Ezekiel 46:1-24
46 “‘Dess is vass da Awlmechtich HAH sawkt: Es doah zumm innahlicha foah-hohf geyyich di east soll zu kalda sei deich di sex shaff-dawwa, avvah uf em Sabbat-Dawk un uf em dawk fumm Neiya-Moon soll’s uf gmacht sei.
2 Da feddahsht roolah soll nei gay deich di eigang shtubb funn autseit, un sich an da doah-poshta shtella. Di preeshtah sella sei brand-opfah un dank-opfah opfahra, avvah eah soll da HAH deena an di shvell fumm doah. No soll eah viddah zrikk naus gay, avvah’s doah soll nett zu gmacht sei biss ohvets.
3 Di leit fumm land sella fannich em HAH deena am eigang funn sell doah uf em Sabbat un em Neiya-Moon.
4 Es brand-opfah es da feddahsht roolah opfahra soll zumm HAH uf em Sabbat-Dawk, soll sex lemmah sei unni faylah un en shohf-bokk unni faylah.
5 Es shpeis-opfah es mitt em shohf-bokk gayt soll en halb bushel sei, un’s shpeis-opfah es mitt di lemmah gayt soll so feel sei es eah gevva vill. Eah soll en gall ayl gevva fa alli halb bushel mayl.
6 Uf em dawk fumm Neiya-Moon soll eah en yungah bull, sex lemmah un en shohf-bokk opfahra. See sella awl sei unni faylah.
7 Mitt em bull soll eah en halb bushel mayl gevva fa en shpeis-opfah, mitt em shohf-bokk en halb bushel mayl un mitt di lemmah so feel es eah vill. Mitt yaydah shpeis-opfah soll eah en gall ayl gevva.
8 Vann da feddahsht roolah nei gayt, soll eah deich di eigang shtubb nei gay, un soll aw viddah sellah vayk raus gay.
9 Vann di leit fumm land fannich da HAH kumma an di geboddana feiyah-dawk-feshta, dann soll sellah es nei gayt fa da HAH deena, deich’s doah nei gay uf di natt seit un naus gay deich’s doah uf di saut seit. Un sellah es nei gayt deich’s doah uf di saut seit, soll naus gay deich’s doah uf di natt seit. Si daufa nee nett naus gay deich’s doah es si nei ganga sinn, avvah si sella deich’s annah doah naus gay.
10 Vann di leit nei gayn, soll da feddahsht roolah aw nei gay, un vann di leit naus gayn soll eah aw naus gay.
11 An di feiyah-dawwa un hohcha feshta soll’s shpeis-opfah en halb bushel mayl sei mitt alli bull, en halb bushel mitt alli shohf-bokk, un so feel es ebbah vill mitt di lemmah. En gall ayl soll gevva sei mitt alli halb bushel mayl.
12 Vann da feddahsht roolah en frei-villich opfah gevva vill zumm HAH—eb’s en brand-opfah is adda en dank-opfah—dann soll’s doah geyyich di east uf gmacht sei fa een. Eah soll sei brand-opfah adda dank-opfah opfahra so vi eah dutt uf em Sabbat-Dawk. No soll eah viddah naus gay. Noch demm es eah naus ganga is, dann soll’s doah viddah zu gmacht sei.
13 Eah soll seiya fa en yoah ald lamm es kenn faylah hott alli dawk fa en brand-opfah zumm HAH. Eah soll seiya fa dess alli meiya.
14 Un alli meiya soll eah aw seiya fa en shpeis-opfah es mitt em brand-opfah gayt. Dess soll zvay unna halb gvoaht mayl sei un en driddel funna gall ayl fa’s nass macha. Dess soll en ayvichi adning sei.
15 So sella si seiya fa en lamm, es shpeis-opfah un’s ayl alli meiya fa en brand-opfah.’”
Da Feddahsht Roolah Un Sei Land
16 “‘Dess is vass da Awlmechtich HAH sawkt: Vann da feddahsht roolah en kshenk gebt aus sei eahbshaft zu ennichs funn sei boova, dann soll’s aw zu sei nohch-kummashaft heahra. Es soll iahra land sei deich di eahbshaft.
17 Avvah vann eah en kshenk aus sei eahbshaft gebt zu ayns funn sei gnechta, dann kann da gnecht’s yusht halda biss an’s yoah funn frei-lossa. No soll’s viddah zrikk falla zumm feddahshta. Yusht sei boova daufa’s kshenk funn sei eahbshaft halda es iahra ayknes.
18 Da feddahsht roolah dauf kenn eahbshaft vekk nemma funn di leit, un si funn iahra land dreiva. Eah soll sei boova iahra eahbshaft gevva aus sei ayya land, so es kens funn mei leit iahra land faliahra.’”
Di Tempel Kicha
19 No hott da mann mich deich da eigang gebrocht am seit doah zu di heilicha shtubba geyyich di natt. Dee shtubba henn zu di preeshtah keaht, un eah hott miah en blatz gvissa gans am west end.
20 Eah hott no ksawt zu miah, “Dess is da blatz vo di preeshtah di shuld-opfah un di sind-opfah kocha sella, un vo si di shpeis-opfah bakka sella. Si doon’s do so es si’s nett in da ausahsht foah-hohf drawwa braucha un di leit heilich macha mitt.”
21 No hott eah mich in da ausahsht foah-hohf gebrocht, un hott mich zu di fiah ekkah fumm foah-hohf kfiaht. In yaydah ekk voah noch en foah-hohf.
22 In di fiah ekkah fumm ausahsht foah-hohf voahra glenni foah-hayf es sivvatzich foos lang voahra un zvay un fuftzich foos brayt. Si voahra awl fiahra di saym grays.
23 Yaydahs funn di fiah foah-hayf henn shtaynichi vanda drumm rumm katt mitt feiyah-grayts unna nohch.
24 Da mann hott no ksawt zu miah, “Dee kicha sinn vo di tempel-deenah di leit iahra opfah kocha sella.”
