Aus de Apostel Johanes opp de Insel Patmos faustjenomen wia, wees Jesus dän 16 veschiedne Visionen, ooda Bilda von daut, waut noch komen sull. De Visionen weesen, woo Jehova sien Nomen wudd jeheilicht woaren, woo sien Kjennichrikj komen wudd un woo sien Wellen oppe Ieed wudd jedonen woaren soo aus em Himmel.

En eene Vision sach Johanes Jehova em Himmel opp sienen harlichen Troon. Rom dän wieren 24 Eltestasch met witte Kjleeda un goldne Kroonen oppem Kopp. Von dän Troon blizt daut un rummeld. De 24 Eltestasch bekjten sikj ver Jehova un bäden dän aun. En eene aundre Vision sach Johanes eene groote Häad Menschen von aule Velkja, Raussen un Sproaken, waut Jehova aunbäden. Daut Laum, Jesus, deed dee weiden un brocht dee no daut Läwenswota. Lota, en eene aundre Vision, funk Jesus aun, met de 24 Eltestasch toop em Himmel aus Kjennich to rejieren. En de näakjste Vision sach Johanes, daut Jesus met dän Droak, waut de Soton es, un met de beese Jeista Kjrich fieed. Jesus schmeet dee utem Himmel rut un dee musten no de Ieed.

 Dan sach Johanes waut wundascheenet. Daut Laum un de 144 000 stunden opp dän Zionsboajch. Hee sach uk eenen Enjel rom de Ieed flieejen. Dee säd de Menschen, see sullen Gott ferchten un dän Iea jäwen.

En de näakjste Vision wia de Kjrich von Harmagedon to seenen. En disen Kjrich jewonnen Jesus un siene Armee dän Soton siene schlajchte Welt. En de latste Vision sach Johanes, daut em Himmel un oppe Ieed volkomne Eenichkjeit wia. De Soton un siene Nokomen worden gaunz äwatsied jeschauft. Jieda eena em Himmel uk oppe Ieed wees, daut hee Jehova sienen Nomen fa heilich tald, un bäd bloos Jehova aun.