KAPITEL 8

Woo kaun ekj goode Frind finjen?

“Wan ekj doll sie, dan mott ekj met wäm doaräwa räden, un wan ekj truarich sie, dan bruck ekj wäm, waut to mie sajcht, daut woat noch bäta woaren. Wan ekj schaftich sie, dan well ekj wäm haben, waut sikj met mie toop freit. Mie fält daut eefach, Frind to haben”(Brittany).

DE Frind, waut kjliene Kjinja fält, sent aundasch aus de Frind, waut Jugentliche fält.

Kjinja brucken bloos wäm, met dän dee kjennen toop spälen.

Jugentliche fält daut aun Frind, waut dee halpen un biestonen.

De Schreft sajcht: “Een Frint woat emma Leew bewiesen, un een Brooda es jebuaren toom em Trubbel biestonen” (Spricha 17:17, PB). Soon Frint aus dit es secha aundasch aus soon Frint, waut met die toop späld, aus du kjlien wieescht.

Woo daut es: Wan du groot woascht, dan fält die daut aun Frind, waut . . .

1. goode Menschen sent.

2. sikj fein oppstalen.

3. die halpen kjennen, een bätra Mensch to woaren.

Froag: Woo kaust du soone Frind finjen? Well wie dise dree Punkta mol derchgonen.

Wichtjet toom Frind finjen: 1. Daut et goode Menschen sent

Waut du weeten sust. Nich aula, waut sajen, daut se diene Frind sent, sent opp iernst diene Frind. De Schreft sajcht mau rajcht: “Eenje Frind halpen nuscht” (Spricha 18:24, PB). Daut hieet sikj veleicht hunjsch, oba denkj mol no: Haft die daut mol soo jegonen, daut wäa säd, daut dee dien Frint wia, bloos wäajens dee waut von die wull? Ooda daut wäa hinja dienen Rigjen äwa die räd ooda soont von die vetald, waut nich soo wia? Wan soont passieet, dan wurscht du veleicht nich mea opp dän vetruen. * Hool emma em Denkj: Daut es bäta goode Frind to haben, aus een deel Frind to haben!

Waut du doonen kaust. Sieekj die goode Frind, waut du nodoonen west.

“Aula räden goot von miene Frint Fiona. Ekj well, daut se von mie uk soo goot räden aus von ar. Ekj denkj Wunda von ar un ekj well uk soo sennen aus see” (Yvette, 17).

Proow dit.

1. Läs Galata 5:22-23.

2. Denkj äwa dit no: “Sent miene Frind soo aus daut en dise Bibelvarzhen sajcht”?

3. Schriew hia unjen de Nomes han, von diene baste Frind. Biesied dee äare Nomes schriew opp, waut die daut ieeschte biefelt, woo dee daut haben.

Nomen

․․․․․

Woo dee daut haft

․․․․․

Pauss opp: Wan die bloos schlajchtet biefoll, dan es daut veleicht Tiet, die bätre Frind to sieekjen!

Wichtjet toom Frind finjen: 2. Daut dee sikj fein oppstalen

Waut du weeten sust. Je dolla du no Frind hinjaraun best, je leichta wurscht du kjennen orrajchte Frind kjrieen. De Schreft sajcht: “Wäa met Noaren vekjieet, woat Schoden lieden” (Spricha 13:20, PB). Een Noa es nich eena, waut enne School nich metkjemt ooda een Onkluaka. No de Schreft no es daut soona, waut nich no gooden Rot horcht un met Fliet schlajchtet deit. Aun soone Frind fält die daut goanich!

Waut du doonen kaust. Sie nich bloos met irjentwäm Frind; wäl die diene Frind goot ut (Psalm 26:4). De Schreft rot ons too to seenen, “waut de Unjascheet es tweschen de jerajchte un de gottloose, un tweschen dee waut am [Gott] deenen, un dee waut am nich deenen” (Maleachi 3:18, PB).

“Ekj sie dankboa, daut miene Elren mie holpen, Frind to finjen mank aundre Jugentlich, waut Gott jefaulen wellen” (Christopher, 13).

Beauntwuad dise Froagen:

Wan ekj met miene Frind toop sie, hab ekj dan Angst, daut dee mie woaren metrieten waut to doonen, waut ekj weet, daut et orrajcht es?

□ Jo

□ Nä

Well ekj nich haben, daut miene Elren sellen weeten, wäa miene Frind sent, wäajens ekj Angst hab, daut dee dee nich woaren jleichen?

□ Jo

□ Nä

Pauss opp: Wan du dise beid Froagen hia bowen met “Jo” beauntwuat hast, dan sieekj die Frind, waut sikj bäta oppstalen – soone, waut proowen Gott to jefaulen.

Wichtjet toom Frind finjen: 3. Daut dee die halpen kjennen, een bätra Mensch to woaren

Waut du weeten sust. De Schreft sajcht: “Schlajchte Jesalschoft vedoaft goode Aunjewanheiten” (1. Korinta 15:33, PB). Eene Jugentliche, waut Lauren heet, sajcht: “Miene Schoolpoatna wullen met mie Frind sennen, soo lang aus ekj daut deed, waut dee mie väasäden. Ekj wull nich auleen sennen un doawäajen stald ekj mie krakjt soo opp aus dee.” Lauren wort en, wan eena daut deit, waut eenem siene Frind eenem väasajen, dan kontrollen dee eenem. Du kaust bätre Frind finjen aus soone!

Waut du doonen kaust. Hia opp, met soone Menschen Frind to sennen, waut die wellen bemotten, soo to sennen aus dee. Opp dee Wajch woascht du veleicht weinja Frind haben, oba du woascht die bäta feelen un du woascht kjennen bätre Frind finjen – soone, waut die woaren halpen, een bätra Mensch to woaren (Reema 12:2).

“Mien gooda Frint Clint moakt goode Entscheidungen un haft met aundre Metjefeel. Un doawäajen es hee mie aul sea toom gooden jewast” (Jason, 21).

Denkj mol äwa dit no:

Enda ekj daut, woo ekj mie auntrakj, woo ekj räd ooda waut ekj doo, bloos wäajens miene Frind?

□ Jo

□ Nä

Wank ekj no soone Städen, wua ekj weet, daut ekj doa nich han sull, bloos toom miene Frind jefaulen?

□ Jo

□ Nä

Pauss opp: Wan du eent von dise Froagen hia bowen met “Jo” beauntwuat hast, dan froag diene Elren ooda eenen aundren erfoarnen Mensch no Help. Wan du eent von Jehova siene Zeijen best, dan kaust du uk eenen Eltesten no Help froagen.

[Footnoot]

WICHTJA BIBELVARSCH

“Doa es een Frint dee fausta biesteit aus een Brooda” (Spricha 18:24, PB).

IEDEE

Wan du proofst, daut rajchte to doonen, dan woat daut fa die leichta sennen, soone Frind to finjen, waut daut uk proowen to doonen. Un soont sent de baste Frind!

HAST DU DAUT JEWIST . . .?

Gott moakt nich eenen Unjascheet manke Menschen, oba hee läst sikj dee goot ut, waut hee lat en sienen “Tempel nenkomen” (Psalm 15:1-5, PB).

WAUT EKJ DOONEN WELL!

Toom goode Frind finjen, well ekj ․․․․․

Wäa, waut ella sent aus ekj, waut ekj wudd jleichen aus Frind to haben, sent ․․․․․

Waut ekj miene Elren äwa dit wudd wellen froagen, es ․․․․․

WAUT JLEEFST DU?

● Waut wurscht du daut dolste jleichen, woo een Frint daut sull haben, un wuarom?

● Aun waut motst du noch schaufen toom een bätra Frint woaren?

[Takjst]

Aus miene Elren to mie säden, daut ekj sull von eene jewesse Grupp Frind wajchbliewen, jleicht ekj daut nich, wiels daut wieren dee, waut ekj aus Frind wull haben. Oba miene Elren äa Rot wia goot, un aus ekj doaräwa nodocht, wort mie daut dietlich, daut ekj kunn bätre Frind finjen’’ (Cole).

[Kausten]

Proow dit:

Räd met diene Elren äwa Frind haben. Froag dee, waut vonne Frind dee hauden, aus dee en dien Ella wieren. Wälden dee sikj mol orrajchte Frind, waut an lota leet wia? Wan jo, woosoo? Froag dee uk, woo du eenje Trubbels, waut dee beläwden, kaust utem Stich gonen.

Lot diene Elren uk diene Frind kjanen lieren. Wan die daut nich jankat, dan äwalaj: “Wuarom nich?” Es doa waut, waut du weetst, waut diene Elren von diene Frind nich woaren jleichen? Wan daut soo es, dan sust du veleicht een bät dolla oppaussen, waut vonne Frind du die sieekjst.

Horch diene Frind goot too. Wies, daut du daut weeten west, waut dee denkjen un uk, daut du om dee todoonen best (Filippa 2:4).

Vejäw diene Frind. Velang nich, daut dee kjeenen Fäla moaken woaren. De Schreft sajcht: “Wie moaken je aula foaken Fäla” (Jakobus 3:2, NW).

Lot dienen Frint uk mol auleen sennen. Daut es nich needich, emma met diene Frind toop to sennen. Woare Frind woaren fa die doa sennen, wan die daut fält (Liera 4:9-10).

[Bilt]

Wan du emma daut deist, waut aundre wellen haben toom met dee tooppaussen, dan best du soo aus een Kjlaz von een Gäm, waut dee kjennen soo romschuwen aus dee wellen