WAUT JUNGE MENSCHEN WEETEN WELLEN
Wuarom saul ekj bäden?
Väl junge Menschen bäden, oba dee doonen daut nich jieda Dach. Eenje von dee wundren veleicht, aus eena sikj bloos bäta feelt, wan eena em Jebäd äwa de Trubbels rät, ooda aus Gott werkjlich no ons horcht.
Waut es bäden?
Biem bäden kjenn wie met dän räden, dee aules jemoakt haft. Denkj mol doaräwa no, waut daut meent! Jehova es ons en aules äwaläajen, oba “hee es werkjlich von ons aula nich wiet auf” (Aposteljeschicht 17:27, PB). De Schreft sajcht waut sea intressauntet: “Nodat junt no Gott, dan woat hee uk dicht no junt komen” (Jakobus 4:8, PB).
Woo kaust du Gott noda komen?
Eene Wajch es derch daut Jebäd. Soo kaust du to Gott räden.
Eene aundre Wajch es, wan du de Schreft studieescht, wiels soo kaun Gott to die räden.
Wan du derch daut Jebäd to Jehova rätst un am derch de Schreft to die räden latst, dan woat die daut halpen, een gooda Frint met am to woaren.
Jeremy sajcht: “Eent von de jratste Iea, waut daut fa Menschen jeft, es, daut wie to Jehova, dän Aulahechsten, räden kjennen.”
Miranda sajcht: “Wan ekj Jehova aules vetalen kaun, woo ekj mie feel, dan kom ekj am noch noda.”
Horcht Gott no ons?
Wan du aun Gott jleefst un uk to am bätst, kaun daut doawäajen eenjemol schwoa sennen to jleewen, daut hee werkjlich no ons horcht. Oba de Schreft sajcht von Jehova: “Du hieescht onse Jebäda” (Psalm 65:3, PB). Un dee sajcht uk: “Schmiet aul june Sorjen opp am”. Wuarom? Wiels “hee sorcht fa junt” (1. Petrus 5:7, PB).
Denkj mol no: Nemst du die foaken de Tiet, met diene goode Frind to räden? Soo es daut uk met Gott. Bäd foaken un bruck doabie uk sienen Nomen Jehova (Psalm 86:5-7; 88:10). De Schreft rot ons uk too: “Hoolt aun met bäden” (1. Tessalonicha 5:17, PB).
Moises sajcht: “Bäden es eene Unjahoolunk tweschen mie un mienen himlischen Voda, to wäm ekj mien gaunzet Hoat utschedden kaun.”
Karen sajcht: “Met Jehova kaun ekj äwa rein aules räden, krakjt soo aus met miene Mame ooda met eene sea goode Frind.”
Äwa waut kaun eena bäden?
De Schreft sajcht: “Lot Gott met bäden un prachren un dankscheen sajen aules weeten waut junt fält!” (Filippa 4:6, PB).
Meent daut dan, daut eena em Jebäd uk kaun äwa de Trubbels räden? Jo, wiels de Bibel sajcht je: “Laj diene Laust opp däm HARN; dee woat fa die sorjen” (Psalm 55:23, PB).
Wan eena to Gott bät, dan saul eena oba nich bloos äwa de Trubbels räden. Eene Jugentliche, waut Chantelle heet, sajcht: “Ekj wudd fa Jehova nich een gooda Frint sennen, wan ekj am bloos emma no Help fruach. Ekj denkj, daut ekj am ieescht mol kaun dankscheen sajen, wiels daut jeft soo väl, wuafäa eena kaun dankboa sennen.”
Denkj mol no: Waut fa Sachen jeft daut, wuafäa du kaust dankboa sennen? Faulen die dree Sachen bie, wuafäa du Jehova vondoag kaust dankscheen sajen?
Anita sajcht: “Wie kjennen Jehova dankscheen sajen, wan daut uk bloos waut kjlienet es, soo aus eene schmocke Bloom.”
Brian sajcht: “Denkj äwa waut feinet en de Natua no ooda äwa eenen feinen Bibelvarsch, waut die sea to Hoaten jeit, un dan saj Jehova dankscheen fa daut.”
Veleicht jleichst du uk dit
WAUT JUNGE MENSCHEN SAJEN
Wuarom wie Gloowen haben – Soo läwen, aus Gott daut fa rajcht talt un nich wie selfst
Junge Menschen lajen ut, woo see de schlajchte Foljen väabieejen deeden, waut väle von äare Schoolpoatna hauden.
WICHTJE BIBLISCHE LIEREN
Horcht Gott no aule Jebäda?
Waut, wan een Mensch om waut bät, wäajen dee bejierich es? Waut, wan een Maun siene Fru schlajcht behaundelt un dan to Gott bät, daut dee am säajnen saul?
DE WOAKTORM
Horcht Gott no onse Jebäda?
De Schreft vesprakjt, daut Gott no ons horchen woat, wan wie opp de rajchte Wajch bäden.
DE WOAKTORM
Wuarom sell wie bäden?
Een deel Menschen wellen jieren weeten, waut de Schreft äwa bäden sajcht. Oba es daut werkjlich needich to bäden?
