De ieeschta Breef aun de Tessalonicha 3:1-13
3 Soo, aus wie daut nich lenja uthoolen kunnen, docht wie soo, daut wia daut Baste, auleen en Ateen to bliewen.
2 Un wie schekjten junt Timotä̱us, onsen Brooda un Gott sienen Deena*, waut de goode Norecht äwa dän Christus prädicht. Wie schekjten dän toom junt em Gloowen stoakjen un treesten,
3 soo daut kjeena mucht schwak woaren* wäajen aul dit Schwoare. Wiels jie weeten selfst, daut wie soon Lieden aus dit nich kjennen utem Stich gonen*.
4 Wiels aus wie bie junt wieren, säd wie junt aul emma, daut wie wudden motten derch Schwoaret gonen. Un soo aus jie weeten, es daut krakjt soo romjekomen.
5 Doawäajen, aus ekj daut nich mea uthoolen kunn, schekjt ekj Timotä̱us toom seenen, aus jie noch tru wieren; wiels nich daut de Vesieekja junt opplatst irjentwoo aufjeprooft haud un onse Oabeit vejäfs wia.
6 Oba Timotä̱us es jroz von junt trigj no ons jekomen un haft ons de goode Norecht jebrocht von june Leew un woo tru jie sent. Hee sajcht uk, daut jie wieda Goodet von ons denkjen un daut jie ons wudden krakjt soo jieren seenen wellen aus wie junt.
7 Doawäajen, Breeda, sent wie en onse schwoare Tieden* un en ons Lieden jetreest worden. Dauts wäajen junt un daut jie wiesen, daut jie soo tru sent.
8 Wiels wan jie aus Christus siene Nofolja fauststonen, dan jeft ons daut fresch Moot*.
9 Un woo kjenn wie Gott onse Dankboakjeit wiesen wäajen junt un wäajen de groote Freid, waut wie wäajen junt ver onsen Gott späaren?
10 Wie prachren Dach un Nacht, soo iernstlich aus wie kjennen, daut wie junt muchten perseenlich seenen* kjennen un junt daut jäwen, waut junt em Gloowen fält.
11 Mucht ons Gott un Voda un ons Har Jesus eenen Wajch opmoaken, daut wie kjennen no junt komen.
12 Dan uk noch, mucht de Har doano seenen, daut june Leew jrata woat, jo, daut june Leew unjarenaunda mucht äwaranen, krakjt soo aus onse Leew fa junt deit.
13 Soo woaren june Hoaten jestoakjt woaren un jie woaren schultfrie un heilich sennen ver onsen Gott un Voda en de Tiet, wan de Har Jesus woat met aul siene Heilje toop doa sennen*.
Footnooten
^ Ooda woomäajlich: “sienen Metoabeida”.
^ Wuatlich: “metjenomen woaren”.
^ Ooda: “daut wie doafäa bestemt sent”.
^ Wuatlich: “onse Needichkjeiten”.
^ Wuatlich: “dan läw wie”.
^ Wuatlich: “jun Jesecht seenen”.
^ See Wuaterkjläarunk bie “De Tiet, daut du doa best”.
