Feelst du die äwameed? Dan kaun dis Artikjel die halpen.

•  Wuarom kaun daut soo wiet komen?

•  Wuarom saul eena oppaussen?

•  Waut kaun eena doonen?

•  Waut aundre Jugentliche sajen

•   Wan eena äwalot es. Eene Mejal, waut Julie heet, sajcht: “Von ons woat velangt, daut wie ons en aules emma vebätren, ons emma fa waut hechret utlieren un daut aules noch emma bäta utkomen saul. Daut es schwoa, wan eenem emma nojeschowen woat.”

•   Niemootsche Sachen. Eena kaun 24 Stund dän Dach, 7 Doag de Wäakj met Fons, Tablets un aundre Sachen to doonen haben. Daut kaun eenem stressich un äwameed moaken.

•   Nich jenuach schlopen. Eene Mejal, waut Miranda heet, sajcht: “Väl junge Menschen sent en daut Loch jefollen, daut see emma tiedich oppstonen un lot schlopen gonen wäajen Oabeit, School un Tietvedrief.” Daut feelt sikj soo, dee kjennen doa nich rut un woaren doaderch äwameed.

 De Schreft rot ons too, daut wie schaufen sellen (Spricha 6:6-8; Reema 12:11). Oba dee rot ons uk too, daut nich to äwadriewen. Wäajen daut kaun ons en väl aundre Stekjen schoden, biejlikj de Jesuntheit.

 Ashley sajcht: “Eenen Dach wort ekj en, daut ekj dän Dach äwa noch nuscht jejäten haud, wäajen ekj soo väl Oppgowen aunjenomen haud. Nu hab ekj jelieet, daut daut nich goot es, jieda Oppgow auntonämen, besonda wan eenem daut schoden deit.”

 Fa Dommheit sajcht de Schreft nich: “Een läwendja Hunt haft daut bäta aus een doodja Leiw” (Liera 9:4, De Plautdietsche Bibel). Wan du aules deist, waut du afens nokjemst, dan feelst du die veleicht soo aus een stoakja Leiw, oba nich fa lang. Wan du die too äwameed moakst, kaust du groote Trubbels met de Jesuntheit kjrieen.

•   Lia nä to sajen. De Schreft sajcht: “Met Deemoot kjemt uk Weisheit” (Spricha 11:2, De Plautdietsche Bibel). Deemootje Menschen weeten, daut see nich aules kjennen, un doonen bloos daut, wua see Krauft too haben.

   Jordan sajcht: “Dee, waut daut ieeschte äwameed woaren, sent dee, waut to aules jo sajen. Dee doonen aules, waut see afens kjennen, un daut es nich deemootich. Un irjentwanea kjennen dee nich mea wieda.”

•   Vereiw die jenuach. De Schreft sajcht: “Daut es bäta, wan eena eene Hauntvoll haft, un sikj utreiwen kaun, aus wan eena twee Henj voll haft, un sikj kjwält, un vesieekjt dän Wint to jriepen” (Liera 4:6, De Plautdietsche Bibel). Schlop woat soo aus “Äten fa daut Vestaunt” jenant. De mieeschte junge Menschen schlopen nich von 8 bat 10 Stund de Nacht un dee fält daut oba.

   Brooklyn sajcht: “Wan ekj mie nich aun daut hool, woo ekj miene Tiet trajchtjeplont hab, dan schlop ekj nich jenuach. Eenjemol fält mie daut bloos, daut ekj eene Stund lenja schlopen kunn, dan wudd ekj dän näakjsten Dach schaftja sennen un bäta schaufen kjennen.”

•   Goot plonen. De Schreft sajcht: “Väasechtich plonen, brinjt eenem Vedeenst” (Spricha 21:5, De Plautdietsche Bibel). Wan du lieescht fein to plonen, wanea du waut deist un waut du deist, dan woat die daut dien gaunzet Läwen halpen.

   Vanessa sajcht: “Du kaust die väl Sorjen spoaren, wan du aules fein plonen deist. Wan du dienen Plon sitst, waut du die oppjeschräwen hast, dan es daut väl leichta to seenen, waut du bäta moaken kaust, daut du nich äwameed woascht.”