el mekngit el beluulechad me tirke el sorir aika el omerreder er a bai omerredelel a Dios. Me kede mesang el kmo a bo dongudel a kall me a ilumel me a klalo e ngdiak el sebechel el mo uchul a osebeled sel lemei a ulebongel.

A osebeled a bai mo ultuil er a bo leblak a rengud el mesiou er a Jehovah el Dios e dosuub aike el blekeradel me a omeruul el oldeu er a rengul. (Sefania 2:⁠3) Me ngdiak el soad el mo oltirakl er a omerellir a ruumesingd el chad el diak lomtab a olangch el ochotii el kmo kede kiei er a klou a ultutelel el taem. Ngbai kired el di klekar e “mengiil a le me klsel a Dios.” A Resioning er a Jehovah a sebechir el ousbech er a Biblia el ngosukau el mo medengelii a rolel e ke mo suobel er a ulebongel.