38. KAPITEL
Sie dankboa fa daut Läwen – daut es een Jeschenkj
Em Läwen kjenn wie väl scheenet beläwen. Mau rajcht wan wie schwoaret derchgonen, es doa doch noch emma waut scheenet. Woo kjenn wie fa daut wieetvolle Läwen dankboa sennen? Un waut es daut wichtichste, wuarom wie daut sellen?
1. Woosoo sell wie fa daut Läwen dankboa sennen?
Wie sellen doafäa dankboa sennen, wäajen daut een Jeschenkj es von onsen leeftoljen Voda Jehova. Hee es “dee, von däm aulet Läwen kjemt” (Psalm 36:10). “Hee selfst jeft aule Menschen Läwen un Odem un aulet aundre” (Aposteljeschicht 17:25, 28). Jehova jeft ons aules, waut ons fält toom läwen. Un dan haft hee daut noch soo enjerecht, daut ons daut uk kaun scheen gonen (läs Aposteljeschicht 14:17).
2. Woo kjenn wie Jehova wiesen, daut wie fa daut Läwen dankboa sent?
Jehova wia aul von dan aun om ons bekjemmat, aus wie em Muttalief aunsaden. En een Jebäd, waut Jehova leet enne Schreft oppschriewen, säd David to Jehova: “Diene Uagen sagen mie ea ekj jebuaren wia” (Psalm 139:16). Fa Jehova es dien Läwen sea wieetvoll (läs Matäus 10:29-31). Am wudd daut sea truarich moaken, wan wäa met Fliet eenen aundren ooda sikj selfst daut Läwen neem (2. Mose 20:13). a Jehova wudd daut uk schod sennen, wan wäa onneedich ooda jlikjeltich sien Läwen ooda aundre äat en Jefoa brocht. Wan wie no ons Läwen un no aundre äa Läwen oppaussen, dan wies wie, daut wie fa daut wundascheene Jeschenkj dankboa sent.
DOLLA UNJASTONEN
See mol eenjet, woo du kaust wiesen, daut du fa daut Läwen dankboa best.
3. Pauss no diene Jesuntheit opp
Fa Christen, waut sikj Gott hanjejäft haben, es aules en äa Läwen Poat von äaren Deenst fa Jehova. Daut es soo, aus wan dee Gott äaren Kjarpa aus een Opfa jäwen. Läst Reema 12:1-2 un dan got toop dise Froagen derch:
-
Wuarom wurscht du sellen no diene Jesuntheit oppaussen?
-
Woo kaust du daut biejlikj doonen?
4. Sie om diene un aundre äare Sechaheit bedocht
De Schreft sajcht, wie sellen nich soont doonen, wua wie ooda aundre kjennen tosplät ooda todood komen. Kjikjt daut VIDEO toom seenen, waut du fa diene Sechaheit doonen kaust.
Läst Spricha 22:3 un dan rät doaräwa, woo du un uk aundre kjennen om Sechaheit bedocht sennen. Soo aus ...
-
bie junt tus.
-
bie de Oabeit.
-
wan eena waut fa Scheengonen deit.
-
wan eena met een Foatich foat ooda metfoat.
5. Acht daut Läwen von een ojjebuarnet Kjint
David säd, daut Jehova aun daut Läwen von een Kjint intressieet wia, waut noch nich mol jebuaren wia. Läst Psalm 139:13-17 un dan got toop dise Froag derch:
-
Wanea fangt fa Jehova daut Läwen aun: wan daut Bäbe aunsat ooda wan daut ieescht jebuaren es?
Jehova sien Jesaz fa de Israeliten wia een Schutz fa eene Mame un daut Kjint, waut noch nich jebuaren wia. Läst 2. Mose 21:22-23 (NW) un dan got toop dise Froagen derch:
-
Woo docht Jehova doaräwa, wan een Mensch derch een Ojjlekj daut Läwen von een ojjebuarnet Kjint neem?
-
Waut wudd Jehova denkjen, wan daut wäa met Fliet deed? b
-
Woo denkjst du doaräwa, woo Gott daut sitt?
Mau rajcht soone Fru, waut daut weet, daut daut Läwen väl wieet es, mucht denkjen, daut doa sest kjeen rom es, aus bloos aufdoktren. Läst Jesaja 41:10 un dan got toop dise Froagen derch:
-
Wan se eene Fru bemotten wellen auftodoktren, bie wäm wudd see dan sellen no Help sieekjen? Wuarom?
WAUT EENJE SAJEN: “Eene Fru haft daut Rajcht, selfst to entscheiden, aus dee aufdoktren well ooda nich – daut es je äa ieejna Kjarpa.”
-
Woosoo best du die secha, daut Jehova daut Läwen von de Mame un von daut ojjebuarne Kjint fa väl wieet talt?
KAPITEL TOOPJEFOT
De Schreft lieet ons, daut wie daut Läwen, waut een Jeschenkj von Jehova es, sellen leewen, achten un beschitzen. Daut meent, ons ieejnet Läwen un uk aundre äat.
Waut hast du jelieet?
-
Wuarom es de Menschen äa Läwen soo väl wieet fa Jehova?
-
Woo denkjt Jehova doaräwa, wan wäa mootwellens met eenen Mensch sien Läwen een Enj moakt?
-
Wuarom best du dankboa fa daut Läwen?
MEA NOSIEEKJEN
Woo kjenn wie Jehova dankboa sennen, daut hee ons daut Läwen jeef?
Finj ut, aus Gott soone Fru daut togoodhelt, waut mol een Bäbe aufjedoktat haft.
“Waut sajcht de Schreft äwa Bäbes aufdoktren?” (Artikjel opp jw.org)
Waut von Tietvedrief woa wie ons wälen, wan wie weeten, woo Gott äwa daut Läwen denkjt? Läs die daut no.
“Jefäadeljen Sport – Wurscht du die sellen en Jefoa jäwen?” (Woat waka!, 8. Oktooba 2000)
Woo de Bibel soone halpen kaun, waut nich lenja läwen wellen.
a Jehova es sea om dee bekjemmat, waut gaunz doljeschloagen sent (Psalm 34:19). Hee weet, daut eenje daut soo schlajcht jeit, daut dee nich mea läwen wellen, oba hee well an halpen. Woo deit hee daut? Läs dän Artikjel “Ekj well nich lenja läwen – Kaun de Schreft halpen, wan ekj doaräwa nodenkj, mie daut Läwen to nämen?”. Dee es en dit Kapitel bie daut Poat “Mea nosieekjen”.
b Dee, waut mol haben een Bäbe aufjedoktat, derwen sikj nich äwamotich sea schuldich feelen, wiels Jehova kaun dee daut togoodhoolen. Wan du noch mea weeten west, dan see dän Artikjel “Waut sajcht de Schreft äwa Bäbes aufdoktren?”. Dee es en dit Kapitel bie daut Poat “Mea nosieekjen”.
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
