Haggai 1:1-15
1 Im zvedda yoah fumm Kaynich Darius, im eahshta dawk fumm sexda moonet, is dess vatt fumm HAH kumma deich da brofayt Haggai zumm Serubabel, em Sealthiel sei boo, es govvenah voah funn Juda, un zumm Joshua, em Jehozadak sei boo, es da hohchen-preeshtah voah:
2 Dess is vass da Awlmechtich HAH ksawt hott zumm Haggai, “Dee leit sawwa, ‘Di zeit is noch nett do es em HAH sei haus gebaut sei sett.’”
3 No is dess vatt fumm HAH kumma deich da brofayt Haggai zu di leit,
4 “Is dess di zeit es diah selvaht in heisah voona seddet es faddich sinn, diveil es dess haus do nunnah-grissa leit?”
5 Nau dess is vass da Awlmechtich HAH sawkt, “Denket vass am ohgay is unnich eich.
6 Diah hend feel geblanst, avvah hend yusht bissel geahnd. Diah esset, avvah hend nee nett genunk. Diah drinket, avvah sind nett foll. Diah doond glaydah oh, avvah sind nett voahm. Diah fadeenet geld, avvah doond’s in sekk mitt lechah drinn.
7 Denket drivvah favass es es eich so shlecht gayt,” sawkt da Awlmechtich HAH.
8 “Nau gaynd nuff uf di berga un bringet hols runnah un bauwet da tempel, so es ich blesiah habb mitt, un mei hallichkeit veisa kann,” so sawkt da HAH.
9 “Diah hend gegukt fa feel, avvah’s hott yusht vennich gevva. Un vass diah haym gebrocht hend, habb ich fatt geblohsa. Favass? Veil mei haus do nunnah-grissa leit, diveil es yaydah funn eich ufgnumma is mitt sei ayya haus,” sawkt da Awlmechtich HAH.
10 “So deich eich, henn di himla iahra dau zrikk kohva, un di eaht haybt sell zrikk vass vaxt.
11 Ich habb eiyah feldah un hivla gmacht ufdrikla, un habb da reyya kshtobt ivvah eiyah frucht, un neiyah vei, un ayl un alles es da grund vaxa macht; un aw ivvah leit un fee un awl di eahvet funn eiyah hend.”
12 No henn em Sealthiel sei boo, da Serubabel, un em Jehozadak sei boo, da Joshua es da hohchen-preeshtah voah em HAH iahra Gott keicht, un so henn awl di ivvahricha leit es zrikk kumma sinn. Si henn aw gedu vi’s vatt ksawt hott es da brofayt Haggai gebrocht hott, veil da HAH iahra Gott een kshikt katt hott. Un di leit henn sich kfeicht fannich em HAH.
13 No hott da Haggai, deah es em HAH sei vatt gedrawwa hott, dess vatt fumm HAH ksawt zu di leit: “Ich binn mitt eich,” sawkt da HAH.
14 So hott da HAH da geisht ufkshtatt fumm Serubabel, em Sealthiel sei boo es govvenah voah funn Juda. Da HAH hott aw da geisht ufkshtatt fumm Joshua, em Jehozadak sei boo es da hohchen-preeshtah voah un da geisht funn awl di leit es zrikk kumma sinn. Si henn ohkfanga shaffa uf em haus fumm Awlmechticha HAH, iahra Gott,
15 uf em fiah un zvansishta dawk fumm sexda moonet, im zvedda yoah fumm Kaynich Darius.
