Psalm 106:1-48
106 Lohb sei zumm HAH!Gevvet dank zumm HAH, fa eah is goot,un sei shtandhaftichi-leevi bleibt fa’immah.
2 Veah kann di mechticha sacha fazayla es da HAH gedu hott,un sei lohb genunk fakindicha?
3 Ksaykend sinn selli es sei gebott halda,un immah doon vass recht is.
4 Denk an mich, oh HAH, vann du gnaydich bisht zu dei leit,helf miah vann du si frei machsht,
5 so es ich’s gooda sayna kann es du dusht fa dei leit,so es ich froh sei kann veil dei leit sich froiya,un en dayl havva kann mitt di leit funn dei eahbshaft am dich lohva.
6 Miah henn ksindicht grawt vi unsah foah-feddah henn;miah henn letz gedu un uns gottlohs ohkshikt.
7 Vo unsah foah-feddah in Egypta voahra,henn si dei vundahra nett fashtanna;Si henn dei grohsi bamhatzichkeit fagessa,un si henn sich kshteibaht am say,am Rohda Say.
8 Avvah eah hott eena kolfa fa da sayk funn sei nohma,so es eah sei mechtichi graft veisa kann.
9 Eah hott da Roht Say gezankt, un eah is drukka vadda;eah hott si deich kfiaht es vi deich drukka land.
10 Eah hott eena aus di hand kolfa funn selli es si kast henn,un hott si frei gmacht funn di hand funn iahra feinda.
11 Di vassahra henn iahra feinda fasoffa,nett aynah funn eena voah ivvahrich.
12 No henn si sei vatt geglawbt,un henn sei lohb ksunga.
13 Avvah si henn glei fagessa vass eah gedu katt hott,si henn nett gvoaht fa sei roht.
14 Si henn glusht in di vildahnis,un henn Gott fasucht im drukka land.
15 So hott eah eena gevva vass si kfrohkt henn difoah,avvah eah hott so feel kshikt biss es eena ayklich voah.
16 Datt in iahra tents in di vildahnis sinn si jealous vadda fumm Mosi,un fumm Aaron, da heilich gnecht fumm HAH.
17 No hott di eaht sich uf gmacht un hott da Dathan kshlukt,si hott da Abiram un sei drubb zu gedekt.
18 En feiyah is aw ausgebrocha unnich iahra drubb,un hott di gottlohsa fabrend.
19 Si henn en kalb gmacht an Horeb,un henn en gegossa gleichnis ohgebayda.
20 Si henn di hallichkeit funn iahra Gott fahandeldfa en gleichnis funn en ox es graws frest.
21 Si henn Gott, iahra Heiland fagessa,deah vo mechtichi sacha gedu katt hott in Egypta,
22 vundahboahri sacha im land fumm Ham,un shreklichi sacha bei em Rohda Say.
23 Vo Gott ksawt hott eah zayld si umbringa,hott da Mosi, em Gott sei raus-groofanah,sich zvishich si un Gott kshteld,un hott Gott sei zann kalda funn si umbringa.
24 Si henn’s leeblich land vennich gacht,un henn sei vatt nett geglawbt.
25 Si henn gegrummeld in iahra tents,un henn nett keicht zumm HAH sei shtimm.
26 So hott eah sei hand uf kohva geyyich si,un hott kshvoahra es eah si nunnah shlauwa zayld in di vildahnis,
27 es eah iahra nohch-kummashaft unnich di heida falla macht,un si ausnannah shtroit unnich di lendah.
28 Si henn sich ohkanka an da Baal-Peor,un henn opfahra gessa es gopfaht voahra zu dohdi abgettah.
29 Si henn da HAH fa’eiyaht bei vass si gedu henn,un en heslichi grankheit is ausgebrocha unnich eena.
30 Avvah da Pinehas is ufkshtanna un hott di sach gricht,un di grankheit voah kshtobt.
31 Un sell voah eem gevva es gerechtichkeit,funn sei nohch-kummashaft zu nohch-kummashaft fa’immah.
32 An di shprings funn Meribah henn si da HAH bays gmacht,un deich si is da Mosi in druvvel kumma.
33 Si henn sei hatz so zannich gmacht,es eah vadda ksawt hott unni denka.
34 Si henn di heida nett doht gmachtso vi da HAH see gebodda hott fa du.
35 Si sinn eiganga mitt di heida,un henn iahra vayya ohgnumma.
36 Si henn iahra abgettah gedeend,un dess is en fall vadda zu eena.
37 Si henn iahra boova un mayt gopfahtzu baysi geishtah.
38 Si henn unshuldich bloot fagossa,es bloot funn iahra boova un mayt.Si henn si gopfaht zu di abgettah funn Kanaan,un’s land voah unrein gmacht bei iahra bloot.
39 Si henn sich selvaht unrein gmacht bei vass si gedu henn,un henn huahrahrei gedrivva bei iahra verka.
40 So voah da HAH bays mitt sei leit,un sei eahbshaft voah grausam gmacht zu eem.
41 Eah hott si ivvah-gevva in di hand funn di heida,so es iahra feinda ivvah si groold henn.
42 Iahra feinda henn si nunnah gedredda,un si voahra gedaymeedicht unnich iahra hand.
43 Eah hott si oft frei gmacht,avvah si henn sich kshteibaht un henn geyyich een kshaft,un si sinn als deefah in sinda ganga.
44 Avvah doch hott eah acht gnumma funn iahra noht,vo eah si keaht hott een ohroofa.
45 No hott eah an sei bund gedenkt mitt eena,un deich sei grohsi leevi hott eah nohch glost.
46 Eah hott gmacht es si gedavvaht voahrabei awl selli es si kfanga kohva henn.
47 Helf uns, oh HAH, unsah Gott,un bring uns zammah aus di heida.So es miah dei heilichah nohma danka kenna,un froh sei kenna fa dich lohva.
48 Glohbt sei da HAH, da Gott funn Israel,fa’immah un immah.Loss awl di leit “Amen” sawwa.Halleluja!
