De kjliene Poat vom Bloot. De vea Hauptpoat vom Bloot sent de rote Blutkörperchen (Erythrozyten), de weiße Blutkörperchen (Leukozyten), de Blutplättchen (Thrombozyten) un daut Blutplasma. Von dee kjennen kjlandre Poat jemoakt. Biejlikj es en de rote Blutkörperchen daut Hämoglobin bennen. Von Menschen ooda Tieren äa Hämoglobin kjennen Sachen jemoakt, om wäm to doktren, waut sea blootoam es ooda väl Bloot veloaren haft.

Von daut Blutplasma es 90 Prozent Wota. Oba doa es uk noch väl aundret bennen, waut de Kjarpa brukt, biejlikj Zocka, Mineralen, Albumin, Sachen, waut halpen, daut eene Wund opphieet met bleeden un Sachen, waut dän Kjarpa jäajen Krankheiten halpen. Bie eenje Krankheiten kjennen Doktasch Gammaglobulin unjaspretzen, waut ut daut Blutplasma von wäm jenomen es, waut jäajen dise Krankheiten aul jeschizt es. Von de weiße Blutkörperchen kjennen Interferone un Interleukine rutjenomen, waut bie jewesse Sorten Kjräft un aundre Krankheiten jebrukt woaren.

Christen loten sikj nich Bloot enlakjen un uk nich von de Hauptpoat vom Bloot. Oba kjennen dee met waut doktren, waut von de kjliene Poat vom Bloot jemoakt es? De Schreft sajcht daut nich krakjt. Doawäajen mott jieda eena daut soo entscheiden, daut hee ver Gott een reinet Jewessen haft. Eenje Christen doktren nich met soont, wiels dee sajen, daut Gott von de Israeliten velangd, daut see daut Bloot von de Tieren sullen “oppe Ieed jeeten” (5. Mose 12:22-24). Aundre wada doonen daut. Fa  dee stalt soon kjlienet Poat vom Bloot nich mea daut Läwen von dän Mensch ooda daut Tia väa, von wua daut Bloot kjemt.

Ea wie ons fa irjentwaut entscheiden, sull wie äwa twee Froagen nodenkjen: “Wan ekj nuscht well met de kjliene Poat vom Bloot to doonen haben, es mie dan kloa, daut ekj dan uk met jewesse Medizien nich doktren wudd, waut biejlikj jebrukt woat, om jäajen eenje Krankheiten to schaufen ooda daut eene Wund opphieet met bleeden? Wudd ekj eenen Dokta kjennen utlajen, wuarom ekj met eent ooda miere von de kjliene Poat vom Bloot doktren well ooda nich?”

Mäajlichkjeiten toom doktren. Tweeatlei, waut biem opperieren eenjemol jedonen woat, es Hämodilution un Cell Salvage. Bie Hämodilution woat waut Bloot utem Kjarpa rutjeleit un enne Städ daut waut aundret enjelakjt. Lota kjemt daut rutjeleide Bloot dan wada trigj em Kjarpa nenn. Bie Cell Salvage woat daut Bloot jesaumelt, waut een Mensch velist, wan dee von bennen blat ooda opperieet woat. Daut woat oppjesoagen, jewoschen ooda jefiltat un wada trigj em Kjarpa jeleit. Dise beid Sachen woaren nich emma äwareen jedonen. Doawäajen mott eena dän Dokta froagen, woo hee daut krakjt doonen well.

Ea wie ons fa eene Doktarie entscheiden, sull wie äwalajen: “Wan Bloot ut mienen Kjarpa rutrant un wada nenjeleit woat un äwadäm veleicht soogoa een Stoot stonen blift, kaun ekj daut dan noch aus een Poat von mienen Kjarpa talen ooda wudd mien Jewessen velangen, daut daut sull ‘oppe Ieed’ jegoten?  (5. Mose 12:23-24). Wudd ekj een rujet Jewessen haben, wan se mie wudden Bloot aufnämen, doa waut met doonen un daut wada em Kjarpa nenleiden? Wan ekj aule Doktarieen aufsaj, wua waut met mien Bloot jedonen woat, es mie dan kloa, daut ekj doamet uk aufsaj, daut se mie eenen Bloottest nämen, de Hoatmaschien aunmoaken ooda eene Maschien, waut daut Bloot reinicht?”

 Jieda Christ mott selfst entscheiden, waut bie een Oppereeschen met sien Bloot jedonen kaun. Krakjt soo es daut uk bie eenen Test ooda sest eene Doktarie, wua een bät Bloot aufjenomen woat, waut dan veleicht veendat un wada unjajesprezt woat.