En dise Tietschreft hab wie nu eenjet jelieet, waut ons halpt, de Auntwuat opp de Froag to finjen: “Wäa es Gott?” Daut ieeschte lieed wie en de Schreft, daut Gott sien Nomen Jehowa es un daut de Leew bie am daut ieeschte es. Wie haben uk unjasocht, waut Gott aul jedonen haft un waut fa Goodet hee noch fa de Menschheit doonen woat. Daut jeft noch väl mea, waut eena äwa Gott lieren kaun. Woomäajlich wundascht du, woo die daut halpt, wan du daut deist.

Jehowa vesprakjt: “Wan du am sieekjen woascht, woascht du am finjen” (1. Chronik 28:9). Denkj mol aun daut groote Jeschenkj, waut du kjrichst, wan du no Jehowa sieekjst un am noda kjemst: du kaust “sien Frind” sennen (Jakobus 2:23). Waut fa eenen Nutzen hast du doavon, wan du Gott sien Frint best?

Woare Freid. De Schreft sajcht von Jehowa, daut hee sikj “to siene Woakjen” freit (Psalm 104:31). Daut bediet, hee es een Gott, waut Freid haft. Wan du am noda kjemst un am nodeist, dan woascht du woare Freid haben, un daut woat die ennalich, en diene Jedanken un uk kjarpalich halpen (Psalm 33:12). Du woascht uk kjennen een schaftjet Läwen haben un soo läwen, daut du die Trubbel spoascht, goode Jewanheiten kjrichst un fein met aundre foadich woascht. Du woascht dan uk soo denkjen aus de Psalmenschriewa, waut säd: “Fa mie es daut goot dicht bie Gott to sennen” (Psalm 73:28).

Gott kjemmat sikj om die. Jehowa vesprakjt siene Deena: “Ekj woa die Rot jäwen un die em Uag hoolen” (Psalm 32:8). Daut meent, daut Jehowa om jieda eenem von siene Deena todoonen es un daut hee fa jieda eenem oppoat sorcht (Psalm 139:1-2). Wan du ieescht werkjlich Jehowa sien Frint jeworden best, dan woascht du seenen, daut hee die emma biestonen woat.

Eene besondre Tiet, waut kjemt. Jehowa Gott halpt die, nu aul een schaftjet un tofrädnet Läwen to haben. Buta daut jeft hee die de Jeläajenheit, noch mol eene wundascheene Tiet to beläwen (Jesaja 48:17-18). De Schreft sajcht: “Daut eewje Läwen es dit: daut see die, dän eensich woaren Gott, un Jesus Christus, dän du jeschekjt hast, kjanen lieren” (Johanes 17:3). De Hopninj, waut Gott ons jeft, kaun en dise schwoare Tiet soo aus een fausta un sechra Anka sennen (Hebräa 6:19).

Dit sent mau een poa von de väl besondre Uasoaken, waut wie haben toom Gott bäta kjanen lieren un sien Frint woaren. Wan du mea weeten west, kaust du wellich met irjenteenen von Jehowa siene Zeijen räden ooda opp onse Internet-Sied jw.org sieekjen.