Gott haft onsen Kjarpa soo wundaboa jemoakt, daut dee Wunden heelen kaun. Wan eena sikj schnitt, schraumt ooda spekjt, haft de Kjarpa “väl veschiednet, waut toopschauft, om kjliene un groote Wunden to heelen” (Johns Hopkins Medicine). De Kjarpa schauft fuaz aun de Wund, daut daut opphieet met bleeden. No daut woaren de Odren doa rom leftja un de Kjarpa moakt de Plak wada stoakja met daut, waut doa äwawaust.

DENKJ MOL ÄWA NO: Ons Schepfa haft ons soo jemoakt, daut Wunden aum Kjarpa heelen kjennen. Kjenn wie ons dan nich uk secha sennen, daut hee ons halpen woat, wan wie enne Jefeelen velatst sent? De Psalmenschriewa säd: “Hee heelt, dee een jebroaknet Hoat haben; hee bebinjt an äare Wunden” (Psalm 147:3). Veleicht feelst du die bedrekjt ooda du hast daut met waut schwoa. Woo kaust du die dan secha sennen, daut Jehova die uk met dise Wunden halpen woat – nu un uk lota?

Gott vesprakjt: “Enjst die nich, wiels ekj sie met die; fercht die nich, wiels ekj sie dien Gott. Ekj woa die stoakj moaken, un die halpen” (Jesaja 41:10). Wäa doa weet, daut Jehova om eenem bekjemmat es, dee haft ennalich Fräd un uk de Krauft met Schwierichkjeiten foadich to woaren. De Apostel Paulus säd, dit es “Gott sien Fräd, dee wiet äwa aules jeit waut Menschen vestonen kjennen”. Hee säd uk: “Ekj kaun aules derch däm, dee mie stoakj moakt” (Filippa 4:4-7, 9; 4:13, JHF).

Derch de Schreft kjenn wie Gloowen haben aun daut, waut Jehova noch fa de Menschen doonen woat. Biejlikj wiest Openboarunk 21:4-5 ons, waut hee doonen woat un wuarom wie doaropp vetruen kjennen:

• “Gott woat an aule Tronen von de Uagen weschen”. Hee woat met aules een Enj moaken, waut daut Lieden un Sorjen veuasoakt; soogoa soone Sorjen, waut fa aundre to beseenen kjlien sent.

• De aulmajchtja Kjennich, waut em Himmel “opp däm Troon” sett, woat met siene Macht doafäa enstonen, daut daut kjeen Lieden mea jäwen woat un daut wie dee Help kjrieen, waut ons fält.

• Jehova sajcht, daut siene Wieed “woarhauftich un opp to veloten” sent. Soo secha, aus hee de woara Gott es, soo secha woaren sikj siene Vespräakjungen uk erfellen.

“Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen, wiels waut verhäa wia, es veschwungen. Dan säd dee, dee opp däm Troon saut: Kjikjt emol! Ekj moak aules nie. Un hee säd to mie: Schriew, wiels dise Wieed sent woarhauftich un opp to veloten!” (Openboarunk 21:4-5).

En de Natua uk en de Bibel kjenn wie seenen, woo ons himlischa Voda es un waut fa Ieejenschoften hee haft. Derch de Schepfunk kjenn wie enwoaren, daut hee well, daut wie am kjanen lieren un siene Frind woaren. Oba de Bibel sajcht ons daut jlikjtoo. Dee sajcht: “Nodat junt no Gott, dan woat hee uk dicht no junt komen” (Jakobus 4:8). Un en Aposteljeschicht 17:27 sajcht daut: “Hee es werkjlich von ons aula nich wiet auf”.

Wan du die Tiet nemst, Gott kjanen to lieren, woascht du die emma sechra woaren, daut hee fa die “sorcht” (1. Petrus 5:7). Woo kjemt die daut togood, opp Jehova to vetruen?

See wie mol, waut Toru von Jaupaun beläwd. Hee wort von eene christelje Mutta oppjetrocken un doch jinkj hee bie de Yakuza bie, eene jewaultsome, jaupaunische Baund. Hee vetalt: “Ekj docht, daut Gott mie nich lieden kunn un jiedatsmol, wan doa wäa storf, wia daut, om mie to strofen; besonda, wan ekj dee väl räakjend.” Wäajen Toru mank soone grausome Menschen wia, sajcht hee selfst, daut hee uk een hoada un jefeelsloosa Mensch wort. Hee weet noch, waut hee sikj väajenomen haud un sajcht: “Om aunjeseenen to sennen, wull ekj ieescht noch wäm ombrinjen, dee bekaunda wia aus ekj un dan bie junk stoawen.”

 Oba Toru un siene Fru fungen aun de Bibel to studieren un doaderch endad hee väl en sien Läwen un Enstalunk. Siene Fru Hannah sajcht: “Ekj sach met ieejne Uagen, woo hee sikj endad”. Nu sajcht Toru: “Ekj weet, daut jeft werkjlich eenen Gott, dee om jiedren eenen von ons bekjemmat es. Hee well nich, daut doa wäa stoaft un es reed ons to vejäwen, wan wie onse Fäla enseenen un ons endren. Hee horcht ons too, wan daut uk om Sachen jeit, waut wie sest kjeenem vetalen kjennen un uk sest kjeena vestonen wudd. Sea boolt woat Jehova aule Trubbels, Lieden un Weedoag oppriemen. Hee halpt ons nu aul opp eene Wajch, wua wie nich mol aun denkjen. Hee kjemmat sikj om ons un rat ons, wan wie ons unjadrekjt feelen” (Psalm 136:23).

Toru sien Biespel wiest, daut wie nu aul kjennen een bätret Läwen un eene sechre Hopninj haben fa lota, wan wie weeten, daut Gott kaun un woat een Enj moaken met aul daut schlajchte un daut Trua. Die kaun daut soogoa en eene Welt, waut voll Lieden es, aul togood komen, daut Gott om die bekjemmat es.