Psalm 39:1-13
Zumm foah-singah da Jeduthun. En Psalm fumm Dawfit.
39 Ich habb miah dess foah-gnumma: Ich zayl mei vayya heeda,so es ich nett sindich mitt mei zung.Ich hald mei maul shtill,so lang es di ungettlicha um mich rumm sinn.
2 Avvah vo ich nix ksawt habb un shtill voah,un habb even nix goodes ksawt,dann is mei angsht graysah vadda.
3 Mei hatz is hays vadda in miah;vi ich drivvah gedenkt habb, hott’s feiyah gebrend,so habb ich kshvetzt mitt mei zung.
4 HAH, veis miah’s end funn mei layva,un vi lang es mei dawwa sei zayla,gmohn mich droh vi vennich zeit es noch ivvahrich is.
5 Gukk moll, mei dawwa sinn yusht vi di brayding funn en hand,un mei layves-zeit vi nix in dei awwa,em mensh sei layva is yusht en ohften! (Sela)
6 Da mensh lawft rumm heah es vi en shadda,un macht sich unaydichah druvvel,eah sammeld feel geld, un vayst nett veah’s greeya zayld.
7 Avvah nau, oh Hah, vass binn ich am voahra druff,mei hofning is in diah.
8 Mach mich frei funn awl mei sinda,un loss mich nett en kshpott vadda bei di unksheida.
9 Ich binn shtill, un mach mei maul nett uf,fa du hosht dess gedu.
10 Nemm dei shtraych funn miah vekk,ich binn am fagay deich di shtraych funn dei hand.
11 Du zanksht un shtrohfsht mensha fa iahra sinda,du fazeahsht vass keshtlich is zu eena vi en shawb.Yaydah mensh is goah nix, yusht so vi en ohften. (Sela)
12 Heich mei gebayt ab, oh HAH,un nemm acht funn meim geroof fa hilf,sei nett dawb vann ich am heila binn.Fa ich binn vi en fremdah bei diah,en fremdah, so vi awl mei foah-feddah voahra.
13 Gukk vekk funn miah, so es ich mich viddah froiya kann,eb ich vekk gay un nimmi binn.
