Nemm die waut väa, waut dienen Schepfa ieet

EEN reemischa Jelieeda en de Aposteltiet schreef mol: “Wan een Maun nich weet, no woonen Howen hee well, dan woat kjeen Wint de rajchta sennen.” Soo es daut uk em Läwen. Toom wua hankomen, mott eene weeten, waut eena well.

De Schreft rät von väl Menschen, waut sikj waut väaneemen un sikj dan sea aunstrenjden, daut uk to volbrinjen. Noah schauft soo bie 50 Joa un “bud daut Schepp, om siene Famielje to raden”. De Profeet Moses hieed nich opp, doaraun to denkjen, “waut de Beloonunk sennen wudd” (Hebräa 11:7, 26, PB). Un Jehova jeef Josua de Oppgow, daut Launt Kanaan entonämen (5. Mose 3:21-22, 28; Josua 12:7-24).

De Apostel Paulus neem sikj uk waut väa. Hee wist, daut Jesus jesajcht haud, daut “daut Evangelium von Gott sien Rikj woat en de gaunze Welt jeprädicht woaren” (Matäus 24:14, PB). Jesus säd to Paulus, daut hee sienen “Nomen ver de Velkja” prädjen sull, un Paulus holp uk Vesaumlungen en väl Lenda opptostalen (Aposteljeschicht 9:15, PB; Kolossa 1:23).

Jehova siene Deena haben am aul emma doaderch jeieet, daut see sikj waut väanämen un daut uk volbrinjen. Woo kjenn wie ons waut em jeisteljen väanämen? No waut kjenn wie sträwen un waut kaun ons halpen, daut uk to volbrinjen?

Woo kjenn wie ons daut rajchte väanämen?

Menschen nämen sikj väl veschiedne Sachen väa. Fa eenje es daut daut wichtichste, Jelt un Macht to haben. Oba soo to denkjen, wudd fa ons nich goot sennen! Soone Menschen, waut Jehova deenen, nämen sikj sest waut väa, aus dee, waut am nich deenen. Wie ieren Jehova, wan wie ons soont väanämen, waut ons halpen woat, am to deenen (Matäus 6:33). Un wie nämen ons soont väa, wiels wie Gott un dän Näakjsten leewen (Matäus 22:37-39; 1. Timotäus 4:7).

Wie wudden ons veleicht kjennen väanämen, mea fa Jehova to doonen ooda een bätra Mensch to woaren. Oba krakjt endoont waut wie ons väanämen, wie sellen daut emma doawäajen doonen, wiels wie Jehova un onsen Näakjsten leewen. Oba mau rajcht wan wie daut uk ut dän rajchten Senn doonen, kjenn wie daut doawäajen nich emma volbrinjen. Woo kjenn wie ons dan waut väanämen un daut uk volbrinjen?

Daut opp iernst wellen

Wie kjennen von Jehova lieren un woo hee aules muak. Jehova deeld sikj de Oabeit en Tieden en, waut hee Dach nand. De Schreft sajcht “daut wort Owent un daut wort Zemorjes” (1. Mose 1:5, 8, 13, 19, 23, 31, JHF). Hee neem sikj fa jieda Dach waut väa, un daut volbrocht hee uk (Openboarunk 4:11). Hiob säd: “Waut hee [Jehova] sikj väanemt, fieet hee derch” (Hiob 23:13, PB). Daut mott fa Jehova sea scheen jewast sennen, aules to seenen, “waut hee jemoakt haud”. Un hee säd, “daut daut sea goot wia”! (1. Mose 1:31, PB).

Om waut to volbrinjen, mott wie daut opp iernst wellen. Woo kjenn wie daut? Jehova wist mau rajcht ea aus hee de Ieed jemoakt haud, daut dee wudd sea schmock loten un am Iea brinjen. Wan wie daut soo doonen aus Jehova un doaräwa nodenkjen, woo daut woat utkomen un woo ons daut woat togood komen, dan woa wie daut uk werkjlich doonen wellen. Daut es soo aus Tony daut mol jinkj. Aus hee 19 Joa wia, wia hee mol en daut Betel von Jehova siene Zeijen en Wast-Europa un hee vegaut kjeenmol, waut hee doa sach. Von dan aun docht hee emma: “Woo wudd daut sennen, opp soone Städ to deenen un to wonen?” Hee docht emma doaräwa no, daut hee wudd wellen doa schaufen un hee deed uk waut doatoo. No miere Joaren wort hee dan enjelot, doa em Betel to deenen. Hee wia bloos sea schaftich!

Die kaun daut uk noch halpen, met soone Menschen toop to sennen, waut soont aul jedonen haben, aus du die väajenomen hast. Aus Jayson noch jinja wia, jleicht hee nich to prädjen. Oba lota funk hee aun, dän Deenst to jleichen un nu es hee Pionia. Waut holp Jayson dän Wunsch to kjrieen, Pionia to sennen? Hee sajcht: “Met aundre to vetalen, waut Pionia wieren, un met dee toop em Deenst to sennen, holp mie sea.”

Schriew die daut opp

Wan eena siene Iedeeen oppschrift, dan kaun eena dee selfst uk bäta vestonen. Salomo säd enne Schreft, daut weise Wieed ons halpen kjennen, goode Entscheidungen en ons Läwen to moaken (Liera 12:11). Wan wie onse Iedeeen oppschriewen, dan bliewen dee väl dolla en onse Jedanken un en ons Hoat. Daut es wuarom Jehova aule Kjennichs von Israel daut Jeboot jeef, daut dee musten Gott sien Jesaz aufschriewen (5. Mose 17:18). Wie kjennen daut oppschriewen, waut wie ons väajenomen haben un waut wie wellen doonen toom daut volbrinjen. Wie kjennen uk oppschriewen, waut fa Trubbels doa kunnen oppkomen un woo wie dee kjennen äwakomen. Un wan wie nosieekjen, waut ons noch to lieren fält un aundre om Help froagen, woat ons daut leichta sennen, daut wie daut volbrinjen kjennen, waut wie ons väajenomen haben.

Geoffrey wia lang Sondapionia en Asien. Sikj waut em jeisteljen väatonämen holp am emma, ruich to sennen. Aus siene Fru dan onverhofs storf, wia daut sea schwoa fa am. Geoffrey neem sikj Tiet toom truaren, un dan wort hee sikj eenich, sikj waut väatonämen toom sikj em Deenst drock hoolen. Hee schreef opp, waut hee doonen wull, un bäd doaräwa. Geoffrey wull bat Enj Moonat met dree Menschen aunfangen, de Bibel to studieren. Jieda Dach unjastunt hee sikj, waut hee dän Dach jedonen haud toom daut volbrinjen, waut hee sikj väajenomen haud. Un aule tieen Doag kjikjt hee, woo wiet hee jekomen wia. Kjeem hee bat doa, waut hee sikj väajenomen haud? Jo, hee deed. Geoffrey wia sea schaftich, daut hee 4 niee Bibelstudiums haud.

Nemm die waut kjlienet opp eemol väa

Veleicht denkj wie, wesset woa wie niemols volbrinjen kjennen. Tony, wua wie aul ea von räden, wull en een Betel von Jehova siene Zeijen schaufen, oba am späad sikj daut ommäajlich. Tony docht, daut hee daut nich wudd kjennen, wiels hee must noch välet en sien Läwen endren un hee wist noch nich mol, aus hee wull Gott deenen. Oba dan wort Tony sikj eenich, daut hee sien Läwen endren wull, om soo to läwen aus Jehova daut velangt, un daut hee sikj kunn deepen loten. Nodäm daut Tony sikj haud deepen jeloten, wort hee sikj eenich, Pioniahelpa to woaren un lota uk Pionia. Hee schreef daut oppem Kalenda, wanea hee met jieda Sach aunfangen wull. Aus hee ieescht een Stootje Pionia jewast wia, dan kjeem am daut nich mea soo väa, daut hee kjeenmol wudd kjennen em Betel deenen.

Daut kaun ons uk halpen, wan wie ons daut, waut wie ons väajenomen haben, en kjlandre Poats endeelen un daut eent no daut aundre doonen. Wan wie de kjliene Sachen kjennen doonen, dan woat ons daut Moot jäwen toom proowen, de groote Sachen uk to doonen. Wan wie pinkjlich doano kjikjen, waut wie aul volbrocht haben, woat ons daut Moot jäwen, wieda doaraun to schaufen. Wan wie nich opphieren, Jehova no Help to froagen, woat hee ons halpen, daut to volbrinjen, waut wie ons väajenomen haben. De Apostel Paulus jeef dän Rot: “Hoolt aun met bäden” (1. Tessalonicha 5:17, PB).

Jeff nich opp

Eenjemol hab wie ons waut väajenomen un haben uk dän Wunsch, daut to volbrinjen, oba daut späat sikj doawäajen soo, daut schauft bloos nich. Wie kjennen waut von dän Jinja Markus lieren. Hee wull met Paulus toop reisen opp dän siene tweede Missionsreis, oba Paulus wull dän goanich metnämen. Daut mott Markus secha haben mootloos jemoakt (Aposteljeschicht 15:37-40). Markus must doavon lieren, daut et nich soo utjekomen wia, aus hee sikj jewenscht haud. Hee must sikj sestwaut väanämen. Un daut späat sikj soo, daut hee daut uk deed, wiels lota räd Paulus goot von am, un hee kunn uk met Petrus toop en Babel deenen (2. Timotäus 4:11; 1. Petrus 5:13). Eent von daut baste, waut hee doonen kunn, wia secha daut Markus-Evangelium oppschriewen.

Doa kunn uk mol waut mankkomen, bie daut, waut wie ons väajenomen haben. Enne Städ oppjäwen, sell wie leewa no daut kjikjen, waut wie aul haben kunt volbrinjen un Endrungen moaken, wan daut fält. Wan doa uk waut mankkjemt, sell wie doawäajen nich vejäten, ons Väanämen em Uag to hoolen. De Kjennich Salomo säd: “Äwajeff daut däm HARN, waut du aun Haunt hast, un die woat daut met diene Plons jlekjen” (Spricha 16:3, PB).

Veleicht es daut nich emma mäajlich, daut to doonen, waut wie ons väajenomen haben. Biejlikj kjenn wie krank woaren ooda wie motten ons om de Famielje kjemren. Oba wie motten doawäajen emma em Denkj hoolen, waut wie to goodalatst aula wellen: wie wellen daut eewje Läwen kjrieen (Lukas 23:43; Filippa 3:13-14). Woo kjenn wie daut eewje Läwen kjrieen? De Apostel Johanes schreef: “Wäa oba deit waut Gott well, woat eewich bliewen” (1. Johanes 2:17, PB). Wan wie wäajen onse Omstend veleicht nich kjennen jewesset volbrinjen, waut wie ons väajenomen haben, kjenn wie ons doawäajen aun daut Jeboot hoolen, waut sajcht: “Hab Ieaforcht fa Gott, un hool siene Jesazen” (Liera 12:13, PB). Ons waut em jeisteljen väanämen, kaun ons halpen, Gott sienen Wellen em Uag to hoolen. Well wie ons emma waut väanämen, waut onsen Schepfa ieet.

[Kausten]

Waut wie ons em jeisteljen väanämen kjennen

○ Jieda Dach de Schreft läsen

○ Aul de Woaktorms un Woat Waka! läsen

○ Onse Jebäda vebätren

○ Dän Jeist siene Frucht verendach brinjen

○ Doano sträwen, mea em Deenst to doonen

○ Ons em prädjen un lieren vebätren

○ Lieren, äwa Fon, opp Jeläajenheit un bie Jeschafta to prädjen