5 Mosi 24:1-22
24 Vann en mann en veibsmensh heiyaht un macht aus shpaydah es eah see nett vill veil eah ebbes shandliches kfunna hott an iahra, un eah gebt iahra en divorce-shreives un shikt see aus sei haus,
2 un noch demm es see sei haus falost, vatt see en anra mann sei fraw,
3 un iahra zveddah mann gleicht see nett un gebt iahra en divorce-shreives un shikt see aus sei haus, adda eah shtaubt,
4 no soll da eahsht mann es see keiyaht katt hott see nett viddah heiyahra, nochdem es see unrein is. Sell veah en eiyahnis zumm HAH. Doond nett sind uf’s land bringa es da HAH eiyah Gott am eich gevva is fa en eahbshaft.
5 Vann en mann katzlich keiyaht hott, dann soll eah nett in da greek kshikt sei, adda ennichi anri eahvet uf een glaykt sei. Fa ay yoah soll eah frei sei fa dihaym bleiva un sei fraw fraylich macha.
6 Vann ebbah eich ebbes shuldich is, dann sellet diah nett en hand-meel adda da evvahsht meel-shtay nemma in blatz funn di shuld biss eah’s betzawla kann. Sell veah am sei layves-fadeensht vekk nemma funn eem.
7 Vann en mann kfanga vatt ayns funn sei breedah, en Israeliddah, shtayla, un eah macht en bunds-gnecht aus eem adda fakawft een, dann muss sellah deeb doht gmacht sei. Sellah vayk doond diah dess eviles vekk funn eich.
8 Gevvet acht vann aussatz unnich eich kfunna is, un doond grawt vi di Lefiddishi preeshtah eich sawwa. Diah misset grawt du vi ich si gebodda habb fa du.
9 Fagesset nett vass da HAH eiyah Gott gedu hott zu di Miriam uf em vayk, noch demm es diah aus Egypta kumma sind.
10 Vann diah ebbes laynet zu eiyah nochbah, gaynd nett in sei haus fa sell nemma es diah hayva zaylet biss eah’s glaynd sach zrikk gebt,
11 avvah voahdet haus biss eah’s raus bringd.
12 Vann eah en oahmah mann is, dann sellet diah’s nett hayva ivvah-nacht.
13 Gevvet eem sei vammes zrikk ohvets an sunn-unnah, so es eah sei glayt hott fa shlohfa drinn. No dankt eah eich, un’s vatt gezayld es gerechtichkeit fa eich fannich em HAH eiyah Gott.
14 Diah sellet da lohn nett zrikk hayva funn eiyah gnechta es oahm sinn un noht henn. Dess is eb si eiyah aykni breedah sinn, adda ausahri sinn es in ayns funn eiyah shtett voona.
15 Diah sellet eena iahra lohn gevva da dawk es si’s fadeena eb di sunn unnah gayt. Si sinn oahm un falossa sich uf iahra lohn. Vann diah si nett betzawlet dann roofa si da HAH oh geyyich eich un diah sind en sind shuldich.
16 Di feddah sella nett doht gmacht sei fa iahra kinnah, un aw nett di kinnah fa iahra feddah; alli-ebbah soll shtauva fa sei aykni sind.
17 Diah sellet’s recht nett vekk nemma funn di ausahra un di kinnah unni eldra; un diah sellet nix nemma funn en vitt-fraw un’s hayva biss see di shuld betzawld.
18 Fagesset nett es diah bunds-gnechta voahret in Egypta un da HAH eiyah Gott hott eich frei ksetzt. Sell is favass es ich eich dess gebott gevva habb.
19 Vann diah am eiyah eahn rei bringa sind fumm feld un diah fagesset en shayb, gaynd nett zrikk un greeyet’s. Losset’s fa di ausahra, di kinnah unni eldra un di vitt-veivah. Dess is so es da HAH eiyah Gott eich saykna kann in awl di eahvet funn eiyah hend.
20 Vann diah’s ayl-frucht runnah shlauwet funn di baym, gaynd nett zrikk ivvah di nesht’s zvett mohl. Losset sell fa di ausahra, di kinnah unni eldra un di vitt-veivah.
21 Vann diah di drauva abshneidet in eiyah vei-goahra, gaynd nett’s zvett mohl drivvah. Losset sell fa di ausahra, di kinnah unni eldra un di vitt-veivah.
22 Fagesset nett es diah bunds-gnechta voahret in Egypta. Sell is favass es ich eich dess gebott gebb zu du.
