WOO wudd daut sennen, wan een Kjennich un dän sien gaunzet Volkj Jehova aus Harscha unjadon wieren un dän siene Jesazen jehorchten? Daut wiest Salomo siene 40-joasche Rejierunk en Israel.

Ea David storf, bestemd hee sienen Sän Salomo toom Kjennich. Eene Nacht säd Gott en eenen Droom to Salomo, hee kunn sikj von am waut wenschen. Salomo fruach no Weisheit un Vestentnis toom een jerajchta un gooda Kjennich sennen. Jehova freid sikj doaräwa. Hee muak Salomo sea kluak un jeef am uk väl Vestentnis. Jehova vespruak Salomo uk Rikjtum, Harlichkjeit un een langet Läwen, wan hee wudd jehuarsom bliewen.

Salomo wort sea bekaunt, wiels hee soo een weisa Rechta wia. Eemol kjeemen doa twee Frues no am, waut sikj wäajen een Bäbe streeden. Dee behaupten beid, de Mutta to sennen. Salomo befool dan, daut Junkje en twee Halften to schnieden un jieda Fru eene Halft to jäwen. De eene Fru wia doamet envestonen, oba de rajchte Mutta prachad, see sullen daut leewa de aundre Fru jäwen enne Städ dootmoaken. Salomo wist dan, daut dee Fru, waut Metlieden haud, de rajchte Mutta wia un jeef ar daut Bäbe. Boolt hieed daut gaunze Volkj doavon, woo kluak Salomo met dise Sach omjegonen wia. Daut Volkj sach, daut Salomo siene Weisheit von Gott kjeem.

Eent von daut jratste, waut Salomo tostaund brocht, wia fa Jehova dän Tempel buen. Dis Tempel en Jerusalem wia de Hauptstäd, wua daut Volkj Jehova aunbäden deed. Aus dee enjesäajent wort, bäd Salomo to Gott un säd: “Wie weeten, daut nich emol de Himmel un de jratsta Himmel fa die Rum haben, wooväl weinja dan dit Hus, daut ekj jebut hab!” (1. Kjennichs 8:27).

Salomo sien Aunseenen wort wiet bekaunt. Soogoa de Kjennijin von daut Launt Saba en Arabien hieed doavon. See reisd no Israel, om Salomo siene Harlichkjeit un sienen Rikjtum to seenen un siene groote Weisheit auftoproowen. De Kjennijin wia vewundat, woo kluak Salomo wia un uk woo goot de Israeliten daut hauden, un see veharlicht Jehova doafäa. To kjeene aundre Tiet hauden de Israeliten daut soo scheen un soo frädlich aus unja Salomo siene Harschoft. Un daut wia jroz, wiels Jehova sienen Säajen jeef.

Oba met de Tiet recht Salomo sikj nich mea no Jehova siene Weisheit. Hee befried sikj met hundade Frues, uk wan hee wist, daut daut jäajen Jehova sien Jeboot wia. Väle von dee deeden soogoa faulsche Jetta aunbäden. Soo bie sacht brochten dise Frues Salomo von Jehova wajch un brochten dän doatoo, Aufjetta auntobäden. Jehova säd dan to Salomo, am wudd een Poat von sien Kjennichrikj wajchjenomen woaren. Bloos een kjlienet Deel wudd en siene Famielje bliewen wäajens dän Bunt, waut Jehova met David jemoakt haud. Uk wan Salomo ontru wort, hilt Jehova sikj aun disen Bunt.

Stett sikj opp 1. Kjennichs, Kapitels 1 bat 11, 2. Chronik, Kapitels 1 bat 9 un opp 5. Mose 17:17.