Aus Salomo ieescht Kjennich jeworden wia, fruach Jehova dän: “Waut wenschst du die von mie?” Salomo säd: “Ekj sie noch mau junk un ekj vesto mie noch nich met väl. Jeff mie toom Jefaulen Weisheit, daut ekj no dien Volkj oppaussen kaun.” Jehova säd: “Wiels du no Weisheit jefroacht hast, woa ekj die mea Weisheit jäwen aus sest irjenteen Mensch haft. Ekj woa die uk sea rikj moaken. Un wan du no mie horchst, dan woascht du lang läwen.”

Salomo funk aun dän Tempel to buen. Hee brukt von daut baste Golt, Selwa, Holt un Steena. Dusende Mana un Frues, waut goode Oabeida wieren, schauften aun dän Tempel. Säwen Joa lota wia dee reed toom Jehova dän äwajäwen. De Tempel haud eenen Aultoa un doa wieren aul Opfa bowen. Salomo kjneed sikj ver dän Aultoa un bäd: “Oo Jehova, dis Tempel es fa die nich groot jenuach ooda schmock jenuach, oba toom Jefaulen nemm onse Aunbädunk un onse Jebäda aun.” Waut docht Jehova von dän Tempel un von Salomo sien Jebäd? Soo schwind aus Salomo verecht haud met bäden, kjeem doa Fia vom Himmel un vebrend de Opfa opp dän Aultoa. Aus de Israeliten sagen, daut Jehova met dän Tempel tofräd wia, freiden dee sikj sea.

Aulawäajen en Israel un uk wiet auf hieeden de Menschen von Salomo siene groote Weisheit. Wan wäa Trubbel haud, kjeem dee Salomo no Help froagen. Mau rajcht de Kjennijin von Saba kjeem no dän. Dee stald dän schwoare Froagen toom seenen, woo väl dee wist. Aus see Salomo siene Auntwuaten hieed, säd see: “Ekj wull daut nich jleewen, waut ekj von die hieed, oba nu see ekj, daut du noch mea Weisheit hast, aus se mie vetalden. Dien Gott Jehova haft die jesäajent.” Daut Volkj Israel haud een scheenet Läwen un see wieren sea schaftich. Oba daut bleef nich soo.