KJIKJ mol dis Maun hia em Wota. Dee es en groote Jefoa! De Fesch well dän oppschlucken! Weetst du, wäa dis Maun es? Daut es Jona. Well wie mol seenen, wuarom dee en dise Jefoa es.

Jona wia Jehova sien Profeet. De Profeet Elisa wia noch nich lang jestorwen, aus Jehova to Jona säd: ‘Go no de groote Staut Ninive. De Menschen sent doa sea schlajcht un ekj well haben, du saust dee woarnen.’

Oba Jona wull doa nich hangonen. Un soo reisd hee opp een Schepp krakjt no de aundre Rechtunk, aus wua Ninive wia. Jehova wia ontofräd, daut Jona sikj eefach fuatbrocht. Doawäajen leet Jehova eenen grooten Storm oppkomen. Dee wia soo hunjsch, daut daut Schepp unjagonen wull. De Scheppmana kjrieejen groote Angst un schrieejen to äare Jetta no Help.

Schlieslich säd Jona to dee: ‘Ekj doo Jehova aunbäden. Daut es de Gott, waut Himmel un Ieed jemoakt haft. Ekj brocht mie fuat, wiels ekj wull daut nich doonen, waut Jehova to mie säd.’ De Scheppmana fruagen am: ‘Waut sell wie met die doonen, daut dis Storm opphieet?’

‘Schmiet mie em Mäa nenn un daut Mäa woat wada ruich woaren’, säd Jona. De Scheppmana wullen daut ieeschtlich nich doonen, oba de Storm wort bloos emma stoakja, un schlieslich schmeeten dee Jona em Mäa nenn. Doamet hieed de Storm opp un daut Mäa wort wada ruich.

Jona jinkj unja un wort von dän grooten Fesch oppjeschlukt. Oba hee storf doawäajen nich. Dree Doag un dree Nachten wia Jona en dän grooten Fesch sienen Buck bennen. Jona wia daut grulich leet, daut hee Jehova nich jehorcht haud un nich wia no Ninive jegonen. Weetst du, waut hee nu deed?

Hee deed to Jehova om Help bäden. Dan muak Jehova daut soo, daut de Fesch Jona aune Kaunt Mäa utspieech. No dit jinkj Jona no Ninive. Waut kjenn wie doavon lieren? Daut wie emma daut doonen sellen, waut Jehova von ons haben well.