De ieeschta Breef aun de Korinta 6:1-20
6 Wan sikj wäa von junt met sienen Brooda oneenich es, woacht dee sikj dan verem Jerecht to gonen ver soone, waut nich em Gloowen sent, enne Städ ver de Heilje?
2 Ooda weet jie daut nich, daut de Heilje de Welt rechten woaren? Un wan jie de Welt rechten woaren, sent jie dan nich emstaund, kjliene Trubbels to fiksen?
3 Weet jie daut nich, daut wie woaren Enjel rechten? Wuarom wudd jie dan nich kjennen kjliene Trubbels von dit Läwen fiksen?
4 Wan jie Trubbels von dit Läwen fiksen motten, wuarom go jie met dee dan no de Rechtasch, waut nich to de Vesaumlunk jehieren?
5 Ekj saj dit, daut jie junt schämen sellen. Es doa kjeen weisa Mensch mank junt, waut emstaund es, tweschen siene Breeda to rechten?
6 Enne Städ daut brinjt een Brooda sienen Brooda verem Jerecht, un dan noch ver soone, waut nich em Gloowen sent!
7 En Werkjlichkjeit hab jie aul vespält, wan jie junt wäajen Striedarie unjarenaunda verem Jerecht brinjen. Wuarom lot jie junt nich leewa orrajcht behaundlen? Wuarom lot jie junt nich leewa unjagonen?
8 Enne Städ daut behaundel jie aundre orrajcht un unjagonen dee, un dan noch june ieejne Breeda!
9 Ooda weet jie daut nich, daut de Ojjerajchte Gott sien Kjennichrikj nich oawen woaren? Schmäat junt nich selfst aun. Dee, waut sintelje Sorten Sex* haben; dee, waut Aufjetta aunbäden; dee, waut de Ehe bräakjen*; Mana, waut sikj loten von aundre Mana brucken toom Sex haben; Mana, waut met aundre Mana Sex haben*;
10 Stäla; bejieeje Menschen; Supa; dee, waut aundre dommsajen, un dee, waut aundre unjagonen, soone woaren Gott sien Kjennichrikj nich oawen.
11 Un doch sent eenje von junt soone jewast. Oba nu sent jie rein jewoschen; jie sent jeheilicht worden un jie sent fa jerajcht jetalt worden en dän Harn Jesus Christus sienen Nomen un met onsen Gott sienen Jeist.
12 Ekj hab to aules Frieheit, oba nich aules deent toom Gooden. Ekj hab to aules Frieheit, oba ekj lot daut nich, daut mie irjentwaut kontrollen kaun*.
13 Daut Äten es fa de Moag un de Moag es fa daut Äten, oba Gott woat met dee beid een Enj moaken. De Kjarpa es nich fa sintelje Sorten Sex*, oba fa dän Harn, un de Har es fa dän Kjarpa.
14 Oba Gott wuak dän Harn vom Doot opp un hee woat ons uk oppwakjen derch siene Krauft.
15 Weet jie daut nich, daut june Kjarpasch Christus jehieren? Wudd daut dan rajcht sennen, daut to nämen, waut Christus jehieet, un daut met eene Hua to veeenjen? Oba niemols nich!
16 Weet jie daut nich, daut jieda eena, waut met eene Hua toopkjemt, met ar een Kjarpa woat? Wiels Gott säd: “Dee beid woaren een Fleesch sennen.”
17 Oba wäa sikj met dän Harn veeenicht, dee es em Jeist eent met dän.
18 Rant wajch von sintelje Sorten Sex*! Aule aundre Sinden, waut een Mensch deit, gonen nich jäajen sienen Kjarpa. Oba wäa sintelje Sorten Sex haft, vesindicht sikj aun sienen ieejnen Kjarpa*.
19 Weet jie daut nich, daut jun Kjarpa dän heiljen Jeist sien Tempel es, waut en junt wont un dän jie von Gott haben? Jie jehieren nich junt selfst,
20 wiels Gott haft eenen huagen Pries fa junt betolt. Doawäajen, brukt junen Kjarpa toom Gott veharlichen.
Footnooten
^ See Wuaterkjläarunk bie “Sintelje Sorten Sex”.
^ Dauts, wan een befrieda Mensch met sestwäm Sex haft.
^ Wuatlich: “Mana, waut bie Mana ligjen”.
^ Ooda: “de Macht kjricht äwa mie”.
^ Opp Griechisch: “porne̱ia”. See Wuaterkjläarunk bie “Sintelje Sorten Sex”.
^ Opp Griechisch: “porne̱ia”. See Wuaterkjläarunk bie “Sintelje Sorten Sex”.
^ Ooda: “schot sienen ieejnen Kjarpa”.
