Di Bivvel hott ksawt es nohch es da Jesus shtaubt, zayla samm Christians shteahra di voahret funn di Bivvel fadrayya un leit fafiahra. (Apostelgeschichte 20: 29, 30) Mitt zeit, is sell grawt vass kaebbend hott. Si henn da Jesus sei teetshings gmixt mitt falshi ideas. Sell is vi falshi glawva kshteaht henn. (2 Timotheus 4:3, 4) Vi kenna miah shuah sei es miah di Bivvel recht fashtayn heit?

Di zeit is kumma es Jehova di voahret vissa gmacht hott. Jehova hott ksawt es in ‘di letshti dawwa zayla selli mitt veisheit di voahret fashtay.’ (Daniel 12: 9, 10) In 1870 henn dayl leit kshteaht gukka fa di voahret. Si henn ksenna es feel funn di sacha es gmayna teetsha nett kumd funn di Bivvel. So, si henn kshteaht gukka vass di Bivvel aekshli sawkt, un Jehova hott si kolfa’s fashtay.

Mansleit es reeli vissa henn vella henn en deefah shtoddi gedu funn di Bivvel. Di Bible Students, vi Jehova Sei Witnesses als kaysa voahra, henn di Bivvel kshtoddit in da saym vayk es miah doon heit. Si henn di Bivvel kshtoddit ay subject ufamoll. Vann si ivvah ebbes kumma sinn es hatt voah fa fashtay, henn si gegukt fa anri verses fa si helfa’s fashtay. Vann si agreet henn uf ebbes es support voah bei’s ivvahrich funn di Bivvel, henn si’s anna kshrivva. Bei yusht di Bivvel yoosa fa di ensahs finna, henn si viddah di voahret kfunna veyyich Gott sei nohma un’s Reich, sei villa fa mensha un di eaht, vass haebbend mitt selli es shtauva, un di hofning es di dohdi viddah ufshtay zayla. Vass si kfunna henn, hott si free gmacht funn feel falshi glawva un letzi ideas.​—Johannes 8:31, 32.

In 1879 henn di Bible Students ksenna es di zeit do voah fa di voahret vissa macha zu so feel leit es si kenna. Sell saym yoah henn si kshteaht di magazine prinda es miah alsnoch poblisha heit, Da Vatshtavvah es Sawkt Veyyich Jehova Sei Reich. Nau sherra miah di voahret funn di Bivvel mitt leit in 240 diffandi lendah un ivvah 900 languages. Es henn selayva nett so feel leit di voahret gvist vi’s doon heit!

• Vass hott kaebbend mitt di voahret funn di Bivvel nohch es da Jesus kshtauva is?

• Vass hott uns kolfa fa viddah di voahret finna in di Bivvel?