Shpricha 1:1-33
1 Dess sinn di shpricha fumm Solomon, em Dawfit sei boo, da kaynich funn Israel.
2 Dee shpricha sinn kshrivva so es leit veisheit un lanning greeya kenna,un di vadda funn eisicht fashtay kenna;
3 dess is so es si lanning greeya kenna fa sich recht ohshikka,in gerechtichkeit, in richta un in eahlich sei;
4 so es selli vo nett kshvind fashtayn, gland vadda,un so es di yungi leit eisicht un fashtand greeya.
5 Veah veisheit hott, zayld heicha un may lanna,un veah fashtayt zayld roht greeya in veisheit,
6 so es eah shpricha un gleichnisa fashtay kann,sell is, leit mitt veisheit iahra vadda un fashtekkeldi mayninga.
7 Di furcht fumm HAH is da ohfang funn eisicht;avvah dummi leit gukka nunnah uf veisheit un gleicha nett recht ksetzt sei.
En Vanning Zu Yungi Leit
8 Mei kind, heich ab vass dei daett dich land,un faloss nett di sacha es dei maemm dich gland hott.
9 Iahra lanning is vi shayni blumma uf deim kobb,adda en kett fa dei hals.
10 Mei kind, vann sindah dich lokka,gebb nett ei zu eena.
11 Vann si sawwa, “Kumm mitt uns;vella uns fashtekla un voahra fa ebbah sei bloot fageesa,vella uf ebbah unshuldiches lohs gay unni uahsach;
12 vella si levendich shlukka vi da doht dutt,vella si gans shlukka vi’s grawb dutt;
13 miah kenna alli sadda keshtlichi sacha greeya,miah filla unsah heisah mitt em sach es miah shtayla;
14 kumm un gay mitt uns,alli-ebbah grikt sei shiah fumm sach.”
15 Mei kind, gay nett mitt eena,hald dei fees aus iahra pawt.
16 Iahra fees shpringa zumm evila,si sinn kshvind am bloot fageesa.
17 Es dutt kenn goot fa en fang-net aus shpredda,diveil es di fekkel am vatsha sinn.
18 Dee mennah leiya am voahra fa iahra ayya bloot;si setza en fall es si selvaht doht macht.
19 So gayt’s mitt alli-ebbah es greedich is fa feel sach,sell nemd’s layva vekk funn selli es iahra sach so greeya.
En Vanning Fa Veisheit Ohnemma
20 Di veisheit rooft laut in di shtrohs;see lost iahra shtimm heahra in di market-bletz.
21 See rooft naus in di yachtichi shtrohsa,an di doahra funn di shtatt sawkt see dee vadda:
22 “Diah dummi leit, vi lang vellet diah dumm bleiva,vi lang zayla shpoddah gleicha ohhalda shpodda,un vi lang zayla di unksheida eisicht hassa?
23 Nemmet acht vann ich eich zank,gukket moll, ich leah mei geisht aus uf eich,un mach mei vadda bekand zu eich.
24 Ich habb naus groofa zu eich,avvah diah hend’s nett gedu fa abheicha,ich habb mei hand naus kshtrekt,un nimmand hott sich bekimmaht diveyya.
25 Diah hend awl mei roht fa’acht,un hend mei shtrohf nett havva vella.
26 So zayl ich lacha vann diah in druvvel sind,un ich zayl shpodda vann angsht eich ivvah-nemd.
27 Vann angsht ivvah eich kumd vi en shtoahm,vann druvvel ivvah eich kumd vi en vind-veahvel,un vann dreebsawl un druvvel ivvah eich kumd,
28 no zayla si roofa zu miah, avvah ich zayl kenn andvat gevva;si zayla mich oahrich sucha, avvah si zayla mich nett finna,
29 veil si eisicht kast henn,un henn em HAH sei furcht nett havva vella.
30 Si henn mei roht nett ohgnumma,un henn mich nett glost si recht setza,
31 so zayla si di frucht essa funn iahra ayknah vayk,un zayla satt sei mitt di frucht funn iahra shkeems.
32 Di dumma drayya vekk un sell macht si doht;di aldvannisha sinn unbekimmaht un kumma um.
33 Avvah veah mich abheicht zayld aus di kfoah layva;eah zayld im roo voona un sich nett feicha funn evil.”
