Jesus säd, daut Christen sikj musten deepen loten (läs Matäus 28:19-20). Oba waut es de Doop? Un waut mott een Mensch doonen toom sikj deepen loten?

1. Woo mott eena sikj deepen loten?

Daut griechische Wuat, waut met “deepen” äwasat es, meent em Wota “unjaducken”. Aus Jesus jedeept wort, wort am uk gaunz en dän Jordan-Riefa unjajedukt un dan stieech hee ut daut Wota rut (Markus 1:9-10). Soo es daut uk bie woare Christen: dee woaren bie äare Doop gaunz em Wota unjajedukt.

2. Waut wiest eena, wan eena sikj deepen lat?

Met de Doop wiest eena, daut eena sikj Jehova Gott hanjejäft haft. Waut meent daut? Irjentwanea ver de Doop vesprakjt deejanja Jehova en een Jebäd, daut hee bloos am fa emma deenen un aunbäden well un daut Gott sienen Wellen doonen daut väaschte en sien Läwen sennen woat. Soo aus Jesus säd, “mott hee von sikj selfst vejäten . . . un metkomen” (Matäus 16:24). Daut meent, deejanja wält sikj, Jesus siene Lieren un sien Biespel to foljen. Doaderch, daut eena sikj hanjeft un deepen lat, kaun eena goode Frind met Jehova woaren un uk met aundre, waut am deenen.

3. Waut mott eena doonen, ea eena sikj kaun deepen loten?

Du kaust die fa de Doop reedmoaken, wan du mea von Jehova lieescht un eenen stoakjen Gloowen aun am kjrichst (läs Hebräa 11:6). Je mea du lieescht un je stoakja dien Gloowen es, je jrata woat diene Leew fa Jehova woaren. Un dan woascht du secha uk aundre von am vetalen wellen un soo läwen, aus hee daut haben well (2. Timotäus 4:2; 1. Johanes 5:3). Wan een Mensch dan ieescht “Gott to jefaulen [läft]”, dan well dee sikj secha am hanjäwen un deepen loten (Kolossa 1:9-10). a

 DOLLA UNJASTONEN

4. Waut wie kjennen von Jesus siene Doop lieren

Läst Matäus 3:13-17 toom noch mea äwa Jesus siene Doop lieren un dan got toop dise Froagen derch:

• Wia Jesus een kjlienet Kjint, aus hee sikj deepen leet?

• Woo leet Jesus sikj deepen? Deeden se am bloos een bät Wota äwajeeten?

Aus Jesus sikj deepen leet, funk hee siene besondre Oabeit hia oppe Ieed aun, waut hee von Gott jekjräajen haud. Läst Lukas 3:21-23 un Johanes 6:38 un dan got toop dise Froag derch:

• Woone Oabeit kjeem bie Jesus daut ieeschte, aus hee ieescht jedeept wia?

5. Du kaust bat de Doop komen

Aum Aunfank späat sikj eenem daut veleicht no too väl, sikj Jehova hanjäwen un deepen loten. Oba eena kaun bat doa komen, daut eena sikj secha es, soone wichtje Entscheidunk to moaken. Toom seenen, waut eenje Menschen doaräwa sajen, kjikjt daut VIDEO.

Läst Johanes 17:3 un Jakobus 1:5 un dan got toop dise Froag derch:

• Waut kaun eenen Mensch halpen, sikj fa de Doop reedtomoaken?

1. Wie jäwen ons Jehova han, wan wie am daut en een Jebäd sajen, daut wie am fa emma deenen wellen

2. Met onse Doop wies wie aundre daut, daut wie ons Gott hanjejäft haben

 6. Derch de Doop woa wie een Poat von Jehova siene Famielje

Wan wie ons deepen loten, dan woa wie een Poat von eene veeende Famielje oppe gaunze Welt. Wan wie uk aula von veschiedne Städen häakomen un veschieden oppjewossen sent, hab wie oba aula dänselwjen Gloowen un talen aula dautselwje fa rajcht. Läst Psalm 25:14 un 1. Petrus 2:17 un dan got toop dise Froag derch:

• Wan du die deepen latst, woo steit daut dan tweschen die un Jehova un aundre Menschen, waut am deenen?

 KAPITEL TOOPJEFOT

Jesus lieed, daut Christen sikj motten deepen loten. Om bat de Doop to komen, mott een Mensch eenen stoakjen Gloowen aun Jehova kjrieen un soo läwen, aus hee daut fa rajcht talt un sikj am hanjäwen.

Waut hast du jelieet?

• Waut es de Doop, un wuarom es daut wichtich, sikj deepen to loten?

• Waut wiest eena derch de Doop?

• Woo kjemt eena bat doa, sikj Jehova hantojäwen un deepen to loten?