Sieekj no Help

“Doa kunn eena de Macht haben äwa däm aundren, oba twee kjennen sikj wäaren” (Liera 4:12, PB).

WAN aundre ons unjastetten, dan woat daut leichta sennen, daut wie jewennen kjennen jäajen onsen Fient, wautemma daut fa een Fient es. Wan du west opphieren met schmieekjen, dan wudd daut eene goode Iedee sennen, diene Famielje ooda uk aundre Frind to froagen, die to halpen; soone, waut die opp iernst wellen halpen un uk jeduldich sent.

Froag soone, waut aul ea haben oppjehieet met schmieekjen, wäajens dee woaren Metjefeel haben un die uk kjennen halpen. “De Help, waut ekj von aundre kjrieech, wia sea wichtich fa mie”, sajcht Torben, een Christ von Dänemark. Abraham, waut en Indien wont, schrift: “Dee, waut mie opp iernst Leew weesen, soo aus miene Famielje un Gloowesbreeda, holpen mie sea ut, daut ekj kunn opphieren met schmieekjen.” Oba eenjemol es de Help nich jenuach, waut wie kjennen von de Famielje un Frind kjrieen.

Een Maun, waut Bhagwandas heet, säd: “Ekj schmieekjt fa 27 Joa, oba wäajen ekj lieren deed, waut de Bibel sajcht äwa soone schwiensche Jewanheit, wort ekj mie eenich, opptohieren met schmieekjen. Ekj proowd, daut weinja to moaken, ekj socht mie fresche Frind un ekj socht no Rot. Oba daut schauft aula nich. Dan eenen Owent deed ekj mien Hoat to Jehova utschedden un prachad am no Help, daut ekj kunn opphieren. Dan tolatst kunn ekj daut entlich!”

Daut es wichtich, daut du die reedmoakst, wäajen daut kaun eenjemol schwoa sennen. Wäajen waut? De näakjsta Artikjel lajcht daut ut.

[Kausten]

WURSCHT DU SELLEN MEDIZIEN BRUCKEN TOOM OPPHIEREN?

Medizien brucken toom proowen, opptohieren met schmieekjen, soo aus Nikotin-Bakasch, sent nu aul een grootet Jeschaft jeworden. Ea du daut proofst, denkj mol äwa dit no:

Woo kaun daut halpen? Väle, waut soone Medizien tooroden, sajen, daut eena sikj dan nich soo schlajcht feelt, wan eena well opphieren met schmieekjen. Oba nich aule sent doamet envestonen, aus daut opp iernst halpt.

Waut es de Jefoa? Waut von dee Medizien kaun eenem bat doa brinjen, daut eena sikj ommaklich feelt un sea truarich es un mau rajcht eenjemol, daut eena sikj well daut Läwen nämen. Denkj doaraun: Wan du west met Nikotin doktren, dan es daut bloos eene aundre Wajch, woo du daut Nikotin brukst. Un daut kaun uk de Jesuntheit schoden, un rajcht jesajcht es de Mensch dan noch emma aun Nikotin faust.

Waut kaun eenem noch halpen? Dee haben utjefungen, daut 88 Prozent von dee, waut kunnen opphieren met schmieekjen, haben jesajcht, daut dee bloos plazlich doamet opphieeden un dee hauden kjeene Medizien doatoo jebrukt.