Waut säd Jesus doaräwa, wanea daut Enj komen wudd?
Aus wie en dän väajen Artikjel aul jelieet haben, rät de Schreft von daut Enj von de Welt un meent doamet nich daut Enj von dän Ieedbaul ooda von de Menschen. Enne Städ daut meent de Schreft doamet, daut aul daut schlajchte, waut de Menschen en dise Welt oppjestalt haben, een Enj nämen woat, uk dee, waut daut unjastetten. Oba sajcht de Schreft, wanea dit Enj von de Welt komen woat?
WAUT SÄD JESUS ÄWA DAUT ENJ VON DE WELT?
“Doawäajen saj ekj: Siet waka! Jie weeten nich dän Dach ooda de Stund”. (MATÄUS 25:13)
“Siet waka, siet väasechtich! Wiels jie weeten nich wanea dee Tiet komen woat.” (MARKUS 13:33)
Daut bediet, kjeena oppe Ieed weet, wanea daut Enj von de Welt kjemt. Doch Gott weet krakjt, “wanea dee [bestemde] Tiet komen woat”– hee haft dän “Dach ooda de Stund” krakjt faustjesat (Matäus 24:36). Bediet daut dan, daut wie opp kjeene Wajch weeten kjennen, wanea daut Enj dicht bie es? Nä, wie kjennen daut weeten. Jesus räd to siene Nofolja äwa Sachen, waut doa passieren wudden, ea daut Enj wudd gaunz dicht bie sennen.
DAUT TIEEKJEN
Aul dee Sachen toop wudden daut Tieekjen sennen, “daut dise Tiet aufschluten woat.” Jesus säd: “Wiels een Volkj woat jäajen daut aundre oppstonen, un een Kjennichrikj jäajen daut aundre. Un doa woaren opp veschiedne Städen Pestilenz, Hungaschnoot un Ieedbäben sennen” (Matäus 24:3, 7). Hia un uk en Lukas 21:11 rät hee von “Pestilenz” – aulsoo wiet vespreede Krankheiten. Kaust du aul dit, waut Jesus verutsäd, vondoag dän Dach seenen?
De Menschen en onse Tiet lieden unja Hungaschnoot, Ieedbäben, sea schlemme Kjriej un hunjsche Krankheiten. Aune 2004 biejlikj veuasoakt een Ieedbäben em Mäa eenen Tsunami (eene Äwaschwamunk), wua 225,000 Menschen todood kjeemen. En dree Joa storwen rom 6.9 Millionen Menschen aun de COVID-19-Krankheit. Jesus säd, daut soone Sachen aus dit wudden bewiesen, daut daut Enj von de Welt dicht bie wia.
“DE LATSTE TIET”
En de Schreft woat de Tiet ver daut Enj aus de “latste Tiet” beschräwen (2. Petrus 3:3-4). No 2. Timotäus 3:1-5 no wudden de Menschen en de latste Tiet emma gottloosa woaren. (See dän Kausten “ Jroz ver daut Enj von de Welt.”) Es daut nich soo, daut de Menschen vondoag dän Dach väl von sikj selfst hoolen, bejierich un onbandich sent un sikj unjarenaunda nich mea leewen? Dit es uk kloara Bewies, daut daut Enj von de Welt sea dicht bie es.
Woo lang woat de latste Tiet sennen? De Schreft sajcht, daut es “mau eene korte Tiet”. Dan woat Gott aul dee venichten, “dee de Ieed vedorwen haben” (Openboarunk 11:15-18; 12:12).
DAUT PARADIES OPPE IEED ES DICHT BIE!
Gott haft dän Dach un de Stund aul bestemt, wanea hee dise schlajchte Welt venichten woat (Matäus 24:36). Un daut goode es, daut Gott well, “daut kjeena veloaren jeit” (2. Petrus 3:9). Hee jeft aulem de Jeläajenheit, omtokjieren un am noda to komen. Wuarom? Wiels hee well, daut wie daut Enj von de Welt äwaläwen un en de niee Welt läwen, wan de Ieed ieescht woat een Paradies sennen.
Gott sorcht doafäa, daut oppe gaunze Ieed bekauntjemoakt woat, woo eena kaun Poat von dise niee Welt unja sien Kjennichrikj woaren. Jesus säd, daut de goode Norecht von Gott sien Rikj wudd “en de gaunze Welt” jeprädicht woaren (Matäus 24:14). Jehowa siene Zeijen doonen oppe gaunze Welt millionende Stunden doafäa brucken, Menschen von dise biblische Hopninj to vetalen. Soo aus Jesus säd, wudd dit Prädichtwoakj oppe gaunze Ieed derchjefieet woaren, ea daut Enj kjemt.
De Tiet fa menschelje Rejierungen es meist aufjerant. Oba de goode Norecht es, daut du daut Enj von de Welt äwaläwen kaust un em Paradies oppe Ieed läwen, waut Gott vespräakjen haft. De näakjsta Artikjel woat utlajen, woo du noch mol kaust en dise niee Welt läwen.
Jesus siene Profezeiunk äwa “de latste Tiet” jeft ons Hopninj
Veleicht jleichst du uk dit
DE WOAKTORM
Wanea woat Gott sien Kjennichrikj äwa de Ieed rejieren?
Eenje von Jesus siene true Nofolja wullen daut uk weeten. Waut säd Jesus doatoo?
WAUT SAJCHT DE SCHREFT ÄWA ...?
Waut es daut Tieekjen von “de latste Doag” ooda daut Enj von de Welt?
De Bibel säd väl Sachen verut, waut aula toop wiesen wudden, daut wie enne latste Tiet läwen.
