A REMENGUIU A OKER . . .

Ngera kngtil a Kurismas?

A rechad a mla mo betok el rak el omes er a Kurismas el kmo ngchedaol sils el mengedaol er a cherellel a Jesus. Engdi a rebetok er tir a melatk aike el betok el siukang el meketmokl er a temel a Kurismas e mo omdasu el kmo, aika ngerang rullii er a cherellel a Jesus?

Ka di molatk er a Santa Claus. A rebetok a medengei el kmo, ngika el ungil a rengul e chesechesomel el rubak el bekerkard a bilel a lebiluchelii a ta el kombalii er a Merikel el meruul a ilumel el kirel a advertisement er a temel a Kurismas er sera 1931. Me ngar er aike el rak er a 1950 e a rebebil el ngar er a Brazil a ulemtechei er ngii el ousbech er a Grandpa Indian, el chad el ngar er a cheldecheduch el chelid er tir. Me ngera mlo rsel? A rechad a di millemolem el sorir a Santa Claus. E a Professor Carlos E. Fantinati a dilu el kmo, te mle sorir a Santa Claus “el kuk ngaruchei er a Jesus. E sel letemel a klou el mur er a December 25 e te bai melatk er a Santa Claus” el diak lolatk er a Jesus. Engdi ngdi ta el Santa Claus a mekngit er a temel a Kurismas? Ngungil a bo dosaod a omerellir tirke el mle kot el Kristiano.

Sel Encyclopedia Britannica a mesaod el kmo, “Ngar er a chelsel aike el 200 el rak er a uriul er a kodellel a Kristus, e a Rekristiano a ulemtok a omeruul el tanziobi el kirir tirke el martyr me a dirrek el Jesus.” E ngera uchul? Tirka el Kristiano a ulemdasu el kmo te di tirke el mengull a ngodech el chelid a meruul a tanziobi, me ngdimlak longesechusem er tir er aika el tekoi. Me a lmuut el tang, ngdiak debetik er a temel a cherellel a Jesus el ngar er a Biblia.

Me alta e tirka el mle kot el Kristiano a ulemtok er a omeruul el tanziobi, engdi betok er a 300 el rak er a uriul er a kodellel a Jesus e a Ikelesia er a Katolik a miluchelii a Kurismas. Ngmle sorir a rebetok el chad a bo lesiseb er a ikelesia, me te ulsiik a rolel e rulleterir a rechad er a Rom el mo diak longull a chelid er tir e bo lak longedaol a chedaol sils er tir er a temel a kelekolt. Ngar er a babilengel a Penne L. Restad el Christmas in America e ngmesaod el kmo, a bek el rak el omuchel er a December 17 el mo er a January 1, “e a ruumesingd el chad er a Rom a mirruul a meklou el mur me a klekool me a parade me a lmuut el bebil el mengull a chelid er tir.” Me sel lebo el December 25 e te mengedaol er a lekong cherellel a Mesisiich el Sils. Me a rechad er a Katolik a ngileltii tiaikid el sils el mo Kurismas el meruul er a rechad el mo diak longedaol er a cherellel a sils e bai mo mengedaol er a cherellel a Jesus. Me ngar er a babilengel a Gerry Bowler el Biography er a Santa Claus, e ngmilluches el kmo, a rechad er a Rom “a mlo mengedaol aika el beches el chedaol sils el oltirakl a di mla siukang er tir.”

Me ngbleketakl el kmo, a Kurismas a chelsechusem er a mekngit el tekoi. Ngar er a babilengel a Stephen Nissenbaum el The Battle for Christmas, e ngmesaod el kmo, “a Kurismas a di chedaol sils el kirel a ngodech el chelid e a rechad a meruul er ngii el lekong chedaol sils el kirir a Rekristiano.” Tia uchul me ngchedaol sils el oltuub er a Dios me a Ngelekel el Jesus Kristus. Me tiang, ngdi beot el tekoi? Ngdiak, e le Biblia a kmo: “Ng mekera e a melemalt ma chebirukel a mo dmak? Ng mekera e a llomes ma ilkolk a mo dmak?” (2 Korinth 6:14) Me a Kurismas a di ua kerrekar el mla mukeroul el mo chebirukel me ng “diak el sebechel metamet.”​—Olisechakl 1:15.