WAUT es hia oppem Bilt to seenen? Daut es een Kjrichshäa opp witte Pieed. Oba kjikj mol, von wua dee komen. Dee komen vom Himmel rauf un de Pieed ranen oppe Wolkjen. Jeft daut em Himmel opp iernst Pieed?

Nä, daut jeft goanich. Dit sent nich werkjlich Pieed, wiels Pieed kjennen je nich oppe Wolkjen ranen, ooda jo? De Bibel schrift oba von Pieed em Himmel. Weetst du, wuarom?

Ieeschtemma worden Pieed foaken toom Kjrich jebrukt. Wan daut enne Bibel sajcht, daut doa Rittasch vom Himmel raufkomen, meent daut, Gott woat jäajen de Menschen oppe Ieed eenen Kjrich fieren. Weetst du, woo dis Kjrich jenant woat? Daut es de Kjrich von Harmagedon. En disen Kjrich woat Gott met aul daut schlajchte oppe Ieed een Enj moaken.

En dän Kjrich von Harmagedon woat Jesus de Väaschta sennen. Du weetst je, Jehova haft Jesus toom Kjennich jewält. Doawäajen haft Jesus uk eene Kroon oppem Kopp. Daut Schwieet en siene Haunt meent, hee woat Gott siene Fiend aula oppriemen. Saul ons daut wundren, daut Gott de schlajchte Menschen venichten woat?

Bläda mol trigj no de Jeschicht #10. Waut kaust du doa seenen? Na, daut es de groote Äwaschwamunk. Doa worden aule schlajchte Menschen venicht. Wäa brocht de Äwaschwamunk? Daut wia Jehova Gott. Nu besee die mol de Jeschicht #15. Waut passieet doa? Doa es to seenen, woo Jehova Sodom un Gomorra met Fia venichten deed.

Sieekj nu mol de Jeschicht #33. Kjikj, waut met de Ägipta äare Pieed un Kjrichswoages passieet. Wäa leet daut Mäa äwa de Ägipta toogonen? Daut deed Jehova. Hee deed daut toom sien Volkj beschitzen. Nu besee die noch de Jeschicht #76. Doa kaust du seenen, daut Jehova soogoa de Israeliten venichten leet, wiels dee soo schlajcht wieren, uk wan dee sien Volkj wieren.

Doawäajen brukt ons daut nich wundren, daut Gott woat sien himlischet Häa schekjen un met aul daut schlajchte oppe Ieed een Enj moaken. Denkj die mol han, woo scheen daut doahinja sennen woat! Wan du eent wiedablädascht, woascht du daut seenen.