WAUT JUNGE MENSCHEN WEETEN WELLEN
Woo kaun ekj mien Jewessen oppschoapen?
Met waut kaun eena eenem sien Jewessen vejlikjen?
Met eenen Nuadwiesa
Met eenen Spieejel
Met eenen Frint
Met eenen Rechta
Aule vea Auntwuaten sent rajcht. En disen Artikjel woa wie seenen, wuarom.
Waut es een Jewessen?
Dien Jewessen es waut en die, waut die sajcht, waut rajcht un orrajcht es. De Schreft sajcht, daut de Menschen “daut em Hoat jeschräwen es, waut daut Jesaz velangt” (Reema 2:15, PB). Wan du dien Jewessen fein oppjeschoapt hast, dan kaust du die fa daut rajchte entscheiden, un daut halpt die uk notoseenen, aus daut goot wia, waut du ea entscheiden deetst.
Dien Jewessen es soo aus een Nuadwiesa. Daut wiest die dän rajchten Wajch un du kaust die doaderch Trubbel spoaren.
Dien Jewessen es soo aus een Spieejel. Daut wiest die, woo du werkjlich best un woo du äwa rajcht un orrajcht denkjst.
Dien Jewessen es soo aus een gooda Frint. Daut kaun die gooden Rot jäwen un halpen, daut aules fein utkjemt, wan du doano horchst.
Dien Jewessen es soo aus een Rechta. Daut sajcht die, wan du irjentwaut nich rajcht deist.
Een goodet Jewessen kaun die halpen goot to entscheiden
De Sach es: Dien Jewessen es sea needich, (1) daut du die kaust fa daut goode entscheiden un (2) diene Fäla gootmoaken un dee nich wada doonen.
Wuarom saust du dien Jewessen oppschoapen?
De Bibel rot ons too: “Hoolt jun Jewessen rein” (1. Petrus 3:16, PB). Daut es nich soo leicht, wan eena eenem sien Jewessen noch nich oppjeschoapt haft.
Jennifer sajcht: “Ekj luach miene Elren väa un säd dee daut nich, wua ekj jewast wia. De ieeschte poa Mol ploagd mie mien Jewessen sea, oba met de Tiet hieed daut dolla opp.”
Irjentwanea horcht Jennifer dan no äa Jewessen un vetald äare Elren aules un hieed gaunz doamet opp, äare Elren tootosaten.
Denkj mol no: Wanea haud Jennifer aul sult no äa Jewessen horchen?
Matthew sajcht: “Daut es schwoa un stressich, wan eena prooft, soo aus twee Menschen to läwen. Wan du die to waut schlajchtet entscheiden deist un nich no dien Jewessen horchst, dan woascht du daut irjentwanea wada doonen.”
Eenje Menschen horchen newers no äa Jewessen. De Schreft sajcht: “See sent stomp jeworden jäajen aules, waut äa ieejnet Jewessen an sajen kunn” (Efeesa 4:19, PB). De Good News Translation sajcht daut soo aus dit: “Dee schämen sikj fa nuscht mea.”
Denkj mol no: Jeit soone Menschen daut werkjlich bäta, wan dee sikj nich mea schuldich feelen, wan dee waut orrajchtet jedonen haben? En waut fa Trubbels woaren dee sikj nenjäwen?
De Sach es: Wan du west een goodet Jewessen haben, dan motst du die doarenn eewen, “tweschen goot un schlajcht to unjascheeden” (Hebräa 5:14, PB).
Woo kaust du dien Jewessen oppschoapen?
Wan du dien Jewessen oppschoapen west, dan brukst du waut, wua du die no rechten kaust, un dan kjikj, aus dien Läwen met daut stemt. Eenje Menschen rechten sikj no:
Famielje un Kultua
aundre Jugentliche
sea bekaunde Menschen
Oba de Schreft haft dän basten Rot fa ons. Un daut es uk kjeen Wunda, wiels de gaunze “Schreft [es] von Gott jejäft” (2. Timotäus 3:16, PB). Hee haft je ons jemoakt un weet, waut daut baste fa ons es.
See wie mol een poa Biespels.
WAUT DE SCHREFT SAJCHT: “Wie wellen en aules, waut wie doonen, opprechtich sennen” (Hebräa 13:18, NW).
Waut deit daut aun dien Jewessen, wan du aun disen Varsch denkjst un dan aufjeprooft woascht to stälen, diene Elren väatolieejen ooda eenen Test orrajcht uttofellen?
Woo woat die daut nu un uk lota toom gooden sennen, wan du no dien Jewessen horchst un emma opprechtich best?
WAUT DE SCHREFT SAJCHT: “Rant wajch von aule Huararie” (1. Korinta 6:18, PB).
Waut deit daut aun dien Jewessen, wan du aun disen Varsch denkjst un dan aufjeprooft woascht noaktje Bilda to kjikjen ooda verem befrieen Sex to haben?
Woo woat die daut nu un uk lota toom gooden sennen, wan du no dien Jewessen horchst un von Huararie wajchranst?
WAUT DE SCHREFT SAJCHT: “Siet leewa von Hoaten leeftolich eena toom aundren. Vejäft junt unjarenaunda” (Efeesa 4:32, PB).
Woo kaun dis Varsch die halpen, wan du die met eent von dien Jeschwista ooda met eenen Frint oneenich woascht?
Woo woat die daut nu un uk lota toom gooden sennen, wan du no dien Jewessen horchst un von Hoaten vejefst un leeftolich best?
WAUT DE SCHREFT SAJCHT: “Jehova . . . haust aul dee, waut Jewault leewen” (Psalm 11:5, NW).
Woo kaun dis Varsch die halpen, woone Films un Programs oppem Tellewizhen un Videospäls du die utwälst?
Woo woat die daut nu un uk lota toom gooden sennen, wan du no dien Jewessen horchst un Jewault haussen deist?
EENE WOARE JESCHICHT: Jeremy sajcht: “Ekj un eenje von miene Frind spälden Videospäls, wua Jewault jebrukt wort. Oba miene Pape säd mie daut gaunz auf. Dan deed ekj daut bloos bie miene Frind un räd doa tus nuscht von. Wan miene Pape mie fruach, waut loos wia, säd ekj, daut met mie aules goot wia. Eenen Dach läsd ekj Psalm 11:5 un dan funk ekj mie aun sea schlajcht to feelen äwa daut, waut ekj deed. Ekj wist, ekj must doamet opphieren, un ekj deed daut dan uk. Eent von miene Frind wort daut en un hieed uk opp dise Videospäls to spälen.”
Denkj mol no: Wanea funk Jeremy sien Jewessen aun to schaufen un wanea horcht dee dan no sien Jewessen? Waut lieet ons Jeremy siene Jeschicht?
De Sach es: Dien Jewessen sajcht die, wäa du best un waut du fa wichtich talst. Woo steit daut met dien Jewessen?
Veleicht jleichst du uk dit
WAUT JUNGE MENSCHEN SAJEN
Wuarom wie Gloowen haben – Soo läwen, aus Gott daut fa rajcht talt un nich wie selfst
Junge Menschen lajen ut, woo see de schlajchte Foljen väabieejen deeden, waut väle von äare Schoolpoatna hauden.
WAUT JUNGE MENSCHEN SAJEN
Junge Menschen vetalen von de Schreft läsen
Läsen es nich emma leicht, oba daut loont sikj, de Schreft to läsen. Vea junge Menschen vetalen, woo an daut jeholpen haft, de Schreft to läsen.
WAUT JUNGE MENSCHEN WEETEN WELLEN
Woo kaun de Bibel mie halpen? – Poat 1: En de Bibel kaust du mea finjen, aus du denkjst
Wan du eenen grooten, oolen Kausten fungst, wurscht du dan nich nieschierich sennen, waut doa bennen wia? De Bibel es krakjt soo. Doa es väl wieetvollet bennen.
