DE MEJAL hia es twalf Joa oolt. Jesus helt ar aune Haunt, un äare Mame un äare Pape stonen hia biesied. Weetst du, wuarom dee soo schaftich sent? Well wie mol seenen.

De Mejal äa Voda wia een aunjeseena Maun. Dee heet Jairus. Eenen Dach wort siene Dochta krank un must em Bad ligjen. Oba enne Städ bäta wort daut noch emma schlemma met ar. Jairus un siene Fru muaken sikj groote Sorjen, wiels daut leet soo, aus wan äare Dochta wudd stoawen. Daut wia äa eensjet Kjint. Soo muak Jairus sikj opp un jinkj Jesus sieekjen, wiels hee haud von de Wunda jehieet, waut Jesus deed.

Aus Jairus Jesus funk, wia doa eene Häad Menschen rom Jesus. Oba Jairus drenjd sikj doa mank un foll ver Jesus oppe Kjneeen. ‘Miene Dochta es sea, sea krank’, säd hee un prachad: ‘Komm toom Jefaulen un moak ar wada jesunt.’ Jesus säd, hee wudd metgonen.

Aus see oppem Wajch no Jairus sien Tus wieren, drenjd daut Volkj sikj eentwajch aun Jesus naun. Met eemol bleef Jesus stonen un fruach: ‘Wäa haft mie aunjeschieet?’ Jesus haud jespäat, daut von am Krauft wajchjegonen wia, un doawäajen wist hee, am haud wäa aunjeschieet. Oba wäa? Daut wia eene Fru, waut aul twalf Joa haud aun eene sea schlemme Krankheit jeläden. Dee wia jekomen un haud Jesus siene Kjleeda aunjeschieet un wia jeheelt worden!

Dit muak Jairus Moot. Hee sach, daut Jesus gaunz leicht kunn wäm jesunt moaken. Oba dan kjeem doa een Maun met eene Tiedinj. Dee säd to Jairus: ‘Diene Dochta es jestorwen. Jesus brukt aul nich komen.’ Aus Jesus daut hieed, säd hee to Jairus: ‘Sie sondasorj, aules woat wada goot woaren.’

Aus see schlieslich bat Jairus sien Tus wieren, wort doa väl jetruat un jeroat. Oba Jesus säd: ‘Hieet opp met roaren. De Mejal es goanich doot. Dee deit bloos schlopen.’ Oba de Menschen hauden sikj domm äwa Jesus, wiels see wisten neiw, de Mejal wia doot.

Dan neem Jesus Jairus un dän siene Fru un noch dree von siene Apostel met en de Stow nenn, wua de Mejal lieech. Hee foot de Mejal aune Haunt un säd: ‘Sto opp!’ Un de Mejal wort wada läwendich, soo aus du hia seenen kaust. See stunt opp un jinkj rom. Doawäajen sent äare Mame un äare Pape hia soo schaftich.

Daut wia oba nich daut ieeschte Mol, waut Jesus wäm vom Doot oppwuak. Eemol ea haud hee aul dän Sän von eene Wätfru von de Staut Nain oppjewakjt. Lota deed Jesus uk Lazarus vom Doot oppwakjen, daut wia Maria un Marta äa Brooda. Wan Jesus woat aus Gott sien Kjennich rejieren, woat hee väle, väle Menschen wada toom läwen brinjen. Es daut nich sea scheen?