JEHOVA deit foaken waut sea feinet toom dee beschitzen, waut too junk sent un sikj nich selfst beschitzen kjennen. Wan du mol oppe Stap jeist, dan woascht du veleicht seenen, woo Jehova daut biejlikj deit, wan du daut veleicht uk nich fuaz enwoascht, waut doa aunjeit.

Hast du mol een Voagel jeseenen, waut sikj oppe Ieed dicht bie die sad? Daut leet veleicht soo, daut et waut jeworden wia, wiels daut schlapt eene Flicht hinjaraun. Wan du daut Voagel uk hinjaraun jinjst, leet sikj daut oba nich dicht bie komen. Un opp eenst haustich fluach daut wajch. Daut Voagel äare Flicht schod doch nuscht! Weetst du, waut daut Voagel deed? —

Na, doa dicht bie, wua daut Voagel sikj sad, wieren daut Voagel äare Kjlienakjes em Bosch vestoaken. De Kjlienakjes äare Mame haud Angst, daut du dee wurscht finjen un dee waut aundoonen. Un doawäajen deed dee sikj soo, daut ar waut jeworden wia, om daut dee die doa kunn wajchlocken. Weetst du, wäa die soo beschitzen kaun, aus daut groote Voagel äare Kjlienakjes deit? — En de Schreft woat jesajcht, daut Jehova soo es aus een Odla, waut siene Kjlienakjes halpt (5. Mose 32:11-12).

De Sän, dän Jehova daut mieeschte räakjent, es Jesus. Aus Jesus em Himmel wia, wia hee sea stoakj, soo aus sien Voda. Hee kunn no sikj selfst oppaussen. Oba aus Jesus hia oppe Ieed jebuaren wort, wia je hee bloos een Bäbe un am must wäa beschitzen.

Jesus kunn nich fuaz daut doonen, to waut Gott am jeschekjt haud, hee must ieescht groot woaren. Doawäajen proowd de beesa Fient am mieremol doottomoaken, aus Jesus noch kjlien wia. Oba Jehova deed Jesus emma wada beschitzen. Jankat die to weeten woo? —

Een Stootskje nodäm aus Jesus jebuaren wia, muak de beesa Fient daut soo, daut doa em Oosten aum Himmel waut dachet to seenen wia, waut no een Stiern leet. Soone Mana, waut äwa de Stierns lieeden, jinjen daut Stiern gaunz bat Jerusalem hinjaraun. Doa fruagen dee, wua deejanja sull jebuaren woaren, waut de Juden äa Kjennich wudd sennen. Un aus de Mana, waut de Schreft goot kjanden, doano jefroacht wort, säden dee: “En Betlehem” (Matäus 2:1-6, PB).

En Jerusalem wia een schlajchta Kjennich, waut Herodes heet. Aus hee von disen nieen Kjennich hieed, waut doa dicht bie en Betlehem jebuaren wia, säd hee to de Mana, waut äwa de Stierns lieeden: “Got un sieekjt bat jie daut Kjint finjen woaren, un wan jie daut jefungen haben, dan komt un sajcht mie daut”. Weetst du, wuarom Herodes wull weeten, wua Jesus wia? — Daut wia, wäajens Herodes aufjenstich wia un Jesus wull loten dootmoaken.

Woo deed Gott sienen Sän beschitzen? — Aus dise Mana Jesus jefungen hauden, jeewen dee dän Jeschenkja. Lota säd Gott to dise Mana en eenen Droom, daut see nich trigj no Herodes gonen sullen. Doawäajen reisden dee opp eenen aundren Wajch trigj no Hus un nich derch Jerusalem. Aus Herodes daut enwort, daut dise Mana aul wajch wieren, wia hee sea doll. Herodes wull Jesus dootmoaken un doawäajen leet hee aul de Junkjes en Betlehem dootmoaken, waut unja twee Joa wieren. Oba Jesus wia dan aul nich mea doa.

Weetst du, wuarom Jesus nich mea doa wia? — Aus de Mana, waut äwa de Stierns lieeden, ieescht wajch wieren, säd Jehova to Maria äaren Maun Josef, daut hee schwind sull von doa veloten un no Ägipten reisen. Doa kunn de schlajchta Herodes Jesus nuscht mea doonen. Joaren lota, aus Josef un Maria met Jesus toop trigjkjeemen von Ägipten, säd Gott noch wada waut to Josef. Hee säd to dän en eenen Droom, daut dee sullen no Nazaret trakjen, wiels doa wudd Jesus nuscht woaren (Matäus 2:7-23).

Jehova beschizt Jesus aus hee noch kjlien wia, krakjt soo aus daut Mame-Voagel äare Kjlienakjes beschitzen deed. Best du nich uk soo aus dee? Fält die daut nich uk, daut die wäa beschitzen deit? — Daut jeft soone, waut die wellen waut dommet aundoonen. Weetst du wäa? —

De Schreft sajcht, daut de beesa Fient soo aus een brellenda Leiw es, waut ons verieten well. Un krakjt soo aus de Leiws foaken kjlandre Tieren hinjaraun sent, soo sent de beesa Fient un siene beese Jeista uk foaken Kjinja hinjaraun (1. Petrus 5:8). Oba Jehova es stoakja aus de beesa Fient. Jehova kaun siene Kjinja beschitzen ooda daut wada gootmoaken, waut de beesa Fient dee aunjedonen haft.

Denkjt die daut noch, waut wie en daut 10. Kapitel en dit Buak jelieet haben? Weetst du noch, woo de beesa Fient un siene beese Jeista ons kjrieen wellen? — Jo, dee wellen haben, daut wie nich no daut horchen sellen, waut Gott sajcht äwa Sex. Oba weetst du noch, wäa bloos de Frieheit haft, Sex to haben? — Jo, bloos twee groote Menschen; een Maun un eene Fru, waut eene Lied sent.

Oba daut jeft eenje schlajchte Menschen, waut jleichen, met Kjinja Sex to haben. Eenje Junges un Mejales, waut soont beläft haben, doonen daut dan eenjemol uk to aundre, waut se to an deeden. Dee brucken äa Jeschlajcht dan uk opp eene orrajchte Wajch. Soont passieed uk aul lang trigj en de Staut Sodom. De Schreft sajcht, daut doa “junge un oole” Mana proowden, Sex to haben met de Mana, waut no Loot jekomen wieren (1. Mose 19:4-5, PB; von ons dunkel jemoakt).

Soo, krakjt soo aus Jesus, fält die daut uk, daut se die beschitzen von groote Menschen — un mau rajcht von aundre Kjinja — waut doa veleicht proowen, met die Sex to haben. Jeweenlich woaren soone Menschen sikj soo doonen, daut see diene Frind sent. Dee sajen veleicht, dee woaren die waut feinet jäwen, wan du daut vesprakjst, kjeenem daut to sajen, waut dee met die doonen wellen. Oba dise Menschen denkjen bloos aun sikj selfst, krakjt soo aus de beesa Fient un de beese Jeista. Soone Menschen denkjen bloos aun daut, waut an scheen jeit un doatoo proowen dee, Sex to haben met Kjinja. Oba daut es sea orrajcht!

Weetst du, waut dee veleicht met die wudden wellen doonen? — Na veleicht woaren dee proowen, bie die doa unjen met dien Jeschlajcht to spälen. Ooda veleicht doonen dee mau rajcht äa Jeschlajcht aun dient aunschieren. Oba du saust daut kjeenmol loten, daut doa wäa met dienen Pischat (Penis) ooda diene Wagiena spält. Daut saul nich mol dien Brooda ooda Sesta ooda dien Voda ooda Mutta doonen. Kjeena saul met dise Poats von dienen Kjarpa spälen.

Woo kaust du oppaussen, daut kjeena soont aus daut aun dienen Kjarpa deit? — Ieeschtens, du motst kjeenem loten met dien Jeschlajcht doa unjen spälen. Wan irjentwäa daut prooft to doonen, dan saj gaunz iernst un lud: “Hia opp! Ekj woa daut kloagen!” Un wan dee dan sajcht, daut et diene Schult es, waut dee deed, jleew daut nich, daut es nich soo! Go un kloag von dän, krakjt endoont wäa daut es. Du saust daut mau rajcht dan kloagen, wan dee uk sajcht, daut daut, waut jie toop doonen, gaunz plietsch es un daut sest kjeena daut weeten saul. Un uk, wan dee die vesprakjt, daut dee die woat waut sea feinet jäwen ooda wan dee die engrult, daut dee woat waut schlemmet doonen. Du motst von dänjanjen wajchranen un daut to wäm kloagen.

Du brukst nich Angst haben, oba du motst oppaussen. Wan diene Elren sajen, daut irjenteen Mensch ooda irjenteene Städ kunn jefäadlich sennen fa die, dan motst du dee jehorchen. Wan du no dee horchst, dan woat een schlajchta Mensch die nich sea leicht kjennen waut dommet aundoonen.