OMESODEL A SUOBEL ER A MEDAL TIA EL BABIER | A ROLEL E NGMO DIAK A SEBEKRENG

A Sebekreng El Kirel A Telungalek

A Janet a dmu el kmo: “Telkib el uriul er a lemad a demak e a bechik a silebedak el kmo ngar er ngii a redil el losiik er ngii. Me ngdi mle telkib el taem e ngdi dimlak losubed e ngmai a kloklel e merael e choitak ngak me a reteru el ngelekek.” A Janet a mlo oureor engdi a ududel a mle ngesonges me ngdimlak el sebechir el melemolem el kiei er a blirir. Ngdirrek el dilu el kmo: “Ngkmal mlo chuarm a uldesuek el kirel tia el klou el ngerachel el mocha kirek el oungerachel er ngii. Ngmlo meringel a uldesuek sel kulatk el kmo ngdikea el sebechek el omekerreu er a rengelekek el ua rebebil el oungalek. Me ngme lmuut er chelechang e ak dirk melatk a uldesuir a rechad el kiram. Te locha omes er ngak el kmo ngdimlak kungil el remuul a ngerechelek er a chebechiielek.”

Sel loluluuch a Janet e ngmo ngosuir el mo tabesul a uldesuel e dirrek el smisichii a deleuill er ngii me a Dios. Ngdmu el kmo: “Ngileakl el kmal mo metacherbesuk sel leklebesei me lak a cherrodech e ak mo mechelak e di omdasu. Me ngkmal ngosukak sel kunguiu er a Biblia e kululuuch. Me sel kot el soak el bades a ngar er a Filipi 4:6, 7 el kmo: ‘Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel. E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu.’ Ngbetok el klebesei el di kululuuch e mla mesang a ngelsuil a Jehovah el cholleklii a renguk.”

Me a osisecheklel a Jesus el kirel a nglunguuch a dirrek el sebechel el mengelaod er kid er a bek el sebekreng. Ngdilu el kmo: “A Demmiu a medengei a ikel mousbech er uchei er cho molengit er ngii.” (Mateus 6:8) Me ngkmal kired el olengit a ngeso er ngii. E a nglunguuch a ta er a kot el ungil el rolel e kede ‘mo kmeed er a Dios.’ Me sel doruul el uaisei e a Dios a ‘mo kmeed er kid.’​—Jakobus 4:8.

Nguaisei, a nglunguuch a diak di lerellid el mo  ungil a rengud e lemerekong. A Jehovah a dirrek el ‘onger a nglunguuch,’ e ngosuterir tirke el blak a rengrir el osiik er ngii. (Psalm 65:2) Sei a uchul me a Jesus a ullisechakl er a rulebengkel el kmo: “Ng kirir el di blechoel el meluluuch el kmal diak bo le kekere rengrir.” (Lukas 18:1) Me ngkired el melemolem el olengit a ngeso me a ulekrael er a Dios e mo oumerang el kmo ngmo ngosukid. Ngkmal sebechel e dirrek el semeriar el ngosukid. Me sel ‘doluluuch el di blechoel’ e ngolechotel a klaumerang er kid el mo er ngii.​—1 Thesalonika 5:17.

A KLAUMERANG NGULDIMUKL ER A NGERANG?

A klaumerang nguldimukl er a ngerang? A klaumerang a uldimukl er a bo dodengelii a Dios. (Johanes 17:3) Kede meruul er tiang el okiu sel dungil el melebedebek a tekingel el ngar er a Biblia. Kede suubii el kmo ngomes er a derta er kid e dirrek el soal el ngosukid. Me nguaisei, engdi a klaumerang er kid er a Dios a uldimukl er a lmuut el betok el tekoi. Ngdirrek el kirel el mo er ngii a kmes el deleuill er kid el obengkel. Me ngdi ua deleuill er kid me a chad el diak el sebechel el meteketek er a di chelsel a ta el kesus. Me a deleuill er kid me a Jehovah a dirrek el mukeroul er a cherengel a taem el dosuub, e doruul a soal, e dengai a ngelsuil. (Johanes 8:29; 2 Korinth 10:15) Tiaikid el rolel a klaumerang a ngosuir a Janet el mo diak di lsebek a rengul.

A Janet a dirrek el dmu el kmo: “A ta er a tekoi el kmal mla smisichii a klaumerang er ngak a sel kumes er a chimal a Jehovah el olengeseu er ngak. Ngbetok el taem el ki bo mchelebangel a chebirukel el omeruul el kmal mo meringel er kemam el outekangel. Engdi sel kululuuch e a Jehovah a meskemam a rolel a chiis el ngii a kmal dimlak el sebechek el mdesuii. Me sel kuureng a sulel e ngomeklatk er ngak er aike el betok el tekoi el bla leruul el kirek. Ngdi blechoel el ngosukak er sel taem el kuusbech a ngeso. Ngdirrek el mla meskak a rungil el sechelik el tir a mesiungel. Me te di blechoel el kmeed er ngak e dirrek el kmal ungil el kerebai el mo er a rengelekek.” *

“Ak mla mo medengelii a uchul me a Jehovah a melekoi el ngar er a Malakai 2:16 el kmo: ‘Ng kmal chetik a dertel a chebechiil.’ E le ngrullii ngike el diak a telemellel el buch el kmal mo chebuul. Ngmla mo betok el rak er a lorael a bechik, engdi ngdirk mo er ngii a taem e ak melechesukak el kmal sabisi. Me sel bo kuaisei, e ak melasem el olengeseu er a rebebil me bo el mechelaod a renguk.” Me sel lolasem a Janet el oltaut a omellach er a Biblia e lak longeroid er ngii er a rechad, e ngmo diak di lsebek a rengul. *​—Osisechakl 18:1.

“Ngkmal mo mechelaod a renguk sel kudengei el kmo a Dios ‘a demerir a re diak a demerir e osebecheklir a re melakl dil.’ Me ngkmal diak bo lechitak el ua bechik el chilitak.” (Psalm 68:5) A Janet a ungil el medengei el kmo a Dios a “diak longarm er a ngii di le chad.” Ngbai diak le “kiresii er a ngii di le chad” a llomeserreng e dirrek el mesterir a “klou el klisiich” me ngmo sebechir el outekangel a sebekreng.​—Jakobus 1:5, 13; 2 Korinth 4:7.

Engdi kede mo mekerang a lsekum e ngsuebek a rengud e le kede chelebangel er a kdekudel el tekoi?

[Aike el Footnote]

[Blurb el ngar er a 7 el llel]

A Dios a “demerir a re diak a demerir e osebecheklir a re melakl dil.”​—Psalm 68:5