1-3. (a) Woo seenen väle Menschen äare Oabeit aun? (b) Waut sajcht de Schreft äwa Oabeit? Waut vonne Froagen woa wie en dit Kapitel unjasieekjen?

VONDOAG dän Dach seenen väle de Oabeit aus eene Laust aun. An felt daut schwoa, jieda Dach von tiedich bat lot to schaufen un dan veleicht noch soont, waut an nich mol scheen jeit. Waut kjennen dee doonen, daut an daut bie de Oabeit bäta jeit un mau rajcht noch kjennen tofräd sennen?

² De Schreft halpt ons, de rajchte Enstalunk to haben, un wiest, daut flietje Oabeit toom gooden deent. Salomo schreef: “Dan wort mie daut kloa, daut et nuscht bätret fa eenem jeft, aus . . . daut eena at un drinkjt, un en aul sien bemieejen, sikj daut scheen gonen lat. Daut kjemt aula von Gott” (Liera 3:12-13). Jehova räakjent ons väl un wenscht sikj daut baste fa ons. Hee well, daut wie bie de Oabeit Freid haben un daut dee ons uk waut brinjt. Wan wie en siene Leew bliewen wellen, mott wie soo äwa de Oabeit denkjen, aus hee deit, un ons aun siene Gruntsauzen hoolen (läs Liera 2:24; 5:17).

³ En dit Kapitel woa wie vea Froagen unjasieekjen: Woo kaun de Oabeit ons Freid brinjen? Met waut vonne Oabeit sellen Christen sikj nich aufjäwen? Waut kjenn wie doonen, daut daut jeistelje en ons Läwen nich hinjastalich  blift? Un woone Oabeit nämen Christen besonda iernst? Oba well wie ieescht mol von de twee flietichste Oabeida räden, waut daut äwahaupt jeft: Jehova Gott un Jesus Christus.

4-5. Woo woat en de Schreft jewäsen, daut Jehova sea flietich es?

⁴ Jehova es de basta Oabeida. En 1. Mose 1:1 sajcht daut: “Aum Aunfank muak Gott Himmel un Ieed.” Nodäm daut Gott de Ieed un aulet aundre jemoakt haud, säd hee, daut “daut sea goot wia” (1. Mose 1:31). Hee wia sea tofräd met siene Oabeit. Jehova es de jlekjelja Gott un secha haft am daut väl Freid jemoakt, soo flietich to schaufen (1. Timotäus 1:11, NW).

⁵ Jehova Gott es emma aum wirkjen. Lang nodäm daut hee dän Himmel un de Ieed jemoakt haud, säd Jesus: “Mien Voda oabeit bat vondoag” (Johanes 5:17). Waut deit dee? Von em Himmel deit dee de Menschen leiden un kjemmat sikj om an. Un dee haft uk eene Grupp Christen utjewält un met heiljen Jeist jesaulft, waut met Jesus toop em Himmel rejieren woaren (2. Korinta 5:17). Jehova schauft doaropp, daut sien Väanämen sikj erfelt, soo daut dee, waut am leewen, fa emma en de niee Welt läwen kjennen (Reema 6:23). Hee mott sea tofräd sennen met daut, waut siene Oabeit bat nu jebrocht haft: Millionende Menschen haben aul de goode Norecht vom Kjennichrikj aunjenomen. Gott haft dee no sikj jetrocken un dee haben äa Läwen jeendat, om en siene Leew to bliewen (Johanes 6:44).

6-7. Aun waut es to seenen, daut Jesus aul emma sea flietich wia?

⁶ Jesus es uk aul emma flietich jewast. Ea hee oppe Ieed kjeem, wia hee Gott sien “Bumeista” un “derch am muak Gott aules waut em Himmel un oppe Ieed jemoakt worden es” (Spricha 8:22-31; Kolossa 1:15-17). Un aus Mensch  wia hee uk emma aum wirkjen. En siene junge Joaren lieed hee, Hauntoabeit to doonen, un wia aus “de Holtoabeida” bekaunt (Markus 6:3). * Met Holt schaufen wia eene schwoare Oabeit un eena must sikj met välet vestonen. To jane Tiet jeef daut nich Soagmaschienen ooda ellektrischet Jereetschoft un eena kunn uk nich eefach nom Stua gonen, sikj Toorot kjeepen. Woo kunn Jesus sikj Holt veschaufen? Veleicht must hee Beem aufsoagen un dee doahan tosen, wua hee dee brukt. Hee muak dan woomäajlich Dakbaulkjes fa Hiesa un sad dee en. Ooda hee muak Däaren ooda Meeblen. Jesus wist secha, woo sikj daut feeld, wan eena flietich jewast wia un eene goode Oabeit jedonen haud.

⁷ En sienen Deenst wia hee uk sea flietich. Jesus sad sikj dreeunhaulf Joa gaunz fa sien besondret Woakj en. Hee stunt tiedich zemorjes opp un wia bat lot zeowes oppe Been, daut hee soo väl Menschen aus mäajlich halpen kunn (Lukas 21:37-38; Johanes 3:2). Hee jinkj “derch aul äare Städa un Darpa . . . un prädijd daut Evangelium vom Gottesrikj” (Lukas 8:1). Jesus jinkj hundade Kilomeeta opp stofje Gaussen, om de Menschen de goode Norecht to brinjen.

8-9. Waut kunn Jesus beläwen, wiels hee soo flietich wia?

⁸ Brocht Jesus de flietje Oabeit Freid, waut hee fa Jehova jedonen haud? Gaunz secha. Derch sienen Deenst seid hee soo to sajen de Woarheit vom Kjennichrikj un hinjaleet groote Flekja, waut reed wieren toom arnten. Gott sien Woakj derchtofieren jeef am väl Krauft un wia am soo väl wieet, daut hee sikj eenjemol nich mol Tiet neem toom äten (Johanes 4:31-38). Woo tofräd mott hee jewast  sennen, aus hee to sienen Voda sajen kunn: “Ekj hab die opp de Ieed doaderch veharlicht, daut ekj daut Woakj verecht hab, daut du mie jejäft hast to doonen” (Johanes 17:4).

⁹ Aun Jehova un Jesus es gaunz kloa to seenen, daut flietje Oabeit Tofrädenheit brinjt. Wie leewen Jehova un doawäajen sträw wie doano, “am emma änelja to woaren” (Efeesa 5:1). Wie räakjnen uk Jesus väl un wellen “en siene Footspoaren gonen” (1. Petrus 2:21). Doawäajen well wie nu seenen, woo ons de Oabeit uk Tofrädenheit brinjen kaun.

10-11. Waut kaun ons halpen, äwa onse Oabeit rajcht jesonnen to sennen?

¹⁰ Schaufen jehieet eefach toom Läwen, un daut es bie woare Christen nich aundasch. Wie aula wudden jleichen eene Oabeit to haben, waut ons tofräd muak. Oba daut es nich emma soo. Eenjemol mott wie veleicht waut schaufen, waut ons nich intressieet. Waut kjenn wie dan doonen, daut wie ons doawäajen doch tofräd feelen?

¹¹ Rajcht jesonnen sennen. Eenjemol kjenn wie onse Omstend nich endren, oba wie kjennen onse Jesennunk endren. Daut kjenn wie, wan wie doaräwa nodenkjen, woo Jehova de Oabeit sitt. Veleicht best du een Famieljenvoda. Dan denkj doaraun, daut diene Oabeit die daut mäajlich moakt, fa diene Famielje to sorjen. Un bie Jehova es daut väl wieet, waut du deist, wan daut uk mau eene jerinje Oabeit es. Sien Wuat sajcht, wäa nich fa de sienje oppkjemt, “es oaja aus eena, dee nich jleewen deit” (1. Timotäus 5:8). Diene Oabeit halpt die, de Veauntwuatunk notokomen, waut Gott die jejäft haft. Wan du dit em Denkj helst, woascht du biem schaufen veleicht tofrädna sennen aus väle von diene Oabeitspoatna.

12. Wuarom loont sikj daut, bie de Oabeit flietich un opprechtich to sennen?

 ¹² Flietich un opprechtich sennen. Daut loont sikj, flietich to sennen un eene goode Oabeit to doonen. Soone Oabeida woaren jeweenlich väl jeräakjent (Spricha 12:24; 22:29). Woare Christen schaufen emma opprechtich; dee stälen äaren Wieet nich Jelt ooda sestwaut fuat un vesiemen uk nich de Tiet (Efeesa 4:28). Soo aus wie en daut väaje Kapitel en dit Buak jeseenen haben, es opprechtich sennen toom gooden. Opp soone Oabeida kaun eena sikj veloten. Veleicht loft de Wieet ons doafäa, daut wie  flietich sent. Oba wan dee daut uk nich deit, kjenn wie doawäajen doch tofräd sennen un “een goodet Jewessen haben”, wiels wie weeten, daut ons himlischa Voda sikj äwa ons freit (Hebräa 13:18; Kolossa 3:22-24).

13. Wuarom saul eena sikj bie de Oabeit goot benämen?

¹³ Doaraun denkjen, daut Gott derch ons goodet Benämen jeieet woat. Wan wie ons bie de Oabeit soo benämen, aus sikj daut fa Christen jehieet, dan woat aundre daut secha oppfaulen. Waut kaun daut fa goodet brinjen? Doaderch kjenn wie “de Lia von Gott . . . auntrakjent moaken” (Titus 2:9-10). Aun ons Vehoolen kjennen aundre seenen, woo besonda ons Gloowen es. Veleicht woaren dee dan nieschierich doatoo. Wudd daut nich scheen sennen, wan een Oabeitspoatna wäajen dien goodet Benämen mea äwa de Woarheit weeten wull? Oba daut baste es, daut du derch dien Vehoolen Jehova ieren un sien Hoat froo moaken kaust (läs Spricha 27:11; 1. Petrus 2:12).

14-16. Äwa woone Froagen sell wie nodenkjen, ea wie eene Oabeit aunnämen?

¹⁴ En de Schreft jeft daut nich eene List doavon, woone Oabeit Christen doonen kjennen un woone nich. Doamet es oba nich jesajcht, daut sikj daut jlikj helt, met waut wie ons Läwen moaken. De Schreft halpt ons, eene Oabeit uttosieekjen, waut Gott fa rajcht talt un wua wie ons Jelt opprechtich vedeenen kjennen (Spricha 2:6). Woo weet wie, woone Oabeit Gott nich jefelt? Denkj wie doatoo mol äwa twee Froagen no.

¹⁵ Wudd wie bie dise Oabeit waut doonen motten, waut jäajen de Schreft es? Stälen, lieejen ooda Jettabilda moaken es no de Schreft no gaunz orrajcht (2. Mose 20:4; Aposteljeschicht 15:29; Efeesa 4:28; Openboarunk 21:8). Wie wudden nienich eene Oabeit aunnämen, wua wie soont  doonen musten. Wie leewen Jehova un doawäajen well wie kjeenmol waut schaufen, waut jäajen siene Jebooten es (läs 1. Johanes 5:3).

¹⁶ Wudd ekj bie dise Oabeit gaunz kloa waut orrajchtet unjastetten ooda aundre doatoo vehalpen, waut orrajchtet to doonen? Doatoo mol een Biespel: Bie een Hospitol de Kunden opptonämen es nich faulsch. Waut oba, wan die soone Oabeit bie een Hospitol aunjeboden woat, wua dee  bloos Bäbes aufdoktren? Du selfst wurscht je nuscht met daut aufdoktren to doonen haben. Oba wurscht du opp dise Wajch nich waut unjastetten, waut jäajen Gott sien Wuat wia? (2. Mose 21:22-24, NW). Wie räakjnen Jehova väl un wellen noanich met en sennen, wua daut hauptsechlich om soont jeit, waut jäajen de Schreft es.

17. (a) Waut sell wie noch bedenkjen, ea wie eene Oabeit aunnämen? (See dän Kausten “ Sull ekj dise Oabeit aunnämen?”) (b) Woo kjenn wie ons fa daut entscheiden, waut Gott jefelt?

¹⁷ Veleicht halpen ons de Froagen en de väaje beid Varzh aul, ons rajcht to entscheiden. Oba eenjemol jeft daut noch aundre Sachen, waut wie bedenkjen motten, ea wie eene Oabeit aunnämen. * Wie kjennen nich velangen,  daut de trua, weisa Kjnajcht fa aules eene Räajel oppstalt. Foaken mott wie ons daut selfst unjastonen, woont de baste Entscheidunk sennen wudd. Doatoo mott wie ons Jewessen oppschoapen, soo aus wie en daut 2. Kapitel en dit Buak jeseenen haben. Daut kjenn wie, wan wie Gott sien Wuat studieren un äwalajen, waut fa eene Lia wie ons doa rutnämen kjennen. Wan wie ons doarenn eewen, “tweschen goot un schlajcht to unjascheeden”, woat ons Jewessen ons halpen, soo to haundlen aus Gott daut jefelt un en siene Leew to bliewen (Hebräa 5:14).

18. Wuarom kaun daut leicht mol passieren, daut daut jeistelje bie ons hinjastalich blift?

¹⁸ Nu en de “latste Doag” jeft daut “jreslich schwoare Tieden”, un daut kaun leicht mol passieren, daut daut jeistelje hinjastalich blift (2. Timotäus 3:1). Eenjemol haft daut noch waut opp sikj, eene Oabeit to finjen un dee uk to hoolen. Un aus Christen weet wie, daut wie flietich schaufen motten, om fa onse Famielje to sorjen. Oba wie motten oppaussen, daut wie ons oppe Oabeit nich loten unja Druck saten. Ooda daut wie ons nich von de Welt metrieten loten, waut bloos nom Jelt hinjaraun es. Sest wudd daut jeistelje met eemol kjennen too kort komen (1. Timotäus 6:9-10). Woo kjenn wie secha moaken, daut en ons Läwen “daut aulabaste” emma dän ieeschten Plauz haft? (Filippa 1:10).

19. Wuarom kjenn wie ons gaunz opp Jehova veloten? Met waut woa wie ons daut nich too schwoa moaken?

¹⁹ Ons gaunz opp Jehova veloten (läs Spricha 3:5-6). Wie kjennen ons gaunz opp Jehova veloten, wiels hee sorcht fa ons (1. Petrus 5:7). Hee weet bäta, waut ons fält, aus wie selfst un kaun ons emma halpen (Psalm 37:25).  Doawäajen sell wie daut em Denkj hoolen, waut de Schreft sajcht: “Siet nich hungrich no Jelt. Siet tofräd met waut jie haben. Gott haft jesajcht: ‘Ekj woa die nich veloten, die nich em Stich loten’” (Hebräa 13:5). Väle, waut em Voltietdeenst sent, haben selfst beläft, woo Gott fa an sorcht. Wan wie ons gaunz doaropp veloten, daut Jehova sikj om ons kjemren woat, woa wie ons daut doa nich  too schwoa met moaken, woo wie fa onse Famielje sorjen kjennen (Matäus 6:25-32). Wie woaren nich tooloten, daut wäajen de Oabeit daut jeistelje hinjastalich blift, soo aus de Toopkomes un de Prädichtdeenst (Matäus 24:14; Hebräa 10:24-25).

20. Waut bediet daut, kloa to kjikjen? Woo kjenn wie daut uk fa wieda doonen?

²⁰ Kloa kjikjen (läs Matäus 6:22-23). Daut bediet, sikj daut Läwen nich onneedich to beloden. Wan ons Uag kloa kjikjt, woat daut fa ons daut ieeschte sennen, Gott sienen Wellen to doonen. Wie sent dan nich gaunz doavon enjenomen, riew to läwen ooda wua to schaufen, wua dia betolt woat. Wie loten ons uk nich enbillen, daut wie bloos kjennen tofräd sennen, wan wie emma de nieste un baste Sachen haben. Waut kaun ons halpen, uk fa wieda een kloaret Uag to haben? Eent wudd sennen, ons nich onneedich en Schult entoducken. Ooda ons nich äwamotich väl Sachen auntogonen, wua wie väl Tiet un Krauft nenspenden motten. De Schreft jeft ons eenen gooden Rot: “Wan wie Kjleeda un Äten haben, doamet sell wie tofräd sennen” (1. Timotäus 6:8). Wie wellen doano seenen, daut ons Läwen soo weinich aus mäajlich belot es.

21. Wuarom mott wie de Tiet rajcht brucken? Waut sull bie ons daut ieeschte sennen?

²¹ Daut jeistelje aun de ieeschte Städ saten. Wiels de Tiet soo bosich rant, mott wie dee rajcht brucken. Aundasch kaun daut leicht passieren, daut wie dee vekwosen, soo daut fa daut aulabaste nich mea Tiet blift. Waut saul bie ons daut ieeschte sennen? Väle Menschen vondoag sent daut dolste doarom todoonen, sikj huach uttolieren, daut see eene goode Oabeit kjrieen un väl Jelt vedeenen. Oba Jesus säd to siene Nofolja: “Sieekjt daut ieeschte no Gott sien Rikj” (Matäus 6:33). Bie ons kjemt Gott sien Rikj daut  gaunz ieeschte. Daut saul aun ons gaunzet Läwen to seenen sennen, biejlikj aun onse Entscheidungen, no waut wie trachten un woo wie onse Tiet brucken. Woare Christen sellen mea om Gott sien Rikj un sienen Wellen todoonen sennen aus om de tietelje Dinj un waut dise Welt sest noch auntobeeden haft.

22-23. (a) Woone Oabeit näm wie sea iernst? Woo bewies wie daut? (See uk dän Kausten “ Daut wia de baste Entscheidunk”.) (b) Waut well wie kjeenmol tooloten?

²² Woare Christen nämen daut prädjen un Jinja moaken sea iernst, wiels dee weeten, daut daut met dise beese Welt boolt een Enj nämen woat (Matäus 24:14; 28:19-20). Bie dit Woakj, waut Läwen raden kaun, well wie krakjt soo flietich metoabeiden aus Jesus. Woo kjenn wie daut doonen? De mieeschte Breeda un Sestren jäwen aus Vekjindja äa bastet. Eenje haben sikj daut kunt soo enrechten, daut see kjennen Pionia ooda Missionoa sennen. Un väle Elren, waut weeten, woo needich daut es, no jeisteljet to sträwen, roden äare Kjinja too, met dän Voltietdeenst auntofangen. Feelen deejanje sikj tofräd, waut flietich Gott sien Rikj prädjen? Gaunz secha. Nuscht brinjt soo väl Säajen un Freid, aus Jehova met ons gaunzet Hoat to deenen (läs Spricha 10:22).

²³ Väle von ons motten schwoa schaufen, daut see äare Famielje feeden kjennen. Oba wan wie soo denkjen aus Jehova un uk siene Gruntsauzen beachten, woat de Oabeit ons Freid brinjen, soo aus Jehova sikj daut wenscht. Well wie daut kjeenmol tooloten, daut ons irjentwaut auflenkjt, de goode Norecht von Gott sien Rikj to prädjen, wiels daut es de Oabeit, waut bie Christen daut ieeschte kjemt. Soo bewies wie, daut wie Jehova leewen, un wie kjennen en siene Leew bliewen.