Da Jesus is kshtauva so es mensha iahra sinda fagevva greeya kenna un ayvich layva havva. (Römer 6:23; Epheser 1:7) Da Jesus sei doht hott geprooft es en mensh kann faythfel bleiva zu Gott even vann eah shlimmi trials hott​.—Hebräer 4:15.

 Lann vi ay mann so feel du hott kenna bei sei layva gevva.

1.   Da Jesus is kshtauva fa ‘unsah sinda fagevva.’​—Kolosser 1:14.

    Da eahsht mensh, da Adam, voah pirfikt gvest, unni ennichi sind. Avvah, eah hott diseiyt fa nett Gott heicha. Koss es da Adam nett keicht hott un hott ksindicht, awl funn sei nohch-kummashaft sinn afekt bei sell. Di Bivvel sawkt, ‘Deich ay mensh es nett keicht hott, sinn feel leit sindah vadda.’​—Römer 5:19.

    Da Jesus voah aw pirfikt, avvah eah hott nee nett ksindicht. Koss funn sell, kann eah en ‘opfah sei fa unsah sinda.’ (1 Johannes 2:2) Koss es da Adam nett keicht hott, sinn awl mensha afekt vadda mitt di sind, so aw dutt da Jesus sei doht awl selli es glawva an een sauvah macha funn di sind.

    Ma kend sawwa da Adam hott awl mensha fakawft zu di sind. Da Jesus voah willing fa shtauva fa mensha un fa uns zrikk kawfa. Koss funn sell, “vann ennich ebbah sindicht, dann henn miah aynah es shvetzt fa uns zumm Faddah. Dess is Jesus Christus, deah vo gerecht is.”​—1 Johannes 2:1.

2.   Da Jesus is kshtauva “so es awl dee vo an een glawva, nett faloahra gay sella, avvah sella ayvich layva havva.”​—Johannes 3:16.

    Da Adam voah gmacht fa ayvich layva. Avvah, koss es eah ksindicht hott, hott eah shtauva missa. Deich da Adam is ‘di sind in di veld kumma, un deich di sind da doht, so is da doht uf awl mensha kumma, veil si awl ksindicht henn.’​—Römer 5:12.

    Da Jesus sei doht dutt nett yusht uns sauvah macha funn di sind, avvah es dutt aw da punishment funn da doht vekk nemma funn alli-ebbah es veist es si glawva an een. Di Bivvel sawkt: “So vi di sind groold hott zumm doht, so aw dutt di gnawt [adda undeserved kindness] roola deich gerechtichkeit zumm ayvicha layva deich Jesus Christus unsah Hah.”​—Römer 5:21.

    Heit kenna mensha alsnoch yusht so lang layva. Avvah, Gott promised es eah zayld ayvich layva gevva zu selli vo recht du vella, un selli zrikk zu layva bringa es kshtauva sinn so’s si aw bennafida kenna funn da Jesus sei doht.​—Psalm 37:29; 1 Korinther 15:22.

3.   Da Jesus “hott Gott keicht biss an da doht,” un sell prooft es mensha kenna faythfel bleiva zu Gott deich ennichah trial.​—Philipper 2:8.

    Even vann da Adam pirfikt voah, eah hott nett Gott keicht because eah hott ebbes vella es nett keaht hott zu een. (1 Mosi 2:16, 17; 3:6) Shpaydah, hott Gott sei grayshtah enemy, da Satan ksawt es nimmand dayt Jehova heicha vann’s maynd iahra layva ufgevva. (Hiob 2:4) Avvah, da Jesus voah pirfikt un eah hott Gott keicht un is faythfel geblivva zu een, even vann eah feel deich gmacht hott eb eah kshtauva is. (Hebräer 7:26) Dess hott gvissa es en mensh kann faythfel bleiva zu Gott, es macht nix aus vass eah deich gayt in layva.

Questions veyyich da Jesus sei doht

•   Favass hott da Jesus soffahra un shtauva missa fa mensha zrikk kawfa? Favass hott Gott nett yusht sei meind getshaynsht so’s mensha nett shtauva missa fa iahra sinda?

   Di Bivvel sawkt an Römer 6:23: “Da lohn funn di sind is da doht.” Sell maynd ennich ebbah es sindicht muss betzawla difoah mitt sei layva. In blatz funn nix sawwa zu da Adam, hott Gott’s kliah gmacht es da punishment funn nett heicha is da doht. (1 Mosi 3:3) Vann da Adam ksindicht hott, dann hott Gott sei vatt kalda, koss Titus 1:2 sawkt es Gott kann “nett leeya.” Da Adam sei nohch-kummashaft henn nett yusht di sind grikt funn een, avvah aw da punishment funn di sind, sell is da doht.

   Awl mensha es sindicha diserva fa shtauva, avvah Gott veist vi goot maynich es eah is even vann miah’s nett diserva. (Epheser 1:7) Eah hott da Jesus kshikt fa en pirfiktah sacrifice fa mensha sayva. Sell veist vi feel leevi es eah hott un aw vi feah es eah is.

•   Vann is da Jesus kshtauva?

   Da Jesus is kshtauva baut “drei oowah” nochmiddawks uf da Jewish Passover. (Markus 15:33-37) Es voah Freidawk, April 1, 33 C.E., according zu di calendars es miah henn heit.

•   Vo is da Jesus kshtauva?

   Da Jesus is kshtauva “an en blatz es Shkoll-blatz kaysa hott, un in di Hebrayish shprohch, Golgotha.” (Johannes 19:17, 18) In da Jesus sei dawk voah deah blatz autseit di shtatt funn Jerusalem. (Hebräer 13:12) Es voah andem uf en hivvel koss di Bivvel sawkt es samm leit henn gvatsht vass am haebna voah funn veit ab. (Markus 15:40) Avvah, ’sis hatt fa sawwa grawt vo Golgotha is heit.

•   Vi is da Jesus kshtauva?

   Feel leit glawva es da Jesus voah uf en greitz adda en cross kanka. Avvah, di Bivvel sawkt: “Christus hott uns lohs gmacht fumm fluch fumm Ksetz bei en fluch vadda fa uns—fa’s is kshrivva, ‘Faflucht is alli-ebbah es uf en bohm henkt.’” (Galater 3:13) Bivvel shreivah yoosa zvay Greek vadda fa sawwa vass da Jesus kshtauva is druff​—stau·rosʹ un xyʹlon. Feel leit es en latt research doon, sawwa es dee vadda mayna en beam adda en pohl gmacht funn ay shtikk hols.

•   Vi sedda miah da Jesus sei doht meinda?

   Uf da ohvet funn da Jewish Passover hott da Jesus ebbes neiyes kshteaht fa sei followers. Eah hott ksawt: “Doond dess fa en ohdenkes funn miah.” (1 Korinther 11:24) Edlichi shtund shpaydah henn si da Jesus doht gmacht.

   Di vans es di Bivvel kshrivva henn henn da Jesus kamperd zu’s lamm es ufgopfaht voah an da Passover. (1 Korinther 5:7) Yusht vi da Passover di Kinnah Israel remind hott es si free gmacht voahra funn slaves sei in Egypt, so dutt’s Ohdenkes funn da Jesus sei doht Christians helfa meinda es si free gmacht sinn funn di sind un da doht. Da Passover voah uf Nisan 14 according zu iahra calendar zrikk no, un si henn’s kalda alli yoah. Di Christians in di eahsht century henn aw’s Ohdenkes kalda ay moll’s yoah.

   Ay moll’s yoah, uf da dawk es saym veah es Nisan 14, doon millions funn leit gans ivvah di veld en ohdenkes halda funn da Jesus sei doht.