Kaust du seenen, woo schaftich de Menschen hia kjikjen? Dee sent opp eent von onse Kongressen. Aul en de Bibeltiet wia daut soo, daut Gott siene Deena sikj sullen dree Mol daut Joa en groote Gruppen vesaumlen. Un wie freien ons, daut wie uk kjennen soone groote Toopkomes haben (5. Mose 16:16). Soone aus daut hab wie dree Mol daut Joa: Twee eendachsche Kongressen un eenen dreedoagschen Kongress. Fa waut sent dee krakjt?

Dee halpen ons, aus Breeda tooptohoolen. De Israeliten muak daut väl Freid, wan see Jehova “en de [groote] Vesaumlungen lowen” kunnen (Psalm 26:12; 111:1). Fa ons es daut uk eene groote Freid, am aulatoop auntobäden. Bie de Kongressen kjenn wie met onse Gloowesbreeda toop sennen, waut von aundre Vesaumlungen ooda mau rajcht von aundre Lenda komen. Un wan wie doa aulatoop Meddach äten, kjenn wie uk noch mea Frind finjen (Aposteljeschicht 2:46). Doa kjenn wie de woare Leew späaren, waut daut mank onse Gloowesbreeda oppe gaunze Welt jeft (1. Petrus 2:17).

Dee halpen ons, em jeisteljen verauntokomen. Aus de Israeliten de Schreft wort utjelajcht, kunnen “see de Wieed vestonen” (Nehemia 8:8, 12). Fa ons es daut uk väl wieet, daut wie oppe Kongressen Rot von de Schreft kjrieen. Jieda Kongress haft een biblischet Teema. Doa woaren intressaunte Räden jehoolen, un doa woat veschiednet väajefieet, waut ons halpt, Gott sienen Wellen to doonen. Wie kjrieen uk väl Moot, wan wie hieren, woo aundre en dise schwoare Tieden Gott tru bliewen. Opp de dreedoagsche Kongressen woaren uk Dramasch jewäsen, waut sikj von biblische Jeschichten haundlen un ons wiesen, waut wie doarut lieren kjennen. Bie aule Kongressen es daut soo, daut deejanje sikj kjennen deepen loten, waut sikj Gott hanjejäft haben.

• Wuarom sent de Kongressen soo waut besondret?

• Wuarom kjennen die de Kongressen toom gooden sennen?