1-2. Waut es daut Leesjelt, un wuarom bruck wie daut?

AUS de volkomna Adam sindijd, velua hee daut eewje Läwen fa sikj selfst un uk fa siene Kjinja, waut hee haben wudd. Hee kunn siene Sind nich mea gootmoaken un haud dän Doot vedeent, wiels hee daut met Fliet jedonen haud. Oba waut wudd dan met siene Kjinja sennen? Dee hauden je nuscht met Adam siene Sind to doonen (Reem. 5:12, 14). Kunn doa dan noch waut jedonen woaren, om de Kjinja von dän Doot to raden? Jo! Boolt nodäm daut Adam jesindicht haud, muak Jehova daut soo bie sacht openboa, woo hee millionende von Adam siene Nokomen von Sind un Doot raden wudd (1. Mo. 3:15). Jehova wudd to de rajchte Tiet sienen Sän von Himmel schekjen, om “sien Läwen to jäwen väle loostokjeepen” (Mar. 10:45; Joh. 6:51).

² De Pries, dän Jesus told, om daut wada trigjtokjrieen, waut Adam veloaren haud, woat en de Christelje Griechische Schreften “daut Leesjelt” jenant (1. Kor. 15:22). Wuarom bruck wie daut Leesjelt? Wiels Jehova sien jerajchtet Jesaz velangd, daut een Läwen fa een Läwen jejäft sull (2. Mo. 21:23-24). Adam velua sien volkomnet Läwen. Doawäajen wia daut needich, daut Jesus sien volkomnet Läwen aus Mensch jeef (Reem. 5:17). Soo wort Jesus fa aul dee, waut aun daut Leesjelt jleewden, de “eewja Voda” (Jes. 9:5; Reem. 3:23-24).

3. Wuarom wia Jesus wellich reed sien volkomnet Läwen aus Mensch to jäwen, soo aus Johanes 14:31 un 15:13 wiest?

³ Jesus wia wellich reed sien Läwen to jäwen, wiels hee sienen Voda un ons sea leewd (läs Johanes 14:31; 15:13). Ut Leew wort hee sikj doatoo eenich, bat aum Enj tru to bliewen un sienen Voda sienen Wellen to doonen. Wiels Jesus batem Doot tru bleef, woat sikj daut erfellen, waut Jehova  sikj met de Menschen un met de Ieed väajenomen haud. En disen Artikjel woa wie seenen, wuarom Gott daut tooleet, daut Jesus ver sienen Doot soo väl lieden must. Wie woaren uk een bät von eenen Bibelschriewa räden, waut sea dankboa wia fa daut Leesjelt. Un tolatst woa wie noch seenen, woo wie onse Dankboakjeit fa daut Leesjelt wiesen kjennen un woo wie noch dankboara woaren kjennen fa daut, waut Jehova un Jesus fa ons jedonen haben.

4. Woo wia Jesus sien latsta Dach?

⁴ Stal die väa, waut Jesus dän latsten Dach ver sienen Doot aules derchmoaken must. Hee wudd sikj haben kunt dusende Enjel sajen toom am halpen, oba enne Städ daut leet hee sikj von de reemische Soldoten faustnämen, waut am sea grausom behaundelden (Mat. 26:52-54; Joh. 18:3; 19:1). Dee brukten eene Pitsch, waut sienen Kjarpa sea vewunden deed. Un lota must hee dän schwoaren Pol opp sienen schlemmen Rigjen droagen, bat de Soldoten eenen aundren bemusten, dän to droagen (Mat. 27:32). Aus Jesus dan bat doa wia, wua se am dootmoaken wudden, noagelden se siene Henj un Feet aun eenen Pol. Siene gaunze Wicht honk aun de Wunden. Siene Frind truaden un siene Mame road, oba de judische Volkjsleida spotten äwa am (Luk. 23:32-38; Joh. 19:25). Jesus must stundenlank sea schwoa toobrinjen. Sien Hoat un siene Lungen bekjlamden emma dolla un daut odmen wort emma schwanda. Un doch bleef hee tru. Gaunz tolatst bäd hee noch un dan buach hee sienen Kopp rauf un storf (Mar. 15:37; Luk. 23:46; Joh. 10:17-18; 19:30). Daut wia werkjlich een langsoma, jaumalicha Doot!

5. Waut wia fa Jesus noch schlemma, aus woo hee dootjemoakt wort?

⁵ Fa Jesus wia daut nich daut schlemste, woo se am dootmuaken, oba wäajen waut se am dootmuaken. Dee deeden am ojjerajcht beschuljen, daut hee minkj haud jäajen Gott un sienen Nomen jelastat (Mat. 26:64-66). Bloos doaraun to denkjen wia Jesus soo schwoa, daut hee hopt, daut sien Voda daut nich wudd tooloten (Mat. 26:38-39, 42). Wuarom leet Jehova daut too, daut sien leewa Sän soo sea lieden un stoawen must? Well wie mol dreeatlei seenen.

6. Wuarom must Jesus aun eenen Pol jehongen woaren?

⁶ Ieeschtlich wia daut needich, daut Jesus aum Pol jehongen wort, daut de Juden kunnen von eenen Fluch friejemoakt woaren (Gal. 3:10; 3:13, NW). Dee hauden vesproaken no Gott sien Jesaz to horchen, oba dee deeden daut nich. Doawäajen hauden dee noch eenen Fluch opp sikj, buta daut see dän Doot von Adam metjeorwen hauden (Reem. 5:12). Daut Jesaz, waut Gott de Israeliten jejäft haud, säd, wan eena eene schwoare Sind jedonen haud, sull dee met dän Doot bestroft woaren. Doahinja deeden se eenjemol dän sienen Kjarpa aun eenen Boom, ooda Pol henjen (5. Mo. 21:22-23; 27:26). * Doaderch daut se Jesus aun eenen Pol hongen, kunnen de Juden von disen Fluch friejemoakt woaren un dee kunn Jesus sien Opfa togood komen, wan dee uk nich aun am jejleeft hauden.

7. Waut es de tweeda Grunt, wuarom Gott daut tooleet, daut sien Sän lieden must?

⁷ Daut jeft noch eenen tweeden Grunt,  wuarom Gott daut tooleet, daut sien Sän lieden must. Hee muak dän reed, daut dee lota wudd kjennen ons Huaga Priesta woaren. Jesus haft daut selfst jeprooft, woo schwoa daut es, Gott tru to bliewen, wan eena sea aufjeprooft woat. Hee feeld sikj soo sea unja Druck, daut hee Jehova “jebät [haft] un jeprachat un jeschräajen met Tronen”. Un wiels hee soo väl derchjemoakt haft, weet hee krakjt, waut ons fält, un kaun “dee halpen, dee vesocht woaren”. Sent wie nich sea dankboa, daut Jehova ons eenen leeftoljen Huagen Priesta jejäft haft, dee “met onse Schwakheiten metfeelen kaun”? (Heb. 2:17-18; 4:14-16; 5:7-10).

8. Waut wia daut dredde, wuarom Gott daut tooleet, daut Jesus lieden must?

⁸ Dreddens leet Jehova daut too, daut Jesus sea lieden must, wiels dan eene wichtje Froag oppem kloaren jebrocht wort. Wudden de Menschen Gott tru bliewen kjennen, wan dee sea aufjeprooft worden? De Soton säd nä! Dee sajcht, daut de Menschen Gott bloos deenen, wiels dee doa waut bie haben. Un dee jleeft uk, daut de Menschen Jehova goanich leewen, krakjt soo aus Adam nich deed (Hiob 1:9-11; 2:4-5). Oba wiels Jehova sikj secha wia, daut Jesus am tru bliewen wudd, leet hee daut too, daut dee sea aufjeprooft wort. Un wiels Jesus tru bleef, bewees hee, daut de Soton een Läajna wia.

9. Waut kjenn wie von dän Apostel Johanes lieren?

⁹ De Lia von daut Leesjelt haft väl Christen em Gloowen jestoakjt. Doaderch haben dee wiedajeprädicht, wan dee Jäajenstaunt hauden, un kunnen äa Läwen lank met schwoaret foadich woaren. Soo wia daut uk bie dän Apostel Johanes. Hee prädijd woomäajlich äwa 60 Joa von Jesus un von daut Leesjelt. Un hee wia aul meist 100 Joa, aus de reemische Rejierunk docht, daut hee soo jefäadlich wia, daut see dän no de Insel Patmos schekjen musten. Wuarom deeden dee daut? Wiels hee “daut Gotteswuat jerät, un von Jesus Christus jeprädicht haud” (Opb. 1:9). Es hee nich een goodet Biespel fa Gloowen un uthoolen?

10. Woo wiesen Johanes siene Bieekja, daut hee fa daut Leesjelt dankboa wia?

¹⁰ De Bibelbieekja, waut Johanes schreef, wiesen, daut hee Jesus sea leewd un sea dankboa wia fa daut Leesjelt. Hee räd doa äwa 100 Mol von daut Leesjelt un von daut goode, waut doaderch mäajlich wia. Hee schreef biejlikj: “Wan oba doch wäa sindjen sull, dan hab wie Jesus Christus, dee onen Sind es, un dee bie Gott dän Voda fa ons enstonen deit” (1. Joh. 2:1-2). Un hee muak uk dietlich, woo wichtich daut wia, “Zeichnis von Jesus” to jäwen (Opb. 19:10). Daut es gaunz kloa, daut hee fa daut Leesjelt sea dankboa wia. Woo kjenn wie daut wiesen, daut wie daut uk sent?

11. Waut kaun ons halpen, wan wie vesocht woaren?

¹¹ Lot die nich toom sindjen veleiden. Wan wie opp iernst dankboa sent fa daut Leesjelt, woa wie nich denkjen: “Ekj bruck mie goanich sea aunstrenjen tru to bliewen, wan ekj vesocht woa. Ekj kaun eefach sindjen un dan lota om Vejäwunk froagen.” Enne Städ daut woa wie denkjen: “Ekj kaun nich soon schlajchtet doonen, wiels Jehova un Jesus aul soo väl fa mie jedonen haben.” Doawäajen woa wie Jehova om Krauft froagen un am prachren: “Lot daut  nich too, daut ekj die ontru woa, wan ekj vesocht woa!” (Mat. 6:13).

12. Woo kjenn wie daut nokomen, waut 1. Johanes 3:16-18 sajcht?

¹² Leew diene Breeda un Sestren. Wan wie daut doonen, dan wies wie, daut wie fa daut Leesjelt dankboa sent. Wuarom? Wiels Jesus es nich bloos fa ons jestorwen, oba uk fa onse Breeda un Sestren. Wan hee reed wia fa dee to stoawen, dan räakjent hee dee väl (läs 1. Johanes 3:16-18). Wie wiesen, daut wie onse Breeda un Sestren leewen, wan wie dee goot behaundlen (Efs. 4:29, 31–5:2). Wie halpen dee biejlikj, wan dee krank sent, wan dee groote Trubbels haben ooda wan dee een Owwada beläft haben. Oba waut sell wie doonen, wan een Gloowesbrooda waut deit ooda sajcht, waut ons weedeit?

13. Wuarom sell wie aundre vejäwen?

¹³ Felt die daut eenjemol schwoa, eenen Gloowesbrooda to vejäwen? (3. Mo. 19:18). Dan horch no disen Rot: “Vedroacht eena dän aundren, un vejäft junt unjarenaunda, wan wäa eene Kloag jäajen dän aundren haft. Soo aus de Har junt vejäft haft, soo mott jie uk vejäwen” (Kol. 3:13). Jiedatsmol, wan wie eenen Brooda ooda eene Sesta vejäwen, wies wie onsen himlischen Voda, daut wie fa daut Leesjelt dankboa sent. Oba waut kjenn wie doonen, daut wie Gott noch dankboara sent fa daut Leesjelt?

14. Waut kjenn wie doonen, daut wie noch dankboara sent fa daut Leesjelt?

¹⁴ Dank Jehova fa daut Leesjelt. Eene 83-joasche Sesta, waut Joanna heet un en Indien wont, sajcht: “Ekj denkj, daut et needich es, daut ekj jieda Dach en de Jebäda von daut Leesjelt räd un Jehova doafäa dank.” Wan du fa die selfst bätst, dan saj Jehova jieda Dach, waut du orrajcht jedonen hast, un froag dän om Vejäwunk. Oba wan eena eene groote Sind begonen haft, dan mott eena uk de Eltestasch om Help froagen. Dee woaren ons toohorchen un leeftolich ut Gott sien Wuat Rot jäwen. Dee woaren met ons toop bäden un Jehova froagen, aus dee ons vejeft, daut wie “kjennen [em jeisteljen] jeheelt woaren” (Jak. 5:14-16).

15. Wuarom sell wie ons de Tiet nämen, von daut Leesjelt to läsen un doaräwa notodenkjen?

¹⁵ Denkj äwa daut Leesjelt no. Eene 73-joasche Sesta, waut Rajamani heet, sajcht: “Wan ekj läs, woo Jesus lieden must, komen mie emma de Tronen.” Veleicht deit die daut uk wee, wan du doaräwa nodenkjst, woo sea Gott sien Sän lieden must. Oba je dolla du äwa daut Opfa von Jesus nodenkjst, je jrata woat diene Leew fa am uk fa sienen Voda. Wudd daut dan nich goot sennen, daut wie mol besonda äwa daut Leesjelt studieren deeden, daut wie doa dolla äwa nodenkjen kunnen?

16. Woo kjemt ons daut togood, wan wie aundre von daut Leesjelt lieren? (See daut Bilt oppe väaschte Sied.)

 ¹⁶ Lia aundre von daut Leesjelt. Jiedatsmol, wan wie to aundre von daut Leesjelt räden, woat onse Dankboakjeit noch jrata. Wie haben sea feine Bieekja un Videos toom aundre lieren, wuarom Jesus fa ons stoawen must. Wie kjennen dee biejlikj daut 4. Poat von daut Heft Eene goode Norecht von Gott wiesen. Daut haft daut Teema “Wäa es Jesus Christus?” Ooda wie kjennen dee daut 5. Kapitel von daut Buak Waut lieet de Schreft werkjlich? wiesen. Daut haft daut Teema “Woo Gott de Menschen derch Christus rat”. Un onse Dankboakjeit woat uk jieda Joa jrata, wan wie no daut Aundenkjen aun Jesus sienen Doot wanken un aundre flietich doa hankroagen. Sent wie nich sea schaftich, daut wie kjennen aundre von Jehova sienen Sän lieren?

17. Wuarom es daut Leesjelt daut jratste Jeschenkj?

¹⁷ Gaunz secha hab wie gooden Grunt doafäa, fa daut Leesjelt dankboa to sennen un to bliewen. Derch daut Leesjelt kjenn wie met Jehova Frind sennen, wan wie uk onvolkomen sent. Un derch daut Leesjelt woaren uk dän Soton siene Woakjen kaputt jemoakt (1. Joh. 3:8). Derch daut Leesjelt woat sikj uk daut erfellen, waut Jehova sikj met de Ieed väajenomen haud. De gaunze Ieed woat dan een Paradies sennen. Aule, waut du seenen woascht, woaren Jehova leewen un am deenen. Well wie ons jieda Dach aunstrenjen, onse Dankboakjeit fa daut Leesjelt to wiesen. Daut es daut jratste Jeschenkj, waut Gott ons jejäft haft!