KJIKJ mol de groote Beem hia, de schmocke Bloomen un de huage Boaj dort. Lat daut nich sea schmock? Un see mol de Ree, woo dee ut dän kjlienen Jung siene Haunt frat. Un de Leiws un de Pieed dort oppe Wäs. Wurscht du hia wellen wonen?

Gott well jieren haben, du saust fa emma en een Paradies hia oppe Ieed läwen. Hee well nich haben, daut du saust krank woaren ooda Weedoag haben, soo aus vondoag väle Menschen haben. Enne Bibel sajcht daut to dee, waut em Paradies läwen woaren: ‘Gott woat bie junt sennen. Doa woat kjeena stoawen motten uk nich Weedoag haben ooda truarich sennen. Daut woat daut aules nich mea jäwen.’

Jesus woat doano seenen, daut daut werkjlich soo woaren woat. Weetst du, wanea? Wan Jesus ieescht woat met aul daut schlajchte un met de beese Menschen een Enj jemoakt haben. Weetst du noch, aus Jesus oppe Ieed wia, deed hee aule Sorten Krankheiten heelen un soogoa Doodje oppwakjen. Jesus deed doamet bloos wiesen, waut hee oppe gaunze Ieed doonen wudd, wan hee ieescht wudd aus Gott sien Kjennich rejieren.

Stal die doch mol väa, woo wundascheen daut en daut Paradies woat sennen! Jesus woat vom Himmel rejieren, toop met aundre, waut hee uzhent doatoo jewält haft. Dise Kjennichs woaren doano seenen, daut jiedren eenen daut oppe Ieed woat scheen gonen. Waut mott wie doonen, daut Gott ons daut eewje Läwen em Paradies jeft? Well wie mol seenen.