De Breef aun de Reema 13:1-14
13 Jieda eena saul dee unjadon sennen, waut Macht haben un äwa ons rejieren, wiels aule Macht kjemt von Gott. De Macht, waut dise nu opp Stekjen haben, haben dee von Gott jekjräajen.
2 Doawäajen, wäa sikj jäajen dise Harscha stalt, dee schauft jäajen daut, waut Gott enjerecht haft. Un wäa sikj jäajen dise Enrechtunk stalt, dee brinjt daut Jerecht opp sikj selfst.
3 Dee, waut Goodet doonen, brucken nich Angst haben fa dise Harscha, oba bloos dee, waut Schlajchtet doonen. West du onen Angst sennen fa dise Harscha? Dan doo Goodet un dee woaren die doafäa lowen.
4 Daut sent Gott siene Deena, waut die toom Gooden sent. Oba wan du Schlajchtet deist, dan hast du eenen Grunt, Angst to haben, wiels dee droagen äa Schwieet nich onen Uasoak*. Daut sent Gott siene Deena un dee strofen dee, waut Schlajchtet doonen.
5 Doawäajen es doa goode Uasoak, dee unjadon to sennen; nich bloos, om dee äare Wutt utem Stich to gonen, oba uk, om een goodet Jewessen to haben.
6 Dauts wuarom jie uk Taks betolen. Daut sent Gott siene Deena un dee doonen eendrajchtich disen Deenst.
7 Jäft jieda eenem daut, waut dän traft: Wäa Taks velangt, dän jäft Taks; tolt de Rejierunk daut, waut dee velangt; wäa Forcht velangt, dän fercht; wäa Iea velangt, dän jäft Iea.
8 Siet kjeenem irjentwaut schuldich, buta junt unjarenaunda to leewen. Wäa sienen Näakjsten leeft, dee erfelt daut Jesaz.
9 Wiels daut jeschräwne Jesaz sajcht: “Doo nich de Ehe bräakjen*, doo nich dootmoaken, doo nich stälen, lot die nich eenem aundren sient jankren” un wautemma daut noch fa een Jeboot jeft, dauts aula en dise Wieed toopjefot: “Leew dienen Näakjsten krakjt soo sea aus die selfst.”
10 Leew deit dän Näakjsten nich Schlajchtet aun; doawäajen erfelt de Leew daut Jesaz.
11 Doot dit, wäajen jie weeten, daut de Tiet fa junt jekomen es, vom Schlop opptowakjen. Wiels onse Radunk es nu noda aus don, aus wie toom Gloowen kjeemen.
12 De Nacht es meist derch un de Dach es dicht bie. Doawäajen well wie met de Woakjen opphieren, waut toom Diestren jehieren, un well wie de Jewäaren vom Licht metdroagen.
13 Well wie ons natieedlich oppstalen, soo aus wan daut äwadach es: nich utjehoakte Fasten* haben; ons nich besupen; nich sintelje Sorten Sex haben; nich een sinteljet, schomplooset Benämen* haben; nich strieden un nich aufjenstich sennen.
14 Enne Städ daut hoolt junt enj aun dän Harn Jesus Christus sien Biespel un plont nich em Verut, woo jie daut tofrädstalen kjennen, waut jun Fleesch jankat.
Footnooten
^ Ooda: “dee haben de Macht un daut Rajcht, soone to strofen, waut Orrajchtet doonen”.
^ Dauts, wan een befrieda Mensch met sestwäm Sex haft.
^ Ooda: “wille Fasten”.
^ Hia woat opp Griechisch daut Wuat “ase̱lgeia” jebrukt opp Meazol. See Wuaterkjläarunk bie “Sinteljet, schomplooset Benämen”.
