26. KAPITEL
Wuarom jeft daut schlajchtet un Lieden?
Wan doa waut schlemmet passieet, dan froagen de Menschen jeweenlich: “Wuarom passieed daut?” Woo scheen, daut de Schreft ons daut weeten lat!
1. Woo brocht de Soton daut schlajchte enne Welt?
De beesa Fient stald sikj jäajen Gott un kjrieech de ieeschte beid Menschen, Adam un Eva, uk soo wiet. Doatoo luach dee Eva waut väa. Aul dit deed de Fient toom äwa aundre rejieren (1. Mose 3:1-5). Hee bild Eva en, daut Gott ar utem schlajchten Senn nich aules jeef, waut ar troff un daut de Menschen wudden schaftja sennen, wan dee Gott nich jehorchten. De Soton luach toom ieeschte Mol, aus hee to Eva säd, daut see nich wudd stoawen. Doawäajen sajcht de Schreft, daut hee “een Lieeja es un de Voda äwa aule Läajes es” (Johanes 8:44).
2. Waut deeden Adam un Eva?
Jehova jeef Adam un Eva sea väl. Hee säd, daut dee von aule Beem em Goaden Eden kunnen Frucht äten, bloos von eenen nich (1. Mose 2:15-17). Oba dee eeten doawäajen noch von dän Boom. Eva “neem . . . von de Frucht un eet”. Un Adam, “dee eet” lota uk (1. Mose 3:6). Soo wieren dee Gott beid ojjehuarsom. Wäajen Adam un Eva onen Fäla wieren, wia daut fa dee gaunz leicht jewast, daut rajchte to doonen. Oba dee jehorchten met Fliet nich un weesen soo, daut see nich mea wullen von Gott rejieet sennen. Un derch dit saden see sikj väl Lieden too (1. Mose 3:16-19).
3. Waut haft daut opp ons jebrocht, waut Adam un Eva deeden?
No de Sind worden Adam un Eva fälahauft un soo haben dee aul äare Nokomen dän Fäla wiedajejäft. De Schreft sajcht von Adam: “Soo aus derch eenen Mensch de Sind en de Welt nenn kjeem un derch de Sind de Doot, soo haft sikj de Doot äwa aule Menschen jespreet” (Reema 5:12).
Woosoo mott wie dan lieden? Eenjemol es daut, wäajen wie ooda wäajen aundre schlajcht entscheiden, un eenjemol es daut, wäajen wie opp eene orrajchte Städ to eene orrajchte Tiet sent (läs Liera 9:11).
DOLLA UNJASTONEN
See mol, wuarom wie sajen kjennen, daut Gott nich daut schlajchte un Lieden en dise Welt veuasoakt un woo am daut jeit, wan hee ons lieden sitt.
4. Wäa veuasoakt daut, wan wie lieden motten?
Een deel Menschen jleewen, daut Gott aules enne Welt rejieet. Oba es daut soo? Kjikjt daut VIDEO.
Läst Jakobus 1:13 un 1. Johanes 5:19 un dan got toop dise Froag derch:
-
Lajcht Gott ons daut Lieden un daut schlemme opp?
5. Woo es daut utjekomen von dan, aus de Soton rejieet?
Läst 1. Mose 3:1-6 un dan got toop dise Froagen derch:
-
Waut vonne Läajes säd de Soton? (See Varsch 4 un 5.)
-
Woo säd de Soton derche Bloom, daut Jehova von de Menschen goodet trigjhilt?
-
No dän Soton no, fält de Menschen daut, daut Jehova äwa dee rejieet toom schaftich sennen?
Läst Liera 8:9 un dan got toop dise Froag derch:
-
Waut es met dise Welt passieet, wäajen Jehova nich äwa dee rejieet?
-
Adam un Eva wieren onen Fäla un läwden en een Paradies. Oba dee horchten no dän beesen Fient un stalden sikj jäajen Jehova
-
Nodäm daut dee sikj jäajen Gott stalden, wort de Welt voll Sind, Lieden un Doot
-
Jehova woat met de Sind, daut Lieden un dän Doot een Enj moaken un dan woaren de Menschen wada onen Fäla sennen un en een Paradies läwen
6. Jehova jaumat daut, wan wie lieden motten
Es Gott daut endoont, wan wie lieden motten? See mol, waut de Kjennich David un de Apostel Petrus schreewen. Läst Psalm 31:8 un 1. Petrus 5:7 un dan got toop dise Froag derch:
-
Woo denkjst du doaräwa, daut Jehova daut enwoat un daut am daut nich endoont es, wan wie lieden motten?
7. Gott woat met aul daut Lieden een Enj moaken
Läst Jesaja 65:17 un Openboarunk 21:3-4 un dan got toop dise Froag derch:
-
Wuarom treest die daut to weeten, daut Jehova aul dän Schoden wada woat gootmoaken, waut de Menschen haben lieden must?
Hast du daut jewist?
Aus de Soton de ieeschte Läajes vetald, muak hee Jehova eenen schlajchten Nomen. Hee bild de Menschen en, daut Jehova nich een jerajchta un leeftolja Harscha wia. Boolt woat Jehova met aul daut Lieden een Enj moaken un soo aul dise Läajes oppem kloaren brinjen. Hee woat bewiesen, daut hee werkjlich de basta Harscha es. Em Himmel un oppe Ieed es daut eent von daut wichtichste, daut Jehova sienen gooden Nomen wada trigjkjricht (Matäus 6:9-10).
WAUT EENJE SAJEN: “Daut es Gott sien Wellen, daut wie lieden motten.”
-
Waut wurscht du dan sajen?
KAPITEL TOOPJEFOT
De beesa Fient un de ieeschte beid Menschen haben daut mieeschte Schult aun aul daut schlajchte enne Welt. Jehova jaumat daut sea, wan wie lieden motten un hee woat daut boolt wada aula gootmoaken.
Waut hast du jelieet?
-
Waut vonne Läajes vetald de Fient Eva?
-
Waut haft daut met ons aula to doonen, daut Adam un Eva sikj jäajen Gott stalden?
-
Woo weet wie, daut Jehova daut nich endoont es, wan wie lieden motten?
MEA NOSIEEKJEN
Lia, waut no de Schreft no de Sind es.
Läs mea doaräwa, waut de beesa Fient em Goaden Eden fa Läajes oppbrocht.
“Wuarom lat Gott daut Lieden too?” (De Woaktorm, 1. Jaunewoa 2014)
Unjasto die daut, waut väle Troost jeef äwa eene schwieeje Sach.
Kjikj mol, waut een Maun lieed von aul daut Lieden, waut hee rom sikj sach.
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
