DI VOAHRET veyyich vass? Veyyich samm funn di importandshti questions es mensha selayva kfrohkt henn. Fleicht hosht du shund gvunnaht veyyich di ensahs zu questions vi dess:

• Dutt Gott ennich ebbes drumm gevva veyyich uns?

• Zayld greek un soffahres selayva ufheahra?

• Vass gebt mitt uns vann miah shtauva?

• Hott’s ennich hofning fa selli vo kshtauva sinn?

• Vi kann ma bayda un keaht sei bei Gott?

• Vi kann em sei layva happy sei?

Vo daytsht du gukka fa ensahs zu dee questions? Vann du diffahndi leit frohksht, zaylsht du diffahndi ensahs greeya. Even vann du leit frohksht es shmeaht sinn adda nuff gegukt sinn ditzu, zaylsht du ensahs greeya es nett aynich sinn mitt nannah. Samm ensahs seema vann si recht veahra an di zeit avvah’s nemd nett lang biss si ufkumma mitt anri es si mayna es bessah sinn.

’S is avvah ay blatz es di rechti ensahs kfunna sei kenna. In en buch es di voahret sawkt. Inna gebayt zu Gott, hott da Jesus Christus ksawt: “Dei Vatt is di voahheit.” (Johannes 17:17) Heit is sell Vatt di Bivvel kaysa. Uf di nekshti paytshes, kansht du di Bivvel iahra ensahs sayna zu dee questions. Si sinn voah un eesi fa fashtay.

FAVASS DA QUESTION UFKUMD: Miah layva inna veld es nett feah is un leit sinn veesht zu nannah. Feel leit glawva es soffahres es miah deich macha is Gott sei villa.

VASS DI BIVVEL SAWKT: Es is nett Gott sei shuld es evili sacha blatz nemma. Hiob (Job) 34:10 sawkt: “Gott dayt selayva nett droh denka fa evil du, adda da Awlmechtich fa letz du.” Gott vill havva es mensha iahra layva uf en paradise eaht enjoya kenna fa’immah. Sell is favass es da Jesus uns gland hott fa bayda: “Unsah Faddah im Himmel, loss . . . dei Reich kumma. Loss dei villa gedu sei, uf di eaht vi im Himmel.” (Matthäus 6:9, 10) Gott gebt so feel drumm veyyich uns es eah sei sohn uf di eaht kshikt hott fa shtauva fa mensha, fa’s shuah macha es mensha layva kenna fa’immah.​—Johannes 3:16.

Lays aw 1 Mosi (Genesis) 1:26-28; Jakobus (James) 1:13; un 1 Petrus 5:6, 7.

FAVASS DA QUESTION UFKUMD: Greek dutt oh’halda feel mensha iahra layva nemma, may’s ma zayla kann. In samm vayk hott alli ebbah soffahres in sei layva.

VASS DI BIVVEL SAWKT: Gott hott ksawt ebdihand funn en zeit es eah fridda gans ivvah di eaht bringa zayld. Gott Sei Reich is en government im himmel, unnich sell Reich zayla leit “nee nimmi lanna fa greek macha.” In blatz funn sell, zayla si “iahra shvadda in blooks-peinda macha.” (Jesoiya [Isaiah] 2:4) Gott zayld macha es awl soffahres ufheaht un alles es nett feah is zu en end bringa. Di Bivvel fashprecht: “Gott zayld awl’s awwa-vassah aus iahra awwa butza, un’s zayld kenn shtauves, adda heiles, adda brilles, adda shmatza may sei, fa di alda sacha sinn faganga.” Dess maynd aw’s soffahres un vass nett feah is heit, zayld nimmi sei.​—Di Offenbarung (Revelation) 21:3, 4.

Lays aw Psalm 37:10, 11; 46:9; un Micha 4:1-4.

FAVASS DA QUESTION UFKUMD: ‘S mensht funn di diffahndi glawva gans ivvah di veld, doon di leit lanna vann ebbah shtaubt dutt ebbes inseit da mensh oh’halda layva. Samm glawva es di dohda kenda em vay-du adda es Gott veeshti leit shtrohft bei si macha brenna fa’immah inna feiyahrichi hell.

VASS DI BIVVEL SAWKT: Vann mensha shtauva gayn si zu nix. “Di dohda vissa nix” sawkt’s in Breddichah (Ecclesiastes) 9:5. Siddah’s di dohda nix vissa, adda shpiahra, adda du kenna, dann kenna si aw nimmand es am layva is vay-du adda helfa.​—Psalm 146:3, 4.

Lays aw 1 Mosi (Genesis) 3:19 un Breddichah (Ecclesiastes) 9:6, 10.

FAVASS DA QUESTION UFKUMD: Miah vella nett shtauva avvah vella layva enjoya mitt selli es miah leevi henn difoah. ‘S is yusht natural es miah aw en falanga henn fa selli viddah sayna es kshtauva sinn.

VASS DI BIVVEL SAWKT: ‘S mensht leit es kshtauva sinn zayla viddah uf shtay. Da Jesus hott fashprocha es “awl dee vo in di grayvah sinn . . . zayla uf shtay.” (Johannes 5:28, 29) Vo Gott mensha gmacht hott, hott eah havva vella es si layva fa’immah inna paradise uf di eaht, in da saym vayk selli vo uf shtayn funn di dohda henn di gleyyaheit fa layva fa’immah inna paradise eaht. (Jesoiya [Isaiah] 65:21-25) Leit zayla ksund sei vi si selayva nett voahra un zayla ayvich layva havva. Dess sinn samm funn di sacha es fashprocha sinn fa noch dee zeit, zu mensha es heicha. Di Bivvel sawkt: “Di gerechta zayla’s land eahva, un drinn voona fa’immah.”​—Psalm 37:29.

Lays aw Hiob (Job) 14:14, 15; Lukas 7:11-17; un Di Apostelgeschichte (Acts) 24:15.

FAVASS DA QUESTION UFKUMD: Leit mitt yusht baut ennichah glawva doon bayda. Doch, feel leit feela es iahra gebaydah sinn nett gensaht.

VASS DI BIVVEL SAWKT: Vo da Jesus uns gland hott veyyich bayda hott eah ksawt: “Vann du baytsht, du nett feel vadda sawwa es nix mayna.” (Matthäus 6:7) Dess maynd ma sett nett di saymi gebaydah ivvah un ivvah sawwa. Vann miah havva vella es Gott unsah gebaydah abheicht, dann missa miah bayda da vayk es eah havva vill. Fa sell du, missa miah lanna vass Gott sei villa is un bayda in lein mitt sell. In 1 Johannes 5:14 sawk’s: “Vann miah ennich ebbes frohwa noch seim villa, dann heaht eah uns.”

Lays aw Psalm 65:2; Johannes 14:6, 14; un 1 Johannes 3:22.

FAVASS DA QUESTION UFKUMD: Feel leit denka vann ma geld hott, adda hohch gacht is, adda nadiahlichi sacha hott, zayld’s em happy macha. So si boviahra dee sacha greeya, no finna si aus es si doch nett happy sinn.

VASS DI BIVVEL SAWKT: Da Jesus hott raus gebrocht vass’s nemd fa em happy macha, vo eah ksawt hott, happy “sinn dee vo Gottes Vatt heahra un’s aw doon.” (Lukas 11:28) Da aynsisht vayk es miah recht happy sei kenna is vann miah en falanga henn fa di voahret vissa veyyich Gott un sei villa fa uns, un boviahra sellah falanga ausfiahra. Selli voahret is kfunna in di Bivvel, un vann ma’s moll fashtayt helft’s em sayna vass reeli importand is un vass nett is. Vann miah di voahret es kfunna is in di Bivvel lossa uns da vayk sawwa fa gay, dann zayld unsah layva feel ma mayning havva.

Lays aw Shpricha (Proverbs) 3:5, 6, 13-18 un 1 Timotheus 6:9, 10.

 Dess hott yusht bisli zeit gnumma fa gukka vass di Bivvel iahra ensahs sinn zu dee sex questions. Vann du ebbah bisht es gleicht ‘Gottes Vatt heahra un’s du,’ dann zaylsht du vella noch may vissa. Du mechtsht aw vunra veyyich anri questions so vi: ‘Vann Gott ebbes drumm gebt veyyich uns, favass hott eah so feel soffahres un evil glost ohgay gans deich history? Vi kann ich mei family layva bessah macha?’ Di Bivvel gebt goodi un di rechti ensahs zu dee un noch feel may questions.

Avvah feel leit heit, doon zrikk hayva funn in di Bivvel gukka. Si gukka’s aw es vi en dikk buch es hatt is fa fashtay. Vann du hilf vitt fa di ensahs finna in di Bivvel, Jehova Sei Witnesses henn zvay tools es dich helfa kann.

Da eahsht tool is da brochure Goodi Sacha es Gott Sawkt! un is gmacht fa leit helfa sayna vass di Bivvel iahra ensahs sinn zu samm funn di reeli importandi questions in layva. Da zvett tool is en shtoddi funn di Bivvel, es free is. Ayns funn Jehova Sei Witnesses kann zu dei haymet kumma adda vo evvah’s du vitt, fa samm zeit nemma fa shvetza veyyich di Bivvel mitt dich. Dess kosht dich nix. Millions funn leit gans ivvah di veld henn shund hilf grikt vi dess. Feel leit sinn anna kumma vo si ksawt henn: “Ich habb di voahret kfunna!”

Es hott nix es ma finna kann es bessah is. Di voahret in di Bivvel macht uns frei funn falshi glawva, un fafiaht sei, un em reeli feicha. Es gebt uns ebbes fa foah gukka ditzu, gebt em hofning, un macht em reeli happy. Da Jesus hott ksawt: “Diah zaylet di voahheit vissa, un di voahheit macht eich frei.”​—Johannes 8:32.