Jo, de Schreft kaun halpen. De Rot ut de Schreft, waut hia aunjejäft es, kaun die halpen, wan du Jeltsorjen ooda Schult hast:

1.   De Onkosten äwaräakjnen. “Väasechtich plonen, brinjt eenem Vedeenst, soo secha aus aufbrutschen, Oamoot brinjt” (Spricha 21:5, PB). Eena doaf nich emma fuaz aules kjeepen, bloos wäajen daut em Aufschlach es. Sie die eenich, woo väl du utjäwen west un hool die doaraun.

2.   Duck die nich onneedich enne Schult en. “Wäa doa borcht, es däm sien Sklow, dee am daut borcht” (Spricha 22:7, PB). Wan du aul enne Schult best un du daut nich kaust soo trigjtolen, aus jie berät haben, dan proow daut fresch to beräden, woo du dänjanjen betolen kaust. Bliew aunhoolent. Unjasto die dän biblischen Rot fa soone, waut onbedocht fa eenen aundren goot jesajcht haben un doaderch de Schult haben: “Go un bieej die ver am, un pracha am die loostoloten. Lot diene Uagen nich schlopen un diene Uagenläda nich schleeprich woaren” (Spricha 6:1-5, PB). Wan daut toom ieeschte Mol uk nich schauft, waut aundret to beräden, proow daut doawäajen wieda to doonen.

3.   Denkj rajcht äwa daut Jelt. “Een jiezja Maun es bejierich rikj to woaren; hee denkjt nich doaraun daut am Oamoot äwafaulen woat” (Spricha 28:22, PB). Bejia un Aufgonst kaun eenem nich bloos em tieteljen raufbrinjen, oba uk em jeisteljen.

4.   Sie tofräd. “Wan wie Kjleeda un Äten haben, doamet sell wie tofräd sennen” (1. Timotäus 6:8, PB). Met Jelt kjenn wie ons nich Freid ooda Tofrädenheit kjeepen. Eent von de schaftichste Menschen oppe Welt sent dee, waut nich een deel Jelt haben. Oba waut dee haben, daut es de Leew von äare Famielje un von äare Frind un dee sent Frind met Gott (Spricha 15:17; 1. Petrus 5:6-7).