Jeschräwen von Matäus 3:1-17
3 En dee Tiet kjeem Johanes de Deepa un prädijd en de Wiltnis von Judä̱a
2 un säd: “Habt een Leetsennen, wäajen daut Kjennichrikj vom Himmel es dicht bie.”
3 Dits jroz dee, von dän de Profeet Jesa̱ja räd, aus hee säd: “Eene lude Stemm es en de Wiltnis to hieren, waut doa sajcht: ‘Moakt Jehowa* sienen Wajch reed! Moakt siene Wäaj jlikj.’”
4 Johanes wia met Kameelen-Hoa jekjleet un hee haud een ladanet Belt om. Sien Äten wia Grausshoppasch un willa Honnich.
5 Dan kjeemen de Menschen doa no am; dee kjeemen von Jeru̱salem, von gaunz Judä̱a un de gaunze Jäajent rom dän Jo̱rdan-Riefa.
6 Dee leeten sikj en dän Jo̱rdan-Riefa von am deepen* un bekjanden frie äare Sinden.
7 Aus Johanes sach, daut doa väl Farisä̱a un Saduzä̱a hankjeemen, wua hee aundre deepen deed, säd hee to dee: “Jie Nokomen von Schlangen*, jleew jie, daut jie von Gott siene komende Wutt kjennen wajchkomen?
8 Doawäajen brinjt Frucht*, waut doa wiest, daut jie een Leetsennen haben.
9 Lot junt daut nich enkomen to sajen: ‘Wie haben Abraham, dauts ons Voda.’ Wiels ekj saj junt: Gott wudd kjennen von dise Steena fa Abraham Kjinja verendach brinjen.
10 De Akjs es aul reed toom de Beem bie de Wartel aufhaken. Secha woat jieda Boom, waut nich goode Frucht drajcht, aufjehakt woaren un em Fia jeschmäten.
11 Ekj von miene Sied deep junt met Wota wäajen jun Leetsennen. Oba dee, waut hinja mie kjemt, es stoakja aus ekj, un ekj sie daut nich mol wieet, dän siene Wratschen uttotrakjen. Dee woat junt met heiljen Jeist un met Fia deepen.
12 Hee haft sien Jereetschoft* enne Haunt un hee woat siene Draschflua gaunz reinmoaken. Hee woat sienen Weit saumlen un em Spikja oppbewoaren, oba daut Stroo woat hee met Fia vebrennen, waut nich jeit uttomoaken.”
13 Dan kjeem Jesus von Galilä̱a no dän Jo̱rdan-Riefa toom sikj doa von Johanes deepen loten.
14 Oba Johanes proowd am doavon auftohoolen un säd: “Ekj sie dee, waut sikj wudd sellen von die deepen loten un nu kjemst du no mie?”
15 Dan säd Jesus to am: “Lot daut ditmol soo sennen. Wiels dauts goot, daut wie aules nokomen, waut Gott haben well*.” Dan hilt hee am nich mea doavon auf.
16 Un aus hee sikj ieescht haud deepen loten, kjeem Jesus fuaz vom Wota väa. Un krakjt dan jinkj de Himmel* op un hee sach Gott sienen Jeist opp am raufkomen, waut soo sach aus eene Duw.
17 Un dan säd uk eene Stemm vom Himmel: “Dits mien leewa Sän, met dän ekj sea tofräd sie.”
Footnooten
^ See Wuaterkjläarunk bie “Jehowa”.
^ Ooda: “unjaducken”.
^ Ooda: “von Ottaschlangen”.
^ Ooda: habt Woakjen.
^ Ooda: “siene Forkj”.
^ Wuatlich: “waut jerajcht es”.
^ Daut griechische Wuat, waut hia jebrukt woat, kaun de “Lofthimmel” bedieden ooda de “jeistelja Himmel”.
