OMESODEL A SUOBEL ER A MEDAL TIA EL BABIER | NGSEBECHEM EL MO UNGIL EL MEDENGELII A BIBLIA

Ngeso el Mo Ungil el Medengelii a Biblia

Ka molatk oleko ngketengem el mo er a ngodech el beluu. Me ke mo mesterir a rengodech el chad el ngodech a siukang er tir, e mengarm a ngodech el kall e dirrek el mo ousbech a ngodech el bedengel a udoud. Ke ulterekokl el mo suebek a rengum.

Me a kot el taem el monguiu er a Biblia e nglocha mo uaisei a uldesuem. Sel monguiu el kirel aike el tekoi er a irechar e nglocha kmal ngodech el tekoi er a uldesuem. Ke mo mesuub el kirir a rechad er a Filistia, e dirrek el mo mesuub a ngodech el siukang el ua ‘omesodel el bail,’ me a lechub e ke mesuub el kirel a kall el mana me a udoud el shekel. (Exodus 16:31; Josua 13:2; 2 Samuel 3:31; Jeremia 32:9) Aika el tekoi a sebechel el omekerrau er a rengum. Me ngdi ua sel leketengem el mo er a ngodech el beluu el locha soam el olengit a ngeso er a chad el sebechel el ngosukau.

NGESO ER A IRECHAR

Ngar sel taem er a lekot el meluches a Biblia er a bekord el 1,500 el rak er a uchei er a Kristus e a rechad a mlongeseu el mo ungil el medengelii tia el babier. El ua tiang, a Moses el ngike el mle kot el mengeteklir a rechad er a Israel a “ulemuchel el mesaod” a belkul a tekoi el milluches.​—Duteronomi 1:5.

Me ngar er a bekord el 1,000 el rak er a uriul e te dirk mla er ngii a remeduch el olisechakl a tekoi er a Chedaol Llechukl. Me ngar er a rak er a 455 er a uchei er a Kristus, e a klou el cheldebechel er a rechad er a Judea el uldimukl er a rebetok el ngalek a mlo kldibel el ngar er a Jerusalem. E tirke el mle meduch el olisechakl a milenguiu er a Chedaol Llechukl er mederir el rokui. Engdi ngdimlak di el seikid a lurruul er ngii, e te dirrek el “silodii me ng mlo sebechir a re chad el omtab er ngii.”​—Nehemia 8:1-8.

Me ngar er a 500 el rak er a uriul, e a Jesus Kristus a mirruul er a osisiu el rolel a osisechakl. Me a rechad a ulemes er ngii el ua sensei. (Johanes 13:13) Ngullisechakl a meklou el seked me a dirrek el derta el chad. A ta er a taem e ngmilengedecheduch er a klou el seked, e ultebedii a Cheldechedechal el Ngar er a Rois, me a “re chad el mle meseked a mlo mechas a rengrir er ngii a lolisechakl.” (Mateus 5:1, 2; 7:28) E ngar er a rak er a 33, e a Jesus a milengedecheduch er a reteru el disaiplo er ngii er a omerollir el mo er a kekerei el beluu el kmeed er a Jerusalem, e silaod e meketakl a tekoi er a Chedaol Llechukl el mo er tir.​—Lukas 24:13-15, 27, 32.

A redisaiplo er a Jesus a dirrek el ullisechakl a Tekingel a Dios. A ta el taem e a ngarbab el chad er a Ethiopia a milenguiu a Bades. E a disaiplo er a Jesus el Filip a ulekedii er ngii e uleker el kmo: “Ke medengelii a belkul sel monguiu er ngii?” Me ngii el chad a dilu el kmo: “Ng mekera e sebechek el mo medengelii a lak a chad el smodii er ngak?” Me a Filip a mlo kiei el smodii a belkul tia el tekoi el mo er ngii.​—Rellir 8:27-35.

NGESO ER CHELECHANG

Me a Resioning er a Jehovah er chelechang a dirrek el olisechakl er a rechad el ousbech er a Biblia el ngar er a bekord el 239 el beluu, el ua lurruul er ngii a remesiungel a Dios er a irechar. (Mateus 28:19, 20) Me ngbek el sandei e te olengeseu er a rekuk betok er a 9 el miliol el chad el mo ungil el medengelii a Biblia. E a betok er tirka el mesuub a dimlak el Kristiano er a uchei. E a omesuub el longetmokl a diak locheraol e sebechel el meketmokl er a blirir me a lechub e ngbasio el ungilbesul er ngike el mesuub. A rebebil er tir a dmeu a rengrir el mesuub el okiu a dengua me a computer me a klekedall el ua tablet.

Me a lsekum ngsoam, e bo mongedecheduch er a ta er a Sioning er a Jehovah el kirel a lmuut el omesodel tia el tekoi. Ngsebechem el mo mesang el kmo a Biblia a ileakl el babier el sebeched el ousbech er ngii el “olisechakl a klemerang, e mellach, e mesmechokl, e olecholt a meral rolel a ungil klengar, me bo le sebechel a chad el ungil kldmokl e ulsemuul el kirel a bek el ungil ureor.”​—2 Timothy 3:16, 17.

 Momes er a video el Ngera Me Ngkirem el Mesuub er a Biblia? el ngar er a www.dan124.com/pau

Momes er a video el Ngera Meketmokl er a Omesubel a Biblia? el ngar er a www.dan124.com/pau

[Blurb el ngar er a 6 el llel]

Ngsebechem el download er a Biblia me a lechub e ke luchesii a ongtim el kirel a omesubel a Biblia el okiu a website er kemam el www.dan124.com/pau

[Baks el ngar er a 7 el llel]

Ngeso el Ngar er a Internet

Kau ngsoam el omuchel el mo medengelii a Biblia? Ngsebechem el mo er a website el jw.org, e le ngar er ngii a betok el omesodel a Biblia er a chelsel, el ngar er a betok er a 700 el omelekoi. Ngsebechem el mesuub el kirel a chouaika el tekoi el diak locheraol:

A ker el leblechoel el oker a rechad

▪ Ngera belkul a klengar er kid?

▪ Ngera uchul me a rechad a mad?

▪ Ngera duubech el me er kid sel demad?

(Momes er a babier el Ngerang Mera el Lolisechakl a Biblia? er cheungel a BABIER > BOOK ME A BROCHURE)

A mondai er a klengar er kau

▪ A rolel e ngmo diak di lsebek a rengum

▪ A rolel e ngsebechem el choitii a omelamech el dekool

▪ A telemellel a osengel a siasing er a remeau

(Momes a kakerous el Ongkerongel el ngar cheungel a BABIER > MAGAZINE)

Ngeso el kirel a telungalek

▪ A rolel e ngmo diak a klautok

▪ Okurulir a rengalek

▪ Mondai el kirel a udoud

(Momes er a babier el Ngsebechel el Mo er Ngii a Deurreng er a Telungalek er Kau er cheungel a BABIER > BOOK ME A BROCHURE)

Ngeso el kirir a rengeasek

▪ Mondai el kirel a deleboes el omeruul

▪ A chad el omecheracheb er kau

▪ Sel taem el bo msabisi

(Aikang a ngar er ngii el tekoi er a Merikel er cheungel a BIBLE TEACHINGS > TEENAGERS)