Wanea un wuarom saul eene christelje Fru sikj dän Kopp bedakjen? Daut, waut Gott derch dän Apostel Paulus oppschriewen leet, woat ons halpen, en dise Sach rajcht to entscheiden, soo daut wie Gott ieren kjennen (1. Korinta 11:3-16). Paulus schreef von dreeatlei, aun waut wie denkjen sellen: (1) Wanea eene Fru sikj dän Kopp bedakjen saul, (2) en waut vonne Omstend daut needich es un (3) wuarom see daut deit.

Wanea eene Fru sikj dän Kopp bedakjen saul. Paulus räd von tweeatlei: biem bäden un profeetisch räden (Varsch 4-5). “Bäden” meent, em Gloowen met Gott to räden. Un bie “profeetisch räden” es aules met en, waut een Christ en de vondoagsche Tiet deit, om aundre von de Schreft to lieren. Bediet daut dan, daut eene Fru sikj emma dän Kopp bedakjen mott, wan see bät ooda wäm waut von de Schreft utlajcht? Nä, wiels daut es krakjt doano, en waut vonne Omstend see daut deit.

De Omstend. Paulus wiest, daut daut met twee Sachen to doonen haft, aus eene Fru sikj dän Kopp bedakjen saul: met de Ordnunk en de Famielje un en de Vesaumlunk. Hee säd: “De Maun es de Kopp von de Fru, . . . wan eene Fru bät ooda profeetisch rät un haft äaren Kopp nich bedakjt, entieet see äaren Kopp” (Varsch 3, 5). En de Famielje haft Jehova dän Ehemaun aus Kopp äwa siene Fru jesat. Wan eene Ehefru nu Oppgowen  deit, waut Jehova dän Maun jejäft haft, un doabie nich wiest, daut see Gott siene Ordnunk achten deit, brinjt see Schaund opp äaren Maun. Wan see biejlikj met wäm de Bibel studieet un äa Maun es doa rom, woat see sikj dän Kopp bedakjen. Soo wiest see, daut see de Ordnunk acht, waut Gott oppjestalt haft. Daut helt sikj jlikj, aus äa Maun jedeept es ooda nich; hee es de Kopp von de Famielje. * Un waut, wan äa jedeepta Sän doa rom es, wan see bät ooda aundre lieet? Dan woat see uk eene Koppbedakjunk brucken, endoont woo oolt de Jung es. See deit daut nich, wiels dee de Kopp von de Famielje es, oba wäajen de Veauntwuatunk, waut Jehova de jedeepte Breeda en de Vesaumlunk jejäft haft.

Aus Paulus von de Koppbedakjunk räd, räd hee uk von de Ordnunk en de Jemeent, aulsoo en de Vesaumlunk. Hee säd: “Wan wäa ut es no strieden, saul hee weeten, wie haben dee Jewanheit nich, un Gott siene Jemeenten uk nich” (Varsch 16). Äwa de Christenvesaumlunk sent jedeepte Mana aunjestalt (1. Timotäus 2:11-14; Hebräa 13:17). Bloos dee kjennen Eltestasch un Deenstaumthelpa sennen un haben von Gott de Veauntwuatunk jekjräajen, no siene Häad opptopaussen (Aposteljeschicht 20:28). Oba eenjemol mott eene Sesta veleicht eene Oppgow doonen, waut jeweenlich een jedeepta Brooda deit. See mott veleicht een Toopkomen fa dän Prädichtdeenst leiden, wiels doa kjeen Brooda es, waut daut kaun. Ooda see fieet een Bibelstudium, waut see verhäa berät haft, un doa es een jedeepta Brooda rom. En soone Omstend saul see sikj dän Kopp bedakjen, wiels see waut deit, waut jeweenlich eenen Brooda siene Oppgow es. *

Daut jeft oba uk väle Omstend, wua see sikj nich brukt dän Kopp bedakjen. Biejlikj wan see bie de Toopkomes eene Auntwuat jeft, wan see met äaren Ehemaun ooda  met eenen aundren jedeepten Brooda von Hus to Hus prädicht ooda wan see met äare ojjedeepte Kjinja bät ooda studieet. Un waut, wan eene Sesta sikj nich secha es, aus see en eene jewesse Loag eene Koppbedakjunk brucken saul? Dan wudd see kjennen deepa noforschen. * Wan see doawäajen noch Twiewel haud, dan kunn see, soo aus de Sesta opp daut Bilt, eene Koppbedakjunk brucken, daut see een rujet Jewessen haud.

Wuarom woat eene Sesta daut jieren nokomen, waut de Schreft äwa de Koppbedakjunk sajcht? En Varsch 10 finj wie de Auntwuat. Daut sajcht: “Wäajen de Enjel äat haulwen saul de Fru een Tieekjen von Ordnunk opp däm Kopp droagen.” Hia rät daut eemol von “een Tieekjen von Ordnunk”. Jehova haft eene Ordnunk fa de Vesaumlunk oppjestalt un de jedeepte Mana doa eene besondre Veauntwuatunk jejäft. Wan eene Fru sikj dän Kopp bedakjt, wiest see, daut see sikj doaraun helt un daut see Jehova Gott leeft un am opp iernst well tru sennen. Tweedens sajcht daut en dän Bibelvarsch, daut eene Fru sikj om “de Enjel äat haulwen” dän Kopp bedakjen saul. Wuarom sent de majchtje Enjel doa met en?

Fa de Enjel es daut waut besondret, to seenen, daut aule en Jehova siene Organisazion sikj aun siene Ordnunk hoolen, aus daut nu em Himmel es ooda oppe Ieed. Un wan dee seenen, daut onvolkomne Menschen daut doonen, es an daut sea toom gooden. Schlieslich motten je de Enjel sikj uk aun Jehova siene Ordnunk hoolen. Oba lang nich aule haben daut jedonen (Judas 6). Vondoag dän Dach kjennen de Enjel Sestren beoobachten, waut mea Erfoarunk haben, hecha utjelieet ooda kjlieekja sent aus een Brooda en de Vesaumlunk. Un doch  sent dee unjadon, wiels Jehova de jedeepte Mana eene besondre Veauntwuatunk jejäft haft. Eenjemol es daut mau rajcht eene jesaulwde Sesta, waut to Christus siene Metoawen jehieet. Dee woat noch mol väl hecha stonen aus de Enjel un met Christus toop em Himmel rejieren. Un doch es see nu unjadon. Es daut nich een goodet Väabilt fa de Enjel? Un es daut nich scheen, daut aule Sestren derch äaren deemootjen Waundel ver millionende true Enjel wiesen kjennen, daut see Jehova jieren jehorchen wellen?