DISE schmocke Mejal es Maria. See es eene Israelitin un wont en de Staut Nazaret. Gott weet, daut see eene sea feine Mejal es. Doawäajen schekjt hee sienen Enjel Gabriel no ar. Weetst du, waut Gabriel to ar sajen sull? Well wie mol seenen.

‘Goondach! Du best sea jesäajent un Jehova es met die’, säd Gabriel to ar. Maria wist nich, wäa daut wia. See fercht sikj un wundad, waut daut to bedieden haud. Oba Gabriel deed ar berujen.

‘Fercht die nich, Maria’, säd hee. ‘Jehova jleicht die sea. Doawäajen haft hee fa die waut besondret em Senn. Du woascht boolt eenen Sän haben. Un du saust dän Jesus nanen.’

Gabriel säd uk noch: ‘Dee woat groot sennen un woat dän aulahechsten Gott sien Sän jenant woaren. Jehova woat dän toom Kjennich moaken, soo aus David wia. Oba Jesus woat fa emma Kjennich sennen un sien Kjennichrikj woat kjeenmol een Enj haben.’

‘Woo saul daut sennen?’, fruach Maria. ‘Ekj sie je noch nich mol befriet. Ekj sie noch kjeenmol met eenen Maun toop jewast. Woo kaun ekj dan een Kjint haben?’

‘Daut woat derch Gott siene Krauft sennen’, auntwuad Gabriel. ‘Doawäajen woat daut Kjint Gott sien Sän jenant woaren.’ Dan säd hee to Maria: ‘Denkj aun Elisabet, diene Vewaunde. De Menschen säden, dee wia aul too oolt toom een Kjint haben. Oba dee woat boolt eenen Sän haben. Du kaust seenen, daut jeft nuscht, waut Gott nich doonen kaun.’

Maria säd dan: ‘Ekj sie Jehova siene Deenarin! Daut saul aules soo woaren, aus du jesajcht hast.’ Dan veleet de Enjel.

Maria muak sikj fuaz opp un jinkj Elisabet besieekjen. Aus Elisabet Maria äare Stemm hieed, hupst daut Bäbe en äaren Buck fa Freid. Elisabet wia voll met heiljen Jeist un säd to Maria: ‘Gott haft die von aule Frues besonda jesäajent.’ Maria bleef ojjefäa dree Moonat bie Elisabet un jinkj dan wada trigj no Hus no Nazaret.

Maria wull sikj met eenen Jung befrieen, dee heet Josef. Aus Josef enwort, daut Maria wudd een Kjint haben, wull hee sikj leewa nich met ar befrieen. Oba Gott sien Enjel säd to am: ‘Hab kjeene Angst, die met Maria to befrieen. Daut es Gott, dee ar daut Kjint jeft.’ Un soo befrieden Maria un Josef sikj un luaden, daut Jesus jebuaren wort.