Jehova a hott da eahsht mann un fraw keiyaht. Di Bivvel sawkt es eah hott di eahsht fraw gmacht un hott see “zumm mann gebrocht.” Da Adam voah so haebbi es eah ksawt hott: “Dess is nau gnocha funn mei gnocha, un flaysh funn mei flaysh.” (1 Mosi 2:22, 23) Jehova vill alsnoch havva es keiyahri leit haebbi sinn.

Vann du heiyahsht, zaylsht du fleicht denka alles zayld pirfikt sei. Di voahret is, even en mann un fraw es feel leevi henn fa nannah zayla samm problems havva. (1 Korinther 7:28) In deah brochure zaylsht du ausfinna vi Gott feeld veyyich family layva. Vann diah doond vass di Bivvel sawkt, kann’s eiyah keiyaht layva un family haebbi macha.​—Psalm 19:8-11.

VASS DI BIVVEL SAWKT: Da mann dutt foahgay in di family.​—Epheser 5:23.

Vann du en mann bisht, dann vill Jehova havva es du acht gebsht uf dei fraw inna shaynah vayk. (1 Petrus 3:7) Eah hott see gmacht fa’n hilf sei zu dich, so’s diah goot mitt-nannah shaffet. Eah vill havva es du machsht es see goot feeld veyyich sich selvaht un es du see leevi veisht. (1 Mosi 2:18) Di leevi es du hosht fa dei fraw sett macha es du may drumm gebsht veyyich see es du dusht veyyich dich selvaht.​—Epheser 5:25-29.

Vann du en fraw bisht, dann vill Jehova havva es du en deefah respekt hosht fa dei mann un helfsht een sei part du. (1 Korinther 11:3; Epheser 5:33) Du geahn koahberayda mitt een un du vass du kansht, so’s sei decisions goot aus shaffa. (Kolosser 3:18) Vann du dusht, zaylsht du precious sei zu dei mann un zu Jehova.​—1 Petrus 3:1-6.

VASS DU KANSHT:

• Frohk dei partner vo du bessah du kansht. Heich goot ab, un du vass du kansht fa bessah vadda

• Sei geduldich. Es zayld zeit nemma fa lanna vi fa nannah haebbi macha

VASS DI BIVVEL SAWKT: Du musht aus gukka fa vass goot is fa dei partner. (1 Korinther 10:24) Fagess nett es Jehova vill havva es selli es een deena, sella “freindlich sei zu alli-ebbah.” So veis es dei partner precious is. (2 Timotheus 2:24) “Vadda es zu kshvind kshvetzt sinn, shtecha vi en shvatt, avvah di zung funn selli mitt veisheit, bringd hayles.” So, mach shuah es goodi vadda yoosht. (Shpricha 12:18) Jehova zayld dich helfa shay shvetza un leevi veisa.​—Galater 5:22, 23; Kolosser 4:6.

VASS DU KANSHT:

• Eb diah shvetzet veyyich importandi sacha, bayt fa hilf fa kawm bleiva un fa boviahra sacha ohgukka vi dei partner dutt

• Denk seahsht vass sawwa vitt un vi’s sawwa zaylsht

VASS DI BIVVEL SAWKT: Vann du heiyahsht bisht du “ay flaysh” mitt dei partner. (Matthäus 19:5) Avvah diah sind alsnoch zvay leit un mechtet diffahnd feela veyyich sacha. So diah misset lanna vi fa mitt-nannah shaffa fa aynich vadda in eiyah gedanka un feelings. (Philipper 2:2) ’Sis importand fa gans aynich sei vann diah decisions machet. Di Bivvel sawkt bei sacha fashvetza, zayld’s goot aus shaffa. Vann diah visset vi Jehova feeld veyyich sacha, losset sell eich helfa importandi decisions macha.​—Shpricha 8:32, 33.

VASS DU KANSHT:

• Du nett yusht shvetza mitt dei partner veyyich vass anri denka, avvah du dei aykni feelings sherra

• Shvetz mitt dei partner eb du ebbes fashprechsht